Lavdet e mëngjesit
25 Dhjetor – Kërshëndellat
Ftesa
D O Zot, hapi buzët e mia.
C Dhe goja ime do të kumtojë lavdet e tua.
Ant. Ejani ta adhurojmë Zotin, që lindi për ne.
Ose:
Ant. Krishti lindi për ne: ejani ta adhurojmë.
Psalmi 95 /94/ Grishje për të lavdëruar Hyjin
Nxitni njëri-tjetrin dita-ditës deri sa të zgjasë kjo “Sot” (Heb 3, 13).
Ejani t'i këndojmë Zotit, *
t'i brohorasim Hyjit, Shëlbuesit tonë.
T'i dalim para me falënderje, *
t'i këndojmë këngë hareje!
Ant. Ejani ta adhurojmë Zotin, që lindi për ne.
Ose:
Ant. Krishti lindi për ne: ejani ta adhurojmë.
Sepse Hyj i madhërishëm është Zoti, *
Mbret i madhërueshëm mbi të gjithë zotat!
Sepse në dorën e tij janë thellësitë e tokës, *
të tijat janë edhe majat e maleve,
i tiji është deti ‑ ai e krijoi, *
duart e tija e formuan tokën.
Ant. Ejani ta adhurojmë Zotin, që lindi për ne.
Ose:
Ant. Krishti lindi për ne: ejani ta adhurojmë.
Ejani ta adhurojmë, të biem përmbys para tij, *
të biem në gjunjë para Zotit që na krijoi!
Sepse ai është Hyji ynë,
ne jemi populli i kullosës së tij, *
grigja që ai ruan. .
Ant. Ejani ta adhurojmë Zotin, që lindi për ne.
Ose:
Ant. Krishti lindi për ne: ejani ta adhurojmë.
Oh sikur ta ndienit sot zërin e tij: *
“Mos e bëni zemrën tuaj gur porsi në Meribë,
porsi në ditë të Masës në shkretëtirë, †
kur etërit tuaj më vunë në sprovë: *
më provuan megjithëse i kishin parë veprat e mia. .
Ant. Ejani ta adhurojmë Zotin, që lindi për ne.
Ose:
Ant. Krishti lindi për ne: ejani ta adhurojmë.
Dyzet vjet më mërziti ajo brezni †
e thashë: 'Popull zemërluhatshëm është ky, *
që s'i njeh udhët e mia.'
Prandaj u përbetova në hidhërimin tim: *
'Askurrë s'do të hyjnë në prehjen time!'” .
Ant. Ejani ta adhurojmë Zotin, që lindi për ne.
Ose:
Ant. Krishti lindi për ne: ejani ta adhurojmë.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen. .
Ant. Ejani ta adhurojmë Zotin, që lindi për ne.
Ose:
Ant. Krishti lindi për ne: ejani ta adhurojmë.
P. O Zot, shpejto të më ndihmosh!
V. Lavdi Atit e Birit e Shpirtit Shenjt,
P. si ka qenë në fillim,
ashtu tash e përgjithmonë e jetës. Amen.
Kjo hyrje nuk përdoret kur Lavdet fillojnë me Ftesë
Himni
Nga boshti i lindjes së diellit
gjer në kufi të tokës
t’i këndojmë Krishtit, Princit
lindur nga Maria Virgjër.
Krijuesi i lumë i rruzullit
u vesh me një trup skllevrish,
me mish të lirojë mishin,
të mos humbë çka krijoi.
Në amë të mbyllur t’prindit
futet hiri qiellor,
dhe barku i vashës mbarti
fshehtësitë që njohur s’kishte.
Shtëpia e parzmës s’pastër
bëhet faltorja e Hyjit,
pa njohur burrë pa u prekur,
me fjalë u ngjiz me Birin.
Shumë u kujdes lehona
për atë që i tha Gabrieli,
për t’cilin galdoi Gjoni
në bark të nënës s’vet.
Në kashtë duroi të flinte,
nuk e përbuzi grazhdin,
i ushqyer me pak qumësht
si zogu s’pati uri.
Galdon kori i qiellorëve
engjëjt i këndojnë Hyjit,
haptas barinjve u shfaqet,
bariu, krijuesi i gjithësisë.
Jezus, të qoftë lavdia,
që u linde nga Nënë Virgjër,
me Atin dhe me Shpirtin
jetëdhënës, në amshim. Amen.
Ose një himn tjetër apo një këngë e përshtatshme e miratuar nga autoritetet kishtare.
Ant. 1 Barinj, kë keni parë? Kush u shfaq në tokë? Kemi parë një fëmijë dhe engjëjt që e lavdëronin Zotin, aleluja.
Psalmi 63 /62/ (2-9) Shpirti i etshëm për Hyjin
Kisha ka etje për Shëlbuesin e vet, me dëshirë që të shuajë etjen në burimin e ujit të gjallë që rrjedh për jetën e pasosur (Krh. Cassiodoro).
O Hyj, Hyji im je ti, qysh në agim të kërkoj. *
Ka etje për ty shpirti im,
ty të dëshiron mishi im, *
si toka e shkretë, e thatë, e paujë,
kështu erdha në Shenjtëroren tënde *
për ta parë fuqinë tënde e lavdinë tënde.
Sepse më e mirë është dashuria jote se jeta: *
buzët e mia do të të lavdërojnë.
Kështu do të të bekoj në jetën time *
e në Emrin tënd do t’i lartësoj duart e mia,
do të ngihem si në gosti të shkëlqyeshme, *
me buzë të hareshme do të të lavdërojë goja ime.
Ty do të të kujtoj edhe në shtratin tim, *
në përgim natën do të mendoj për ty,
sepse ti je bërë ndihma ime, *
prandaj do të brohoras nën hijen e krahëve të tu!
Shpirti im u mbështet në ty, *
e djathta jote më merr për dore.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 1 Barinj, kë keni parë? Kush u shfaq në tokë? Kemi parë një fëmijë dhe engjëjt që e lavdëronin Zotin, aleluja.
Ant. 2 Engjëlli u tha barinjve: Po ju kumtoj një gëzim të madh: Sot lindi për ju Shëlbuesi i botës, aleluja.
Kënga Dan 3, 57-88. 56 Çdo krijesë le ta lavdërojë Zotin
Lavdëroni Hyjin tonë, të gjithë shërbëtorët e tij! (Zb 19, 5).
Bekojeni, të gjitha veprat e Zotit, Zotin, *
lëvdojeni dhe madhërojeni në shekuj!
Bekojeni, engjëjt e Zotit, Zotin, *
bekojeni, o qiej, Zotin.
Ujëra që jeni përmbi qiell, bekojeni Zotin, *
të gjitha ju, o fuqi, bekojeni Zotin.
Diell e hënë, bekojeni Zotin, *
yjet e qiellit, bekojeni Zotin.
Të gjitha shirat e vesa, bekojeni Zotin, *
të gjitha ju, o erëra, bekojeni Zotin.
Zjarr e nxehtësi, bekojeni Zotin, *
acar e vapë, bekojeni Zotin.
Vesë e brymë, bekojeni Zotin, *
akull e cegëm, bekojeni Zotin.
Breshra e borëra, bekojeni Zotin, *
netë e ditë, bekojeni Zotin.
Dritë e errësirë, bekojeni Zotin, *
vetëtima e re, bekojeni Zotin.
Toka e bekoftë Zotin, *
lëvdojeni e madhërojeni në shekuj!
Bekojeni, o male e kodra, Zotin, *
bekojeni Zotin, të gjitha bimësitë e tokës.
Dete e lumenj, bekojeni Zotin, *
bekojeni, burime, Zotin.
Përbindësh e gjithçka lëviz në ujëra,
bekojeni Zotin, *
të gjithë shpendët e qiellit, bekojeni Zotin.
Kafshë të egra e shtëpiake, bekojeni Zotin, *
bijtë e njeriut, bekojeni Zotin.
Bekoje, o Izrael, Zotin, *
lëvdojeni e madhërojeni në shekuj!
Priftërinjtë e Zotit, bekojeni Zotin, *
shërbëtorët e Zotit, bekojeni Zotin.
Shpirtra e frymë të të drejtëve, bekojeni Zotin, *
shenjtër e të përvujtë në zemër, bekojeni Zotin.
Anani, Azari, Misael, bekojeni Zotin, *
lëvdojeni e madhërojeni në shekuj!
Të bekojmë Atin e Birin e Shpirtin Shenjt; *
ta lëvdojmë e ta madhërojmë në shekuj
I bekuar je ti, o Zot, në kupën qiellore, *
i lavdishëm e i madhërueshëm në shekuj!
Në fund të kësaj kënge nuk thuhet Lavdí Atit.
Ant. 2 Engjëlli u tha barinjve: Po ju kumtoj një gëzim të madh: Sot lindi për ju Shëlbuesi i botës, aleluja.
Ant. 3 Sot për ne lindi një fëmijë: Hyji, i fortë, është emri i tij, aleluja.
Psalmi 149 (1-9) Festa e miqve të Zotit
Bijtë e Kishës, bijtë e popullit të ri le të galdojnë në mbretin e tyre që është Krishti (Esichio).
Këndoni Zotit një këngë të re, *
këndoni lavdi në mbledhjen e shenjtërve!
Le t’i gëzohet Izraeli Krijuesit të vet, *
bijtë e Sionit t’i brohorasin Mbretit të vet!
Le ta lavdërojnë Emrin e tij në valle, *
le t’i bien në nder të tij tupanit e citarës,
sepse Zoti kënaqet në popullin e vet, *
të përvujtët i nderon me shëlbim.
Le të galdojnë të drejtët në lumturi, *
le të brohorasin nga shtrojat e veta!
E paçin lavdinë e Zotit në gojë, *
e shpatën dytehëshe në dorë!
Për të marrë shpagim mbi paganë, *
për t’u dhënë popujve ndëshkim,
për t’i lidhur mbretërit e tyre në pranga, *
princat e tyre në zinxhirë të hekurt,
për ta zbatuar mbi ta dënimin kaherë të shkruar: *
- ky është nder për të gjithë besnikët e tij.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 3 Sot për ne lindi një fëmijë: Hyji, i fortë, është emri i tij, aleluja.
Leximi i shkurtër Heb 1, 1-2
Mbasi Hyji herë mbas here dhe në mënyrë të ndryshme, në të kaluarën, u ka folur etërve me anë të profetëve, së fundi, në këto ditë, na foli edhe neve me anë të Birit, të cilin e bëri trashëgimtarin e të gjitha sendeve, nëpër të cilin edhe e krijoi gjithësinë.
Përgjigjja e shkurtër
C Zoti e tregoi shpëtimin e tij * aleluja, aleluja.
Zoti e tregoi shpëtimin e tij aleluja, aleluja.
D Mbarë kombeve ua shpalli drejtësinë e tij,
aleluja, aleluja.
Lavdi Atit e Birit e Shpirtit Shenjt.
Zoti e tregoi shpëtimin e tij aleluja, aleluja.
Kënga ungjillore (Benedictus Lk 1, 68-79)
Ant. Lavdi Hyjit në më të lartin qiell e paqe mbi tokë njerëzve që ka për zemër!
Qoftë bekuar Zoti, Hyj i Izraelit, *
që e pa dhe e shpërbleu popullin e vet!
Ai e ngriti Shpëtimtarin tonë *
në shtëpinë e Davidit, shërbëtorit të vet,
sikurse premtoi kaherë *
me gojë të profetëve të tij të shenjtë:
se do të na shpëtojë prej armiqve tanë *
dhe prej dorës së të gjithë atyre që na urrejnë;
se do të bëjë mirësinë që ua premtoi etërve tanë *
e do t’i bjerë në mend Besëlidhja e tij e shenjtë
e betimi që bëri në të mirën e Abrahamit, atit tonë *
se do të na e bëjë të mundshme t’i shërbejmë pa frikë,
të çliruar nga duart e armikut *
në shenjtëri e drejtësi para tij
për çdo ditë të jetës sonë.
E ti, o djalosh, do të quhesh profet i të Tejetlartit, *
sepse do të shkosh përpara Zotit
për t’ia përgatitur udhët,
për ta vënë në dijeni popullin e tij *
se Hyj do ta shëlbojë duke ia falur mëkatet e tija,
në saje të zemrës së dashur të Hyj tonë *
që do të na e dërgojë në pasi prej qiellit Diellin,
për të shndritur ata që gjenden në errësirë
dhe në hijen e vdekjes, *
për t’i drejtuar hapat tanë në udhën e paqes.“
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Lavdi Hyjit në më të lartin qiell e paqe mbi tokë njerëzve që ka për zemër!
Lutjet e besimtarëve
Fjala e Zotit është prej shekujve, ndërsa për ne ka lindur në kohë. Ta falënderojmë dhe me gëzim t'i brohorasim:
Le t'i gëzohet toka ardhjes sate, o Zot.
O Krisht, Fjalë e amshuar, ti zbrite në tokë dhe atë e mbushe me gëzim:
— gëzoji edhe zemrat tona me vizitën e përhershme të hirit tënd.
Shpëtimtari ynë, në lindjen tënde e tregove besnikërinë e Hyjit:
— bëj që me fe të gjallë t'iu mbesim besnikë premtimeve të pagëzimit.
Ti, mbret i qiellit dhe i tokës, nëpërmjet engjëjve ua shpalle njerëzve paqen:
— ruaje jetën tonë në paqen tënde.
O Zot, ti je hardhia dhe prej teje ne e thithim limfën e jetës:
— bëj që gjithmonë të mbesim shermende të gjalla në ty dhe të mos jemi të pafrytshëm.
Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.
Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.
Lutja
O Hyj i gjithëpushtetshëm, ti na përshkon me dritën e re të Fjalës sate të mishëruar, bëj po të lutemi, të shkëlqejë në veprat tona ai mister i cili me anën e fesë, ndriçon në mendjen tonë. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve. Amen.
Përfundimi i Orës, sikurse në Shërbesën e rëndomtë.