Lavdet e mëngjesit

5 shtator, Shën Nënë Tereza e Kalkutës, virgjër

 

Ftesa

 

D O Zot, hapi buzët e mia.

C Dhe goja ime do të kumtojë lavdet e tua.

 

Ant. Ejani ta adhurojmë Krishtin, gëzimin dhe kurorën e virgjërave.

 

Ose:

 

Ant. Ta adhurojmë Krishtin, Mbretin dhe Dhëndrin e virgjërave.

 

Psalmi 95 /94/

 

Grishje për të lavdëruar Hyjin

 

   Nxitni njëri-tjetrin dita-ditës deri sa të zgjasë kjo “Sot” (Heb 3, 13).

 

Ejani t'i këndojmë Zotit, *

   t'i brohorasim Hyjit, Shëlbuesit tonë.

T'i dalim para me falënderje, *

   t'i këndojmë këngë hareje!

 

Ant. Ejani ta adhurojmë Krishtin, gëzimin dhe kurorën e virgjërave.

 

Ose:

 

Ant. Ta adhurojmë Krishtin, Mbretin dhe Dhëndrin e virgjërave.

 

Sepse Hyj i madhërishëm është Zoti, *

   Mbret i madhërueshëm mbi të gjithë zotat!

Sepse në dorën e tij janë thellësitë e tokës, *

   të tijat janë edhe majat e maleve,

i tiji është deti ‑ ai e krijoi, *

   duart e tija e formuan tokën.

 

Ant. Ejani ta adhurojmë Krishtin, gëzimin dhe kurorën e virgjërave.

 

Ose:

 

Ant. Ta adhurojmë Krishtin, Mbretin dhe Dhëndrin e virgjërave.

 

Ejani ta adhurojmë, të biem përmbys para tij, *

   të biem në gjunjë para Zotit që na krijoi!

Sepse ai është Hyji ynë,

   ne jemi populli i kullosës së tij, *

   grigja që ai ruan.

 

Ant. Ejani ta adhurojmë Krishtin, gëzimin dhe kurorën e virgjërave.

 

Ose:

 

Ant. Ta adhurojmë Krishtin, Mbretin dhe Dhëndrin e virgjërave.

 

Oh sikur ta ndienit sot zërin e tij: *

   “Mos e bëni zemrën tuaj gur porsi në Meribë,

porsi në ditë të Masës në shkretëtirë, †

   kur etërit tuaj më vunë në sprovë: *

   më provuan megjithëse i kishin parë veprat e mia.

 

Ant. Ejani ta adhurojmë Krishtin, gëzimin dhe kurorën e virgjërave.

 

Ose:

 

Ant. Ta adhurojmë Krishtin, Mbretin dhe Dhëndrin e virgjërave.

 

Dyzet vjet më mërziti ajo brezni †

   e thashë: 'Popull zemërluhatshëm është ky, *

   që s'i njeh udhët e mia.'

Prandaj u përbetova në hidhërimin tim: *

   'Askurrë s'do të hyjnë në prehjen time!'”

 

Ant. Ejani ta adhurojmë Krishtin, gëzimin dhe kurorën e virgjërave.

 

Ose:

 

Ant. Ta adhurojmë Krishtin, Mbretin dhe Dhëndrin e virgjërave.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. Ejani ta adhurojmë Krishtin, gëzimin dhe kurorën e virgjërave.

 

Ose:

 

Ant. Ta adhurojmë Krishtin, Mbretin dhe Dhëndrin e virgjërave.

 

5 shtator, Shën Nënë Tereza e Kalkutës, virgjër

 

Lavdet e mëngjesit

 

V. Hyj, më eja në ndihmë!

P. O Zot, shpejto të më ndihmosh!

 

V. Lavdi Atit e Birit e Shpirtit Shenjt,

P. si ka qenë në fillim,

   ashtu tash e përgjithmonë e jetës. Amen. (K. P. aleluja).

 

   Kjo hyrje nuk përdoret kur Lavdet fillojnë me Ftesë.

 

   Himni

 

   Virgjër, pajisë me llambën

   për nusëri iu afrove

   mbretit t’amshuar, që lavde

   vallet qiellore i thurin.

 

   N’gosti nderuar me t’eprit,

   bashkë me dhëndrin qiellor,

   përqafë me lidhje t’pastër,

   shpërblim i pafajsisë.

 

   Na mëso këtë model jete,

   na ngroh me lutjen tënde

   për t’mundur t’i bëjmë ballë

   armikut tonë dinak.

 

   Shembull i jetës s’ virgjërave,

   Maria ta lusë t’Birin,

   që dora e saj ne ndihmën

   t’na japë në këtë mërgim.

 

   Hyjnisë i qoftë lavdia

   ndër shekujt e pasosur

   për ngadhënjim të virgjërës,

   që gëzon mbretërinë e Qiellit. Amen.

 

   Ose një himn tjetër, apo një këngë e miratuar nga autoritetet kishtare.

 

Ant. 1 Dashurinë tënde e shpallim në mëngjes, e gjatë natës besnikërinë tënde.

 

   Psalmi 92 /91/ (2-16) Lavdi Hyjit krijues

 

   Kush mbetet në mua e unë në të, ai jep shumë fryt, sepse pa mua s'mund të bëni asgjë (Gjn 15, 5).

 

Është punë e mirë ta lavdërosh Zotin, *

   ti këndohet Emrit tënd, o Zot i tejetlartë.

 

Të shpallim dashurinë në mëngjes *

   e gjatë natës bësnikërinë tënde,

me harpë dhjetëkordash e me lirë, *

   me këngë përcjellë me cetër.

 

Se ti, o Zot, më gëzove me veprat e tua, *

   kënaqem për veprat e duarve të tua.

 

Sa të madhërishme janë veprat e tua, o Zot, *

   sa të thella mendimet e tua!

Njeriu i pamend nuk i di, *

   dhe i marri nuk do t’i kuptojë.

 

Po edhe në mbifshin mëkatarët porsi bari, *

   e në lulëzofshin ata që bëjnë keq,

janë të caktuar për bjerrje të pasosur, *

   vetëm ti je i Tejetlartë për amshim, o Zot!

 

Sepse qe, o Zot, armiqtë e tu, †

   sepse qe, o Zot, armiqtë e tu do të birren, *

   do të shpërndahen të gjithë keqbërësit.

Ti ma rrite fuqinë porsi të buallit, *

   më shugurove me më të pastrin vaj.

 

Prej së larti i shikon syri im ata që më urrejnë, *

   veshët e mi pa tronditje i dëgjojnë kundërshtarët e mi.

 

I drejti lulëzon si palma, *

   rritet porsi cedri i Libanit.

Të mbjellë në Shtëpinë e Jakobit *

   lulëzojnë në banesat e Hyjit tonë.

 

Japin fruta edhe në pleqëri, *

   janë të kërthndeztë e plot shëndet,

për të shpallur se Zoti është i drejtë: *

   Qeta ime, në të cilin nuk ka të meta!

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 1 Dashurinë tënde e shpallim në mëngjes, e gjatë natës besnikërinë tënde.

 

Ant. 2 Dua ta shpall Emrin e Zotit: lavdërojeni Hyjin tonë!

 

   Kënga Lp 32, 1-12 Mirësitë e Hyjit për popullin e tij

 

   Sa herë desha t'i bashkoj fëmijët e tu sikurse klloçka i bashkon zogjtë e vet nën krahë (Mt 23, 37).

 

Dëgjo, qiell, se dua të flas, *

   dëgjo, tokë, fjalët e gojës sime!

 

Mësimi im le të rrjedhë si shiu, *

   si vesa të më rigojë biseda:

si pikërrina përmbi bar, *

   si shtrëngata mbi livadh!

 

Të Zotit Emrin do të lëvdoj: *

   lartësoni Hyjin tonë!

 

I qetë është Ai, në vepra i përsosur, *

   udhët e tij janë drejtësi:

Hyj besnik, pa asnjë të keqe, *

   krejt i drejtë e i patëmetë.

 

Kundër Tij mëkatuan të poshtrit, *

   bami i mbrapshtë e plot marrëzirë.

 

A kështu po ia kthen Zotit, *

   komb i marrë e i pakripë?

A s'është Ai, vallë, baba yt, *

   që të dha jetë e në jetë të mban?

 

Të të bien në mend kohërat e lashta, *

   të të bien në mend breznitë e shkuara!

Pyete babain tënd e do të të tregojë, *

   të parët e tu e do të të kallëzojnë!

 

Kur Zoti popujt i ndau, *

   kur i ndau bijtë e Adamit:

kufijtë popujve ua caktoi *

   sipas numrit të izraelitëve:

 

pronë e Zotit u bë populli i tij, *

   pjesë për vete mor Zoti Jakobin.

 

Gjetur e kish në një vend të shkretë, *

   në vend tmerrimi, ulërimi bishash.

E rrethoi, e përkujdesi, *

   e ruajti si bebën e syrit.

 

Si shqiponja që bën gjira *

   kur do zogjtë t'i mësojë të fluturojnë,

mbi ta i hap e i palon krahët: *

   ashtu e mori Izraelin,

   e mbarti mbi flatrat e veta.

 

Zoti vetëm e udhëhoqi, *

   tjetër zot nuk qe me Të.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 2 Dua ta shpall Emrin e Zotit: lavdërojeni Hyjin tonë!

 

Ant. 3 O Zot, Hyji ynë, sa i mrekullueshëm është Emri yt mbi mbarë dheun! †

 

   Psalmi 8 (2-10) Madhëria e Zotit dhe dinjiteti i njeriut

 

   Çdo gjë vuri nën këmbët e tija e Atë e vendosi mbi çdo gjë ‑ për Krye të Kishës (Ef 1, 22).

 

O Zot, Hyji ynë, †

   sa i mrekullueshëm është Emri yt mbi mbarë dheun! *

   † Me madhëri e tejkalon edhe qiellin!

 

Prej gojës së ferishteve e të foshnjave †

   lavdinë e bëre gati kundër armiqve *

   që t’i bësh të heshtin armiq e kryengritës.

 

Kur e sodis qiellin - veprën e gishtave të tu, *

   hënën e yjet që ti i vendose,

çka është atëherë njeriu që ta kujtosh, *

   biri i Adamit që të përkujdesesh për të?

 

E pra, e bëre pak më të vogël se engjëjt, *

   e kurorëzove me lavdi e shkëlqim,

i dhe pushtet mbi veprat e duarve të tua. *

   Gjithçka vure nën këmbët e tij:

 

delet e kafshët të gjitha, *

   për më tepër edhe egërsirat e fushës,

shpendët e ajrit dhe peshqit e detit, *

   të gjitha që përshkojnë udhët e detit!

 

O Zot, Hyji ynë, *

   sa i mrekullueshëm është Emri yt mbi mbarë dheun!

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 3 O Zot, Hyji ynë, sa i mrekullueshëm është Emri yt mbi mbarë dheun!

 

   Leximi i shkurtër Kk 8, 7

 

   Ujërat e mëdha dashurinë nuk mund ta ndalin, nuk e fikin as lumenjtë! Kush do të jepte gjithçka ka në shtëpinë e vet me qëllim të blejë dashurinë, do të përbuzej prej gjithkujt.

 

   Përgjigjja e shkurtër

 

   C Për ty tha zemra ime: * Fytyrën tënde unë kërkoj.

   Për ty tha zemra ime: Fytyrën tënde unë kërkoj.

   D Mos u fsheh para syve të mi, o Zot:

   Fytyrën tënde unë kërkoj.

   Lavdi Atit e Birit e Shpirtit Shenjt.

   Për ty tha zemra ime: Fytyrën tënde unë kërkoj.

 

Kënga ungjillore (Benedictus Lk 1, 68-79)

 

   Ant. Zemrën tënde ia dhe Krishtit, virgjër e mençur: tani jeton me të, e shkëlqyeshme si dielli në kuvendin e shenjtërve.

 

Qoftë bekuar Zoti, Hyji i Izraelit, *

   që e pa dhe e shpërbleu popullin e vet!

 

Ai e ngriti Shpëtimtarin tonë *

   në shtëpinë e Davidit, shërbëtorit të vet,

 

sikurse premtoi kaherë *

   me gojë të profetëve të tij të shenjtë:

 

se do të na shpëtojë prej armiqve tanë *

   dhe prej dorës së të gjithë atyre që na urrejnë;

se do të bëjë mirësinë që ua premtoi etërve tanë *

   e do t'i bjerë në mend Besëlidhja e tij e shenjtë

e betimi që bëri në të mirën e Abrahamit, atit tonë *

   se do të na e bëjë të mundshme t'i shërbejmë pa frikë,

 

të çliruar nga duart e armikut *

   në shenjtëri e drejtësi para tij

   për çdo ditë të jetës sonë.

 

E ti, o djalosh, do të quhesh profet i të Tejetlartit, *

   sepse do të shkosh përpara Zotit

   për t'ia përgatitur udhët,

 

për ta vënë në dijeni popullin e tij *

   se Hyji do ta shëlbojë duke ia falur mëkatet e tija,

 

në saje të zemrës së dashur të Hyjit tonë *

   që do të na e dërgojë në pasi prej qiellit Diellin,

 

për të shndërritur ata që gjenden në errësirë

   dhe në hijen e vdekjes, *

   për t'i drejtuar hapat tanë në udhën e paqes.“

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. Zemrën tënde ia dhe Krishtit, virgjër e mençur: tani jeton me të, e shkëlqyeshme si dielli në kuvendin e shenjtërve.

 

   Lutjet e besimtarëve

 

Krishtit, dhëndrit dhe kurorës së virgjërave, t’ia drejtojmë shprehjen e fesë sonë:

 

   O Jezus, shpërblimi dhe kurora e virgjërave, dëgjoje lutjen tonë.

 

O Krisht, i vetmi dhëndër i virgjërave të shenjta,

— bëj që askurrë asgjë të mos na ndajë prej miqësisë sate.

Ti, që e bëre Marinë, nënën tënde, mbretëreshë të virgjërave,

— nëpër ndërmjetësinë e saj bëj që të shërbejmë me besnikëri dhe me pastërti të zemrës.

Për hir të virgjërave që t’u kushtuan me zemër të plotë dhe të pandarë që të jenë të shenjta në trup dhe në shpirt,

— bëj që asgjë në botë të mos i shmangë prej rrugës që shpie tek ti.

O Zot Jezus, i pritur prej virgjërave të urta,

— bëj që gjithmonë të jemi të kujdesshëm e të zgjuar në pritjen e ardhjes sate.

Nëpër ndërmjetësinë e shën Nënë Terezës se Kalkutës, që e bëre të shkëlqejë në shenjtëri dhe në urti,

— na jep urtinë e ungjillit dhe pafajësinë e jetës.

 

   Ati ynë, që je në qiell, u shenjtëroft emri yt. Ardhtë mbretëria jote, u bëftë vullnesa jote, si në qiell ashtu në tokë.

   Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.

 

   Lutja

 

   O Hyj, ti e thirre shën Nënë Terezën e Kalkutës virgjër, t’i përgjigjej dashurisë së Birit tënd të etur në kryq me një dashuri të thellë për më të varfrit ndër të varfër; bëj po të lutemi, që me ndërmjetësinë e saj, t’i shërbejmë Krishtit në vëllezërit tanë të vuajtur. Nëpër Zotin.

 

Përfundimi i Orës sikurse në Shërbesën e rëndomtë.