Lavdet e mëngjesit

Java e tretë e kreshmëve – e hënë

 

Lavdet e mëngjesit

 

Ftesa

 

D O Zot, hapi buzët e mia.

C Dhe goja ime do t’i kumtojë lavdet e tua.

 

Ant. Ejani ta adhurojmë Krishtin Zot: ai për ne vuajti tundimin dhe vdekjen.

 

Ose:

 

Ant. Dëgjojeni sot zërin e Zotit: mos e bëni zemrën tuaj gur.

 

   Psalmi 95 /94/ Grishje për të lavdëruar Hyjin

 

   Nxitni njëri-tjetrin dita-ditës deri sa të zgjasë kjo “Sot” (Heb 3, 13).

 

Ejani t'i këndojmë Zotit, *

   t'i brohorasim Hyjit, Shëlbuesit tonë.

T'i dalim para me falënderje, *

   t'i këndojmë këngë hareje!

 

Ant. Ejani ta adhurojmë Krishtin Zot: ai për ne vuajti tundimin dhe vdekjen.

 

Ose:

 

Ant. Dëgjojeni sot zërin e Zotit: mos e bëni zemrën tuaj gur.

 

Sepse Hyj i madhërishëm është Zoti, *

   Mbret i madhërueshëm mbi të gjithë zotat!

Sepse në dorën e tij janë thellësitë e tokës, *

   të tijat janë edhe majat e maleve,

 

i tiji është deti ‑ ai e krijoi, *

   duart e tija e formuan tokën.

 

Ant. Ejani ta adhurojmë Krishtin Zot: ai për ne vuajti tundimin dhe vdekjen.

 

Ose:

 

Ant. Dëgjojeni sot zërin e Zotit: mos e bëni zemrën tuaj gur.

 

Ejani ta adhurojmë, të biem përmbys para tij, *

   të biem në gjunjë para Zotit që na krijoi!

Sepse ai është Hyji ynë,

   ne jemi populli i kullosës së tij, *

   grigja që ai ruan.

 

Ant. Ejani ta adhurojmë Krishtin Zot: ai për ne vuajti tundimin dhe vdekjen.

 

Ose:

 

Ant. Dëgjojeni sot zërin e Zotit: mos e bëni zemrën tuaj gur.

 

Oh sikur ta ndienit sot zërin e tij: *

   “Mos e bëni zemrën tuaj gur porsi në Meribë,

porsi në ditë të Masës në shkretëtirë, †

   kur etërit tuaj më vunë në sprovë: *

   më provuan megjithëse i kishin parë veprat e mia.

 

Ant. Ejani ta adhurojmë Krishtin Zot: ai për ne vuajti tundimin dhe vdekjen.

 

Ose:

 

Ant. Dëgjojeni sot zërin e Zotit: mos e bëni zemrën tuaj gur.

 

Dyzet vjet më mërziti ajo brezni †

   e thashë: 'Popull zemërluhatshëm është ky, *

   që s'i njeh udhët e mia.'

Prandaj u përbetova në hidhërimin tim: *

   'Askurrë s'do të hyjnë në prehjen time!'”

 

Ant. Ejani ta adhurojmë Krishtin Zot: ai për ne vuajti tundimin dhe vdekjen.

 

Ose:

 

Ant. Dëgjojeni sot zërin e Zotit: mos e bëni zemrën tuaj gur.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. Ejani ta adhurojmë Krishtin Zot: ai për ne vuajti tundimin dhe vdekjen.

 

Ose:

 

Ant. Dëgjojeni sot zërin e Zotit: mos e bëni zemrën tuaj gur.

 

Java e tretë e kreshmëve – e hënë

 

Lavdet e mëngjesit

 

V. Hyj, më eja në ndihmë!

P. O Zot, shpejto të më ndihmosh!

 

V. Lavdi Atit e Birit e Shpirtit Shenjt,

P. si ka qenë në fillim,

   ashtu tash e përgjithmonë e jetës. Amen.

 

   Kjo hyrje nuk përdoret kur Lavdet fillojnë me Ftesë.

 

   Himni

 

   Tashmë, Krisht, diell drejtësie,

   të çahet errësira e mendjes,

   të kthejë drita e virtytshme,

   që mbi tokë përtërin ditën.

 

   Duke dhënë kohën e duhur,

   jepi zemrës ti pendimin,

   pasi mirësia jote

   i dhuron edhe mëshirimin.

 

   Një farë pendese jepna,

   të durojmë për zbutje fajesh,

   sado që janë të mëdhaja,

   më e madhe është mëshira jote.

 

   Po afrohet dita jote,

   me të cilën ndrit çdo gjë,

   me hirin tënd hyjnor

   të gëzohemi të përtërirë.

 

   Ty gjithësia e sendeve,

   t’adhuroftë, Trini e mëshirshme.

   Të përtërirë me anë të faljes,

   të këndojmë një këngë të re. Amen.

 

Ant. 1 Lum ata që banojnë në Shtëpinë tënde, o Zot!

 

   Psalmi 84 /83/ (2-13) Dëshira për tempullin e Zotit

 

   Nuk e kemi këtu qytetin e përhershëm, por kërkojmë atë të ardhshmin (Heb 13, 14).

Sa të dashura janë banesat e tua, *

   o Zoti i Rruzullimit!

Shpirti im shkrihet e meket *

   për pallatet e Zotit.

 

Zemra ime e trupi im *

   i brohoritin Hyjit të gjallë.

 

Edhe trumcaku e gjen bunin e vet *

   edhe turtulli çerdhen e vet

   ku i vë zogjtë e vet:

e unë altarët e tu, o Zoti i ushtrive, *

   Mbreti im e Hyji im!

 

Lum ata që banojnë në shtëpinë tënde: *

   do të të lavdërojnë për amshim.

Lum ai që në ty gjen forcën *

   dhe vendos për shtegtim të shenjtë.

Kur kalojnë nëpër luginën e thatë †

   e shndërrojnë në burim uji të gjallë, *

   sepse shiu i mëngjesit e vesh me bekime.

 

Shtegtojnë e shtegtojnë gjithnjë e më të kërthndeztë *

   derisa të shohin Hyjin e hyjnive në Sion.

 

O Zot, Hyji i ushtrive, dëgjo uratën time, *

   më vështro, o Hyji i Jakobit.

Shiko, o Hyj, Mbrojtësi ynë, *

   shikoje fytyrën e të shuguruarit tënd!

 

Vërtet, më e mirë është një ditë në Shtëpinë tënde *

   se të tjera me mijëra!

Parapëlqej të qëndroj te pragu i Shtëpisë së Hyjit tim, *

   më tepër se të banoj në tendat e mëkatarëve.

 

Sepse diell e shqyt është Zoti Hyj, *

   ai dhuron hirin e nderin.

Zoti nuk ua mohon të mirat *

   atyre që jetojnë të pafajshëm.

 

O Zot Sabaot, *

   lum njeriu që shpreson në ty!

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 1 Lum ata që banojnë në Shtëpinë tënde, o Zot!

 

Ant. 2 Ejani të ngjitemi në malin e Zotit!

 

   Kënga Is 2, 2-5 Qyteti i ri i Hyjit, qendra e mbarë njerëzimit

 

   Të gjitha kombet do të vijnë dhe do të adhurojnë para Teje (Zb 15, 4).

 

Do të ndodhë në kohën e ardhshme: †

   mali i Shtëpisë së Zotit *

   do të vendoset mbi majën e maleve,

 

e do të ngallitë përmbi kreshta *

   dhe të gjithë popujt do të ngarendin tek ai.

 

Tek ai do të shkojnë shumë popuj e do të thonë: †

   »Ejani të ngjitemi në malin e Zotit, *

   në Shtëpinë e Hyjit të Jakobit

 

që të na i mësojë udhët e tija *

   e të ecim shtigjeve të tija,«

sepse nga Sioni do të dalë Ligji *

   dhe nga Jerusalemi fjala e Zotit.

 

Ai do të jetë gjykatësi i popujve *

   dhe do t'i gjykojë fiset e shumta,

shpatat e veta do t'i kthejnë në plorë *

   e heshtat në drapërinj.

 

Një popull nuk do të ngritë shpatën

   kundër një populli tjetër *

   dhe më s'do të ushtrohen për luftë.

Eja, o shtëpia e Jakobit, *

   të ecim në dritën e Zotit!

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 2 Ejani të ngjitemi në malin e Zotit!

 

Ant. 3 Këndoni Zotit dhe bekojeni emrin e tij.

 

   Psalmi 96 /95/ (1-13) Zoti mbret dhe gjykatës i gjithësisë

 

   Këndonin një këngë të re para fronit të qengjit (Krh. Zb 14, 3).

 

Këndoni Zotit një këngë të re! *

   Mbarë toka le t’i këndojë Zotit!

Këndoni Zotit, bekojeni Emrin e tij, *

   shpalleni si një ditë për ditë shpëtimin e tij!

 

Kumtojeni ndër paganë lavdinë e tij, *

   ndër mbarë popujt mrekullitë e tija!

Sepse i madh është Zoti,

   - tejet i denjë për t’u lavdëruar, *

   më i përfrigueshëm se të gjitha hyjnitë!

 

Një asgjë janë të gjithë zotat e paganëve, *

   kurse Zoti e ka krijuar qiellin.

Para tij është shkëlqimi e lavdia, *

   në Shenjtëroren e tij pushteti e bukuria!

 

Jepni Zotit, familjet e popujve, †

   jepni Zotit nder e fuqi, *

   jepjani Zotit nderin e Emrit të tij!

 

Kushtoni dhurata e hyni në pallatet e tija, *

   adhuroni Zotin në stoli të shenjtë! –

Dridhu, o rruzull, para fytyrës së tij! *

   Shpallni ndër paganë: »Mbret është Zoti!«

 

Ai e mban botën që të mos shkatërrohet; *

   i gjykon popujt me drejtësi.

 

Galdo, o qiell! Gëzo, o tokë! †

   Le të buçasë deti me ç’ka në të, *

   le të gëzojë fusha me ç’gjendet në të,

 

le të gërthasin me hare lëndët e pyjeve, †

   para fytyrës së Zotit, sepse Ai po vjen, *

   sepse po vjen për të gjykuar tokën!

 

Do ta gjykojë botën me drejtësi, *

   do t’i gjykojë popujt me të vërtetën e tij.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 3 Këndoni Zotit dhe bekojeni emrin e tij.

 

   Leximi i shkurtër Dal 19, 4-6a

 

   Ju vetë patë se çfarë u bëra egjiptianëve, se si juve ju kam bartur mbi krahët e shqiponjave e ju kam sjellë deri tek unë. Prandaj, nëse do të ma dëgjoni fjalën e do ta mbani Besëlidhjen time, ju do të jeni ndër të gjithë popujt prona ime, ‑ imja është mbarë toka. Ju do të jeni për mua një mbretëri priftërinjsh, e një popull i shenjtë.

 

   Përgjigjja e shkurtër

 

   C Paqe e madhe * për ata që e duan ligjin tënd.

   Paqe e madhe për ata që e duan ligjin tënd.

   D Të ndjekësh urdhërimet e tua është gëzim i vërtetë

   për ata që e duan ligjin tënd.

   Lavdi Atit e Birit e Shpirtit Shenjt.

   Paqe e madhe për ata që e duan ligjin tënd.

 

   Kënga ungjillore (Benedictus Lk 1, 68-79)

 

Ant. Për të vërtetë po ju them: asnjë profet nuk është i mirëseardhur në vendin e vet.

 

Qoftë bekuar Zoti, Hyji i Izraelit, *

   që e pa dhe e shpërbleu popullin e vet!

 

Ai e ngriti Shpëtimtarin tonë *

   në shtëpinë e Davidit, shërbëtorit të vet,

 

sikurse premtoi kaherë *

   me gojë të profetëve të tij të shenjtë:

 

se do të na shpëtojë prej armiqve tanë *

   dhe prej dorës së të gjithë atyre që na urrejnë;

 

se do të bëjë mirësinë që ua premtoi etërve tanë *

   e do t'i bjerë në mend Besëlidhja e tij e shenjtë

 

e betimi që bëri në të mirën e Abrahamit, atit tonë *

   se do të na e bëjë të mundshme t'i shërbejmë pa frikë,

 

të çliruar nga duart e armikut *

   në shenjtëri e drejtësi para tij

   për çdo ditë të jetës sonë.

 

E ti, o djalosh, do të quhesh profet i të Tejetlartit, *

   sepse do të shkosh përpara Zotit

   për t'ia përgatitur udhët,

 

për ta vënë në dijeni popullin e tij *

   se Hyji do ta shëlbojë duke ia falur mëkatet e tija,

 

në saje të zemrës së dashur të Hyjit tonë *

   që do të na e dërgojë në pasi prej qiellit Diellin,

 

për të shndritur ata që gjenden në errësirë

   dhe në hijen e vdekjes, *

   për t'i drejtuar hapat tanë në udhën e paqes.“

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. Për të vërtetë po ju them: asnjë profet nuk është i mirëseardhur në vendin e vet.

 

   Lutjet e besimtarëve

 

Bekuar qoftë Jezu Krishti, Shëlbuesi ynë i cili me vdekjen e vet na hapi rrugën e shëlbimit. T'i lutemi"

 

   O Zot, udhëhiqe popullin tënd rrugës së drejtë.

 

O Zot, i mëshirshëm, me gëzim na e dhe një jetë të re,

— bëj që dita-ditës t'i ngjajmë sa më shumë fytyrës sate.

Bëj që ata që janë në vështirësi sot t'i gëzojmë me mirësinë tonë

— kështu që duke iu ndihmuar atyre, të të gjejmë Ty.

Na ndihmo që para Teje të veprojmë mirë, drejt dhe sinqerisht

— dhe gjithmonë të të kërkojmë me zemër të gatshme dhe bujare.

Na fal mirësisht për çdo gjë që kemi gabuar kundër unitetit të familjes sate

— dhe bëj që të jemi një shpirt dhe një zemër.

 

   Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.

   Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.

 

   Lutja

 

   Kishën tënde, o Zot, pastroje dhe forcoje me dashurinë tënde të vazhdueshme, dhe pasi s’mund të qëndrojë pa ndihmën tënde, mos ia mungo kurrë drejtimin. Nëpër Zotin.

 

Përfundimi i Orës, sikurse në Shërbesën e rëndomtë.