Lavdet e mëngjesit
Java e Pestë e Kohës së rëndomtë
Java I e Psalterit
E hënë
Lavdet e mëngjesit
Ftesa
D O Zot, hapi buzët e mia.
C Dhe goja ime do të kumtojë lavdet e tua.
Në shërbesën e së dielave dhe të ditëve të javës:
Ant. Para fytyrës së Zotit t’i këndojmë lavdisë së tij.
Psalmi 95 /94/ Grishje për të lavdëruar Hyjin
Nxitni njëri-tjetrin dita-ditës deri sa të zgjasë kjo “Sot” (Heb 3, 13).
Ejani t'i këndojmë Zotit, *
t'i brohorasim Hyjit, Shëlbuesit tonë.
T'i dalim para me falënderje, *
t'i këndojmë këngë hareje!
Ant. Para fytyrës së Zotit t’i këndojmë lavdisë së tij.
Sepse Hyj i madhërishëm është Zoti, *
Mbret i madhërueshëm mbi të gjithë zotat!
Sepse në dorën e tij janë thellësitë e tokës, *
të tijat janë edhe majat e maleve,
i tiji është deti ‑ ai e krijoi, *
duart e tija e formuan tokën.
Ant. Para fytyrës së Zotit t’i këndojmë lavdisë së tij.
Ejani ta adhurojmë, të biem përmbys para tij, *
të biem në gjunjë para Zotit që na krijoi!
Sepse ai është Hyji ynë,
ne jemi populli i kullosës së tij, *
grigja që ai ruan.
Ant. Para fytyrës së Zotit t’i këndojmë lavdisë së tij.
Oh sikur ta ndienit sot zërin e tij: *
“Mos e bëni zemrën tuaj gur porsi në Meribë,
porsi në ditë të Masës në shkretëtirë, †
kur etërit tuaj më vunë në sprovë: *
më provuan megjithëse i kishin parë veprat e mia.
Ant. Para fytyrës së Zotit t’i këndojmë lavdisë së tij.
Dyzet vjet më mërziti ajo brezni †
e thashë: 'Popull zemërluhatshëm është ky, *
që s'i njeh udhët e mia.'
Prandaj u përbetova në hidhërimin tim: *
'Askurrë s'do të hyjnë në prehjen time!'”
Ant. Para fytyrës së Zotit t’i këndojmë lavdisë së tij.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Para fytyrës së Zotit t’i këndojmë lavdisë së tij.
Lavdet e mëngjesit
V. Hyj, më eja në ndihmë!
P. O Zot, shpejto të më ndihmosh!
V. Lavdi Atit e Birit e Shpirtit Shenjt,
P. si ka qenë në fillim,
ashtu tash e përgjithmonë e jetës. Amen. (K. P. aleluja).
Kjo hyrje nuk përdoret kur Lavdet fillojnë me Ftesë.
Hiri i lavdisë atërore,
që nxjerr dritën nga drita,
dritë drite e gurrë ndriçimi,
ditë që i jep ndriçim ditës.
Diell i vërtetë, paprerë
zbrit me ndriçim shkëlqyes,
dhe zbraz ndër shqisat tona
dritën e Shpirtit Shenjt.
Atit me kushte i lutemi,
Atit të lavdisë s’amshuar,
Atit që jep hir të fuqishëm,
të shporrë fajet e rreme.
Të bëjë veprime të shkathta,
t’ia çmprehë dhëmbin smirëziut,
të përkrahë në raste të vështira
t’i japë për të kryer ndere.
Të drejtojë mendje e të sillet
me trup besnik të pastër;
të shkëlqejë me ngrohtësi feja,
të mos njohë helme mashtrimi.
Ushqimi ynë të jetë Krishti,
dhe pija jonë të jetë Feja;
të gëzueshëm të pimë t’urtën
dehje të Shpirtit Shenjt.
Kjo ditë të kalojë e këndshme;
si ag drite qoftë
pastria të jetë si agimi, feja si mesi i ditës,
errësirë të mos dijë mendja.
Agimi udhëheq udhëtimet:
Agimi të priftë përpara,
në Atin i tërë Biri,
dhe Ati i tërë në Fjalën. Amen.
Ose një himn tjetër, apo një këngë e miratuar nga autoritetet kishtare.
Ant. 1 Që në mëngjes, o Zot, dëgjoje zërin tim!
Psalmi 5 (2-10. 12-13) Urata e mëngjesit
Ata që e pranuan Fjalën dhe bëhen banesa e tij do të galdojnë përgjithmonë.
Dëgjoji, o Zot, fjalët e mia, *
kuptoje dënesën time!
Dëgjoje zërin e britmës sime, *
Mbreti im e Hyji im!
Sepse ty ta drejtoj uratën time, o Zot, †
qysh në mëngjes e dëgjon zërin tim: *
që në mëngjes dal para teje e pres.
Sepse ti nuk je Hyj që i pëlqen padrejtësia, †
pranë teje nuk ka vend bakeqi, *
bakëqijtë nuk mund të qëndrojnë përpara syve të tu.
Ti i urren të gjithë ata që bëjnë keq, †
i zhbin të gjithë ata që flasin rrena; *
Të neverit gjakësori e tradhtari.
E unë në saje të dashurisë sate të madhe †
do të hyj në Shtëpinë tënde, *
do të bie përmbys me nderim
në Tempullin tënd të shenjtë.
O Zot, më prij udhës së drejtësisë sate,
për shkak të armiqve të mi, *
rrafsho para meje udhën tënde.
Jo, s’ka çiltëri në gojën e tyre, *
humnerë është zemra e tyre,
gurmazi i tyre varr i hapur *
e me gjuhë përkëdhelin.
Le të gëzohen ata që mbështeten në ty, *
le të galdojnë përherë e në amshim! –
Mbroji dhe le të gëzohen në ty *
të gjithë ata që e duan Emrin tënd!
Sepse ti, o Zot, e bekon të drejtin, *
si shqyt e mbron dashamirësia jote.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 1 Që në mëngjes, o Zot, dëgjoje zërin tim!
Ant. 2 E lavdërojmë Emrin tënd të shenjtë, o Zot, Hyji ynë.
Kënga 1 Kro 29, 10-13. Vetëm Hyjit i qoftë nderi dhe lavdia
Qoftë bekuar Hyji. Ati i Zotit tonë Jezu Krishtit (Ef 1, 3).
I bekuar je, o Zot,
Hyji i Izraelit, atit tonë, *
prej amshimit e në amshim!
Ty, o Zot, të përket madhëria e pushteti, †
lavdia, shkëlqimi dhe lartmadhëria! *
Sepse gjithçka në qiell e në tokë, janë të tuat!
Ty, o Zot, të përket mbretëria, *
ti lartësohesh si kryet përmbi çdo gjë!
Prej teje vjen pasuria dhe lavdia, *
ti zotëron me gjithçka!
Në dorën tënde fuqia dhe pushteti, *
Ti mund të bësh gjithçka
të madhërishme e të qëndrueshme!
Prandaj, o Hyji ynë, po të madhërojmë *
e po e lavdërojmë Emrin tënd të madhërishëm!
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 2 E lavdërojmë Emrin tënd të shenjtë, o Zot, Hyji ynë.
Ant. 3 Lavdi Zotit në tempullin e tij: ai mbretëron përgjithmonë.
Psalmi 29 /28/ (1-8. 10-11. 9c) Zoti e shpall me madhështi fjalën e vet.
Dhe ja, një zë që vinte nga qielli, tha: »Ky është Biri im i dashur« (Mt 3, 17).
Jepni Zotit, o bijtë e Hyjit, *
jepni Zotit lavdinë e fuqinë!
Jepni Zotit nderin e Emrit të tij, *
adhurojeni Zotin në shkëlqimin e shenjtë!
Dëgjo! Zoti gjëmon mbi ujëra, †
Hyji i madhërishëm gjëmon, *
Zoti bubullin mbi ujëra të mëdha!
Dëgjo! Zoti gjëmon fuqishëm, *
Zoti gjëmon me madhëri!
Ja, zëri i Zotit i copëton cedrat, *
Zoti i thërrmon cedrat e Libanit!
E bën të kërcejë si viç Libanin, *
Sarionin si kotorr bizoni!
Ja, zëri i Zotit - përhap flakë zjarri, †
ja, zëri i Zotit e godet shkretëtirën, *
e godet Zoti shkretëtirën Kades!
Zoti e ka fronin përmbi përmbytje, *
Zoti mbretëron përgjithmonë e jetës!
Zoti i jep fuqi popullit të vet, *
Zoti e bekon popullin e vet me paqe.
Ndërkaq në Tempullin e tij *
të gjithë thonë: »Lavdi!«
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 3 Lavdi Zotit në tempullin e tij: ai mbretëron përgjithmonë.
Leximi i shkurtër 2 Sel 3, 10b-13
Kush nuk do të punojë, as mos të hajë! Tani po dëgjojmë se disa ndër ju jetojnë në papunësi: nuk punojnë asgjë dhe e humbin kot kohën. Të tillëve ju urdhërojmë dhe u qesim be Zotin Jezu Krisht, le të punojnë në paqe dhe le ta hanë bukën që e fitojnë vetë! Dhe ju, o vëllezër, mos u mërzitni duke bërë vepra të mira!
Përgjigjja e shkurtër
C Që nga fillimi e deri në amshim,
* qoftë bekuar Zoti!
Që nga fillimi e deri në amshim, qoftë bekuar Zoti!
D Vetëm ai bëri mrekulli:
qoftë bekuar Zoti!
Lavdi Atit e Birit e Shpirtit Shenjt.
Që nga fillimi e deri në amshim, qoftë bekuar Zoti!
Kënga ungjillore (Benedictus Lk 1, 68-79)
Ant. Qoftë bekuar Zoti, Hyji ynë!
Qoftë bekuar Zoti, Hyji i Izraelit, *
që e pa dhe e shpërbleu popullin e vet!
Ai e ngriti Shpëtimtarin tonë *
në shtëpinë e Davidit, shërbëtorit të vet,
sikurse premtoi kaherë *
me gojë të profetëve të tij të shenjtë:
se do të na shpëtojë prej armiqve tanë *
dhe prej dorës së të gjithë atyre që na urrejnë;
se do të bëjë mirësinë që ua premtoi etërve tanë *
e do t'i bjerë në mend Besëlidhja e tij e shenjtë
e betimi që bëri në të mirën e Abrahamit, atit tonë *
se do të na e bëjë të mundshme t'i shërbejmë pa frikë,
të çliruar nga duart e armikut *
në shenjtëri e drejtësi para tij
për çdo ditë të jetës sonë.
E ti, o djalosh, do të quhesh profet i të Tejetlartit, *
sepse do të shkosh përpara Zotit
për t'ia përgatitur udhët,
për ta vënë në dijeni popullin e tij *
se Hyji do ta shëlbojë duke ia falur mëkatet e tija,
në saje të zemrës së dashur të Hyjit tonë *
që do të na e dërgojë në pasi prej qiellit Diellin,
për të shndritur ata që gjenden në errësirë
dhe në hijen e vdekjes, *
për t'i drejtuar hapat tanë në udhën e paqes.“
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Qoftë bekuar Zoti, Hyji ynë!
Lutjet e besimtarëve
Ta madhërojmë Krishtin, plot me mirësi dhe Shpirt Shenjt dhe t’i drejtohemi plot me shpresë:
Jepna, o Zot, Shpirtin tënd!
Qoftë kjo ditë për ne e këndshme, e qetë dhe e papërlyer
— kështu që sonte të mund të të lavdërojmë Ty me zemër të gëzueshme dhe të pastër.
Le të na shndrisë sot drita jote
— dhe urtia jote i frymëzoftë projektet dhe veprat tona.
Na e trego fytyrën tënde, që në paqe të veprojmë mirë
— dhe na ruaj sot me të djathtën tënde të fuqishme.
Shikoji të gjithë ata që u porositën në lutjet tona
— dhe shpërbleji me çdo të mirë shpirtërore dhe trupore.
Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.
Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.
Lutja
Veprat tona frymëzoji, o Zot, dhe përcilli me ndihmën tënde, që çdo veprim i ynë të zërë fill prej Teje dhe në Ty të përmbushet. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve. Amen.
Përfundimi i Orës, sikurse në Shërbesën e rëndomtë.