Lavdet e mëngjesit

Java e dytë e kreshmëve – e martë

 

Lavdet e mëngjesit

 

Ftesa

 

D O Zot, hapi buzët e mia.

C Dhe goja ime do t’i kumtojë lavdet e tua.

 

Ant. Ejani ta adhurojmë Krishtin Zot: ai për ne vuajti tundimin dhe vdekjen.

 

Ose:

 

Ant. Dëgjojeni sot zërin e Zotit: mos e bëni zemrën tuaj gur.

 

   Psalmi 95 /94/ Grishje për të lavdëruar Hyjin

 

   Nxitni njëri-tjetrin dita-ditës deri sa të zgjasë kjo “Sot” (Heb 3, 13).

 

Ejani t'i këndojmë Zotit, *

   t'i brohorasim Hyjit, Shëlbuesit tonë.

T'i dalim para me falënderje, *

   t'i këndojmë këngë hareje!

 

Ant. Ejani ta adhurojmë Krishtin Zot: ai për ne vuajti tundimin dhe vdekjen.

 

Ose:

 

Ant. Dëgjojeni sot zërin e Zotit: mos e bëni zemrën tuaj gur.

 

Sepse Hyj i madhërishëm është Zoti, *

   Mbret i madhërueshëm mbi të gjithë zotat!

Sepse në dorën e tij janë thellësitë e tokës, *

   të tijat janë edhe majat e maleve,

 

i tiji është deti ‑ ai e krijoi, *

   duart e tija e formuan tokën.

 

Ant. Ejani ta adhurojmë Krishtin Zot: ai për ne vuajti tundimin dhe vdekjen.

 

Ose:

 

Ant. Dëgjojeni sot zërin e Zotit: mos e bëni zemrën tuaj gur.

 

Ejani ta adhurojmë, të biem përmbys para tij, *

   të biem në gjunjë para Zotit që na krijoi!

Sepse ai është Hyji ynë,

   ne jemi populli i kullosës së tij, *

   grigja që ai ruan.

 

Ant. Ejani ta adhurojmë Krishtin Zot: ai për ne vuajti tundimin dhe vdekjen.

 

Ose:

 

Ant. Dëgjojeni sot zërin e Zotit: mos e bëni zemrën tuaj gur.

 

Oh sikur ta ndienit sot zërin e tij: *

   “Mos e bëni zemrën tuaj gur porsi në Meribë,

porsi në ditë të Masës në shkretëtirë, †

   kur etërit tuaj më vunë në sprovë: *

   më provuan megjithëse i kishin parë veprat e mia.

 

Ant. Ejani ta adhurojmë Krishtin Zot: ai për ne vuajti tundimin dhe vdekjen.

 

Ose:

 

Ant. Dëgjojeni sot zërin e Zotit: mos e bëni zemrën tuaj gur.

 

Dyzet vjet më mërziti ajo brezni †

   e thashë: 'Popull zemërluhatshëm është ky, *

   që s'i njeh udhët e mia.'

Prandaj u përbetova në hidhërimin tim: *

   'Askurrë s'do të hyjnë në prehjen time!'”

 

Ant. Ejani ta adhurojmë Krishtin Zot: ai për ne vuajti tundimin dhe vdekjen.

 

Ose:

 

Ant. Dëgjojeni sot zërin e Zotit: mos e bëni zemrën tuaj gur.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. Ejani ta adhurojmë Krishtin Zot: ai për ne vuajti tundimin dhe vdekjen.

 

Ose:

 

Ant. Dëgjojeni sot zërin e Zotit: mos e bëni zemrën tuaj gur.

 

Java e dytë e kreshmëve – e martë

 

Lavdet e mëngjesit

 

V. Hyj, më eja në ndihmë!

P. O Zot, shpejto të më ndihmosh!

 

V. Lavdi Atit e Birit e Shpirtit Shenjt,

P. si ka qenë në fillim,

   ashtu tash e përgjithmonë e jetës. Amen.

 

   Kjo hyrje nuk përdoret kur Lavdet fillojnë me Ftesë.

 

   Himni

 

   Tashmë, Krisht, diell drejtësie,

   të çahet errësira e mendjes,

   të kthejë drita e virtytshme,

   që mbi tokë përtërin ditën.

 

   Duke dhënë kohën e duhur,

   jepi zemrës ti pendimin,

   pasi mirësia jote

   i dhuron edhe mëshirimin.

 

   Një farë pendese jepna,

   të durojmë për zbutje fajesh,

   sado që janë të mëdhaja,

   më e madhe është mëshira jote.

 

   Po afrohet dita jote,

   me të cilën ndrit çdo gjë,

   me hirin tënd hyjnor

   të gëzohemi të përtërirë.

 

   Ty gjithësia e sendeve,

   të adhuroftë, Trini e mëshirshme.

   Të përtërirë me anë të faljes,

   të këndojmë një këngë të re. Amen.

 

Ant. 1 Dërgoje të vërtetën tënde dhe të dritën tënde: le të më prijnë në malin tënd të shenjtë.

 

   Psalmi 43 /42/ (1-5) Dëshira për Shenjtëroren e Hyjit

 

   Unë ‑ drita ‑ erdha në botë (Gjn 12, 46).

 

Ma jep të drejtën, o Hyj, †

   mbroje çështjen time prej gjindes së pafe, *

   më shpëto prej njeriut të keq e dinak.

 

Sepse ti je Hyji i strehimit tim, †

   përse më dëbon, *

   përse të endem i trishtuar,

   i shkelur prej armiqve?

 

Dërgoje dritën tënde dhe të vërtetën tënde: †

   ato le të më prijnë, le të më përcjellin *

   në malin tënd të shenjtë, në Tendën tënde.

 

Atëherë do të hyj te altari i Hyjit, *

   tek Hyji i gëzimit të galdimit tim.

Do të galdoj, do të të këndoj me harpë, *

   ty, o Hyj, Hyji im!

 

Përse, o shpirti im, lëngon në trishtim? *

   Përse gjëmon në mua?

Shpreso në Hyjin, prapë do ta lëvdoj, *

   Shëlbuesin tim, Hyjin tim.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 1 Dërgoje të vërtetën tënde dhe dritën tënde: le të më prijnë në malin tënd të shenjtë.

 

Ant. 2 Për çdo ditë të jetës, na shpëto, o Zot.

 

   Kënga Is 38, 10-14. 17-20 Ankthet e të braktisurit, gëzimet e të shëruarit

 

   Isha i vdekur dhe, ja, jam i gjallë... unë kam pushtet përmbi Vdekjen (Zb 1, 17-18).

 

Unë thosha: Në gjysmën e ditëve të mia †

   unë po shkoj në dyert e Nëntokës; *

   u luta për tepricën e viteve të mia.

 

Thashë: S'do ta shoh më Zotin Hyj *

   në tokën e të gjallëve,

nuk do të shoh më askënd *

   ndër banorët e kësaj bote.

 

Tenda ime qe zhgrehur e u hodh larg meje *

   porsi tenda e barinjve,

 

si vektari ma mbështolli jetën, †

   e prej shulit po më këput. *

   Prej mëngjesit deri në mbrëmje po më jep fund!

 

Përmbys klith deri në mëngjes, *

   porsi luani kështu m'i copëton të gjitha eshtrat:

Cicërij si dallëndyshja, *

   gjëmoj porsi pëllumbesha;

 

sytë m'u këputën *

   lart duke shikuar!

Ti shpëtove shpirtin tim *

   nga gropa e asgjësimit,

sepse i hodhe pas shpinës sate *

   të gjitha mëkatet e mia.

 

Sepse banesa e të vdekurve nuk të lavdëron, *

   Vdekja ty lavde s'të këndon;

ata që zbresin në gropë *

   nuk shpresojnë më në besnikërinë tënde.

 

I gjalli, vetëm i gjalli, të lavdëron *

   siç po bëj edhe unë sot;

babai ua mëson fëmijëve *

   besnikërinë tënde.

 

Më shpëto, o Zot, †

   e ne do të të këndojmë me harpë *

   në të gjitha ditët e jetës sonë

   në Shtëpinë e Zotit.«

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 2 Për çdo ditë të jetës, na shpëto, o Zot.

 

Ant. 3 Ty, o Hyj, të përket himni në Sion. †

 

   Psalmi 65 /64/ (2-14) Gëzimi i krijesave të Hyjit për provaninë e tij

 

   Hyji i gjallë... ju dërgoi nga qielli shi e stinë të begatshme, ju mbushi me ushqime e zemrat tuaja i mbushi me gëzime (Krh. Vap 14, 15. 17).

 

Ty, o Hyj, të përket himni në Sion, *

† për nderin tënd u plotësoftë kushti në Jerusalem!

Tek ti që i dëgjon uratat *

   do të vijë çdo njeri i ngarkuar me mëkate.

 

Fajet tona janë më të forta se ne, *

   por ti i zhbin mëkatet tona.

 

Lum ai që ti zgjodhe dhe e more ngjat vetes: *

   ai banon në Shtëpinë tënde.

 

Do të ngihemi me të mirat e Shtëpisë sate, *

   me shenjtërinë e Tempullit tënd.

 

Ti na ndihmon me mrekullitë e drejtësisë sate, †

   o Hyj i shpëtimit tonë, *

   shpresa e mbarë skajeve të tokës e të detit të largët.

 

Ti i forcon malet me fuqinë tënde, *

   i ngjeshur me pushtet,

 

ti qetëson tërbimin e deteve, *

   gjëmën e valëve të tija dhe rrëmujën e popujve.

 

Edhe ata që jetojnë në skajet e botës †

   mbesin të habitur nga mrekullitë e tua, *

   me gëzim i mbush dyert e mëngjesit e të mbrëmjes!

 

Ti kujdesesh për tokën dhe e ujit, *

   e ngarkon me prodhime të begatshme.

 

Lumi i Hyjit është plot me ujë: *

   ti bën të rriten drithëra për njerëz!

 

Tokën ti kështu e përgatit: †

   hullitë ia lag, bucat ia imtëson, *

   me shi e zbrun, të mbjellat ia bekon.

 

E kurorëzon vitin me mirësinë tënde, *

   gjurmëve të tua rrjedh begatia,

 

kullotat e shkretëtirës rijnë njomësi, *

   mballesat bregoreve ngjeshën me hare,

 

livadhet janë të veshura me dhen, †

   luginat mbulohen me drithëra: *

   gjithkah këngë e brohoritje me hare!

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 3 Ty, o Hyj, të përket himni në Sion.

 

   Leximi i shkurtër Sir 4, 1-5

 

   Mos ia moho lëmoshën skamnorit dhe sytë e tu mos i ik nga i vobekti. Mos e trishto atë që ka uri dhe mos e ngacmo skamnorin në skamjen e tij. Mos e mundo zemrën e skamnorit, mos vono t'ia japësh ndihmën atij që është ngushtë. Mos e përbuz lutjen e nevojtarit, e mos e largo fytyrën prej skamnorit. Mos i largo sytë e tu prej skamnorit për shkak të hidhërimit, mos i lër vend të mallkojë përmbas.

 

   Përgjigjja e shkurtër

 

   C Lum njeriu që kujdeset për të dobëtin: * Zoti do të kujdeset për të.

   Lum njeriu që kujdeset për të dobëtin: Zoti do të kujdeset për të.

   D Do të bëjë që të jetojë i lumtur mbi tokë: Zoti do të kujdeset për të.

   Lavdi Atit e Birit e Shpirtit Shenjt.

   Lum njeriu që kujdeset për të dobëtin: Zoti do të kujdeset për të.

 

   Kënga ungjillore (Benedictus Lk 1, 68-79)

 

Ant. Vetëm një është Mësuesi juaj, që është në qiell: Krishti Zot.

 

Qoftë bekuar Zoti, Hyji i Izraelit, *

   që e pa dhe e shpërbleu popullin e vet!

 

Ai e ngriti Shpëtimtarin tonë *

   në shtëpinë e Davidit, shërbëtorit të vet,

 

sikurse premtoi kaherë *

   me gojë të profetëve të tij të shenjtë:

 

se do të na shpëtojë prej armiqve tanë *

   dhe prej dorës së të gjithë atyre që na urrejnë;

 

se do të bëjë mirësinë që ua premtoi etërve tanë *

   e do t'i bjerë në mend Besëlidhja e tij e shenjtë

 

e betimi që bëri në të mirën e Abrahamit, atit tonë *

   se do të na e bëjë të mundshme t'i shërbejmë pa frikë,

 

të çliruar nga duart e armikut *

   në shenjtëri e drejtësi para tij

   për çdo ditë të jetës sonë.

 

E ti, o djalosh, do të quhesh profet i të Tejetlartit, *

   sepse do të shkosh përpara Zotit

   për t'ia përgatitur udhët,

 

për ta vënë në dijeni popullin e tij *

   se Hyji do ta shëlbojë duke ia falur mëkatet e tija,

 

në saje të zemrës së dashur të Hyjit tonë *

   që do të na e dërgojë në pasi prej qiellit Diellin,

 

për të shndritur ata që gjenden në errësirë

   dhe në hijen e vdekjes, *

   për t'i drejtuar hapat tanë në udhën e paqes.“

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. Vetëm një është Mësuesi juaj, që është në qiell: Krishti Zot.

 

   Lutjet e besimtarëve

 

Hyji Atë na e dha Birin e vet, Fjalën e cila u bë njeri, që të na bëhet ushqim dhe jetë. Atij t'i falënderohemi dhe me lutje t'i themi:

 

   Fjala e Krishtit banoftë ndër ne.

 

Na lejo o Zot, që me dëgjimin e shpeshtë të fjalës sate ta përjetojmë këtë kohë të kreshmëve

— që ta nderojmë sa më me përkushtim Krishtin për Pashkët e sivjetshme.

Shpirti yt le të na mësojë, o Zot

— që ata që bredhin dhe ata që dyshojnë t'i nxisim për vepra të mira.

Na ndihmo, o Zot, që sa më thellë të na përshkojë misteri i Krishtit

— dhe me jetën tonë ta dëftojmë sa më mirë.

Pastroje dhe ripërtërije Kishën tënde në këtë kohë shëlbimprurëse

— që të japë sa më shumë dëshmi feje dhe dashurie.

 

   Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.

   Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.

 

   Lutja

 

   Ruaje, po të lutemi, o Zot, Kishën tënde me mirësi të vazhdueshme, dhe, pasi njeriu pa ty është i luhatshëm, ruaje gjithmonë me ndihmën tënde nga rreziqet, dhe drejtoje kah shëlbimi. Nëpër Zotin.

 

   Përfundimi i Orës, sikurse në Shërbesën e rëndomtë.