Lavdet e mëngjesit
JAva e dytë e Pashkëve - E MARTË
Lavdet e mëngjesit
Ftesa
D O Zot, hapi buzët e mia.
C Dhe goja ime do të kumtojë lavdet e tua.
Në shërbesën e së dielave dhe të ditëve të javës:
Ant. Zoti me të vërtetë u ngjall, aleluja.
Psalmi 95 /94/ Grishje për të lavdëruar Hyjin
Nxitni njëri-tjetrin dita-ditës deri sa të zgjasë kjo “Sot” (Heb 3, 13).
Ejani t'i këndojmë Zotit, *
t'i brohorasim Hyjit, Shëlbuesit tonë.
T'i dalim para me falënderje, *
t'i këndojmë këngë hareje!
Ant. Zoti me të vërtetë u ngjall, aleluja.
Sepse Hyj i madhërishëm është Zoti, *
Mbret i madhërueshëm mbi të gjithë zotat!
Sepse në dorën e tij janë thellësitë e tokës, *
të tijat janë edhe majat e maleve,
i tiji është deti ‑ ai e krijoi, *
duart e tija e formuan tokën.
Ant. Zoti me të vërtetë u ngjall, aleluja.
Ejani ta adhurojmë, të biem përmbys para tij, *
të biem në gjunjë para Zotit që na krijoi!
Sepse ai është Hyji ynë,
ne jemi populli i kullosës së tij, *
grigja që ai ruan.
Ant. Zoti me të vërtetë u ngjall, aleluja.
Oh sikur ta ndienit sot zërin e tij: *
“Mos e bëni zemrën tuaj gur porsi në Meribë,
porsi në ditë të Masës në shkretëtirë, †
kur etërit tuaj më vunë në sprovë: *
më provuan megjithëse i kishin parë veprat e mia.
Ant. Zoti me të vërtetë u ngjall, aleluja.
Dyzet vjet më mërziti ajo brezni †
e thashë: 'Popull zemërluhatshëm është ky, *
që s'i njeh udhët e mia.'
Prandaj u përbetova në hidhërimin tim: *
'Askurrë s'do të hyjnë në prehjen time!'”
Ant. Zoti me të vërtetë u ngjall, aleluja.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Zoti me të vërtetë u ngjall, aleluja.
JAva e dytë e Pashkëve - E MartË
Lavdet e mëngjesit
V. Hyj, më eja në ndihmë!
P. O Zot, shpejto të më ndihmosh!
V. Lavdi Atit e Birit e Shpirtit Shenjt,
P. si ka qenë në fillim,
ashtu tash e përgjithmonë e jetës. Amen. Aleluja!
Kjo hyrje nuk përdoret kur Lavdet fillojnë me Ftesë.
Himni
Kori i Jerusalemit të ri
himnin e ëmbël të këndojë,
e me gëzime të urta
festën e Pashkëve të kremtojë.
Ku Krishti, luan i pathyeshëm,
kundër të mposhturit dragua,
kur lëshon zë të fuqishëm,
shpirtrat nga vdekja ka shpëtuar.
Prenë që kish ngrënë i prapi
e kthen përsëri tartari;
liruar nga robëria,
turmat prapa Krishtit venë.
Ai ngadhënjen shkëlqyeshëm
dhe i denjë në tërë hapësirën,
e atdheun, qiellin e tokën
i shndërron në një shtet të vetëm.
Me këngë t’i lutemi atij
si ushtarë që i këndojnë mbretit,
që ai të na vendosë
në pallat të vet tërë dritë.
Të jetë gjithherë për mendjet,
o Krisht, gëzimi i Pashkës,
e ne me hir të rilindur
na mblidh në fitoret e tua.
Jezus, ty të qoftë lavdia,
që shndrit me mundje të vdekjes,
bashkë me Atin e me Shpirtin
në gjithë shekujt burim jete. Amen.
(Në vend të himnit mund të këndohet një këngë e miratuar nga autoritetet kishtare e që i përshtatet kohës)
Ant. 1 Ne erdhëm në malin e shenjtë, në qytetin e Hyjit të gjallë, aleluja.
Psalmi 43 /42/ (1-5)
Dëshira për Shenjtëroren e Hyjit
Unë ‑ drita ‑ erdha në botë (Gjn 12, 46).
Ma jep të drejtën, o Hyj, †
mbroje çështjen time prej gjindes së pafe, *
më shpëto prej njeriut të keq e dinak.
Sepse ti je Hyji i strehimit tim, †
përse më dëbon, *
përse të endem i trishtuar,
i shkelur prej armiqve?
Dërgoje dritën tënde dhe të vërtetën tënde: †
ato le të më prijnë, le të më përcjellin *
në malin tënd të shenjtë, në Tendën tënde.
Atëherë do të hyj te altari i Hyjit, *
tek Hyji i gëzimit të galdimit tim.
Do të galdoj, do të të këndoj me harpë, *
ty, o Hyj, Hyji im!
Përse, o shpirti im, lëngon në trishtim? *
Përse gjëmon në mua?
Shpreso në Hyjin, prapë do ta lëvdoj, *
Shëlbuesin tim, Hyjin tim.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 1 Ne erdhëm në malin e shenjtë, në qytetin e Hyjit të gjallë, aleluja.
Ant. 2 O Zot, ti e lirove jetën time nga varri i vdekjes, aleluja.
Kënga Is 38, 10-14. 17-20
Ankthet e të braktisurit, gëzimet e të shëruarit
Isha i vdekur dhe, ja, jam i gjallë... unë kam pushtet përmbi Vdekjen (Zb 1, 17-18).
Unë thosha: Në gjysmën e ditëve të mia †
unë po shkoj në dyert e Nëntokës; *
u luta për tepricën e viteve të mia.
Thashë: S'do ta shoh më Zotin Hyj *
në tokën e të gjallëve,
nuk do të shoh më askënd *
ndër banorët e kësaj bote.
Tenda ime qe zhgrehur e u hodh larg meje *
porsi tenda e barinjve,
si vektari ma mbështolli jetën, †
e prej shulit po më këput. *
Prej mëngjesit deri në mbrëmje po më jep fund!
Përmbys klith deri në mëngjes, *
porsi luani kështu m'i copëton të gjitha eshtrat:
Cicërij si dallëndyshja, *
gjëmoj porsi pëllumbesha;
sytë m'u këputën *
lart duke shikuar!
Ti shpëtove shpirtin tim *
nga gropa e asgjësimit,
sepse i hodhe pas shpinës sate *
të gjitha mëkatet e mia.
Sepse banesa e të vdekurve nuk të lavdëron, *
Vdekja ty lavde s'të këndon;
ata që zbresin në gropë *
nuk shpresojnë më në besnikërinë tënde.
I gjalli, vetëm i gjalli, të lavdëron *
siç po bëj edhe unë sot;
babai ua mëson fëmijëve *
besnikërinë tënde.
Më shpëto, o Zot, †
e ne do të të këndojmë me harpë *
në të gjitha ditët e jetës sonë
në Shtëpinë e Zotit.«
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 2 O Zot, ti e lirove jetën time nga varri i vdekjes, aleluja.
Ant. 3 Ti kujdesesh për tokën dhe e ujit, e mbush me fryte të begatshme, aleluja.
Psalmi 65 /64/ (2-14)
Gëzimi i krijesave të Hyjit për provaninë e tij
Hyji i gjallë... ju dërgoi nga qielli shi e stinë të begatshme, ju mbushi me ushqime e zemrat tuaja i mbushi me gëzime (Krh. Vap 14, 15. 17).
Ty, o Hyj, të përket himni në Sion, *
† për nderin tënd u plotësoftë kushti në Jerusalem!
Tek ti që i dëgjon uratat *
do të vijë çdo njeri i ngarkuar me mëkate.
Fajet tona janë më të forta se ne, *
por ti i zhbin mëkatet tona.
Lum ai që ti zgjodhe dhe e more ngjat vetes: *
ai banon në Shtëpinë tënde.
Do të ngihemi me të mirat e Shtëpisë sate, *
me shenjtërinë e Tempullit tënd.
Ti na ndihmon me mrekullitë e drejtësisë sate, †
o Hyj i shpëtimit tonë, *
shpresa e mbarë skajeve të tokës e të detit të largët.
Ti i forcon malet me fuqinë tënde, *
i ngjeshur me pushtet,
ti qetëson tërbimin e deteve, *
gjëmën e valëve të tija dhe rrëmujën e popujve.
Edhe ata që jetojnë në skajet e botës †
mbesin të habitur nga mrekullitë e tua, *
me gëzim i mbush dyert e mëngjesit e të mbrëmjes!
Ti kujdesesh për tokën dhe e ujit, *
e ngarkon me prodhime të begatshme.
Lumi i Hyjit është plot me ujë: *
ti bën të rriten drithëra për njerëz!
Tokën ti kështu e përgatit: †
hullitë ia lag, bucat ia imtëson, *
me shi e zbrun, të mbjellat ia bekon.
E kurorëzon vitin me mirësinë tënde, *
gjurmëve të tua rrjedh begatia,
kullotat e shkretëtirës rijnë njomësi, *
mballesat bregoreve ngjeshen me hare,
livadhet janë të veshura me dhen, †
luginat mbulohen me drithëra: *
gjithkah këngë e brohoritje me hare!
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 3 Ti kujdesesh për tokën dhe e ujit, e mbush me fryte të begatshme, aleluja.
Leximi i shkurtër Vap 2, 29-31
Vëllezër, më lejoni t'jua them haptas: Davidi patriark vdiq, u varros dhe varri i tij është edhe sot e kësaj dite ndër ne. Por ai, mbasi ishte profet dhe mbasi e dinte se Hyji, iu përbetua me betimin se një nga pasardhësit e tij do të hipte në fronin e tij, qysh më parë e parapa dhe paralajmëroi ngjalljen e Krishtit, kur tha: 'Nuk qe lënë në Nëntokë as trupi i tij nuk e provoi kalbëzimin.'
Përgjigjja e shkurtër
C Krishti u ngjall prej të vdekurve, * aleluja, aleluja.
Krishti u ngjall prej të vdekurve, aleluja, aleluja.
D Ai e shndriti botën e shëlbuar me gjakun e tij.
aleluja, aleluja.
Lavdi Atit e Birit e Shpirtit Shenjt.
Krishti u ngjall prej të vdekurve, aleluja, aleluja.
Kënga ungjillore (Benedictus Lk 1, 68-79)
Ant. Unë jam Alfa dhe Omega, i Pari dhe i Mbrami; unë rrënja e fisit të Davidit, ylli ndriçues i mëngjesit, aleluja.
Qoftë bekuar Zoti, Hyji i Izraelit, *
që e pa dhe e shpërbleu popullin e vet!
Ai e ngriti Shpëtimtarin tonë *
në shtëpinë e Davidit, shërbëtorit të vet,
sikurse premtoi kaherë *
me gojë të profetëve të tij të shenjtë:
se do të na shpëtojë prej armiqve tanë *
dhe prej dorës së të gjithë atyre që na urrejnë;
se do të bëjë mirësinë që ua premtoi etërve tanë *
e do t'i bjerë në mend Besëlidhja e tij e shenjtë
e betimi që bëri në të mirën e Abrahamit, atit tonë *
se do të na e bëjë të mundshme t'i shërbejmë pa frikë,
të çliruar nga duart e armikut *
në shenjtëri e drejtësi para tij
për çdo ditë të jetës sonë.
E ti, o djalosh, do të quhesh profet i të Tejetlartit, *
sepse do të shkosh përpara Zotit
për t'ia përgatitur udhët,
për ta vënë në dijeni popullin e tij *
se Hyji do ta shëlbojë duke ia falur mëkatet e tija,
në saje të zemrës së dashur të Hyjit tonë *
që do të na e dërgojë në pasi prej qiellit Diellin,
për të shndritur ata që gjenden në errësirë
dhe në hijen e vdekjes, *
për t'i drejtuar hapat tanë në udhën e paqes.“
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Unë jam Alfa dhe Omega, i Pari dhe i Mbrami; unë rrënja e fisit të Davidit, ylli ndriçues i mëngjesit, aleluja.
Lutjet e besimtarëve
Ta thërrasim në ndihmë Hyjin Atë, që nëpërmjet Krishtit, Qengjit të patëmetë, i shlyen mëkatet e botës. Me fe të gjallë t'i themi:
O Atë, burim jete, shëlboje popullin tënd.
O Atë, dëgjoje zërin e Birit tënd të kryqëzuar dhe të ringjallur për ne
— dëgjoje atë që ndërmjetëson për shpëtimin tonë.
Bëj që të jetojmë misterin e Pashkëve në tharmin e sinqeritetit dhe të vërtetës
— na liro prej tharmit të vjetër të së keqes dhe të egoizmit.
Bëj që të fitojmë mbi tundimin e smirës dhe të mosmarrëveshjes
— na bëj të ndjeshëm për nevojat e vëllezërve tanë.
Bëj që të zotërojë në mesin tonë shpirti i Ungjillit
— na drejto sot e gjithherë në rrugën e urdhërimeve të tua.
Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.
Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.
Lutja
O Hyj i gjithëpushtetshëm dhe i mirë, na jep aftësinë ta shpallim fuqinë e Krishtit të ngjallur, që, sikurse e morëm pengun e Shpirtit Shenjt, na i jep edhe të gjitha dhuratat. Nëpër Zotin.
Përfundimi i Orës, sikurse në Shërbesën e rëndomtë.