Lavdet e mëngjesit

Java e tridhjetekatërtë e Kohës së rëndomtë

 

Jezu Krishti Mbreti i gjithësisë

 

Lavdet e mëngjesit

 

Ftesa

 

D O Zot, hapi buzët e mia.

C Dhe goja ime do të kumtojë lavdet e tua.

 

Në shërbesën e së dielave dhe të ditëve të javës:

 

   Ant. Ejani, ta adhurojmë një të vetmin Hyj të vërtetë: Atin, Birin dhe Shpirtin Shenjt.

 

   Psalmi 95 /94/ Grishje për të lavdëruar Hyjin

 

   Nxitni njëri-tjetrin dita-ditës deri sa të zgjasë kjo “Sot” (Heb 3, 13).

 

Ejani t'i këndojmë Zotit, *

   t'i brohorasim Hyjit, Shëlbuesit tonë.

T'i dalim para me falënderje, *

   t'i këndojmë këngë hareje!

 

   Ant. Ejani, ta adhurojmë një të vetmin Hyj të vërtetë: Atin, Birin dhe Shpirtin Shenjt.

 

Sepse Hyj i madhërishëm është Zoti, *

   Mbret i madhërueshëm mbi të gjithë zotat!

Sepse në dorën e tij janë thellësitë e tokës, *

   të tijat janë edhe majat e maleve,

i tiji është deti ‑ ai e krijoi, *

   duart e tija e formuan tokën.

 

   Ant. Ejani, ta adhurojmë një të vetmin Hyj të vërtetë: Atin, Birin dhe Shpirtin Shenjt.

 

Ejani ta adhurojmë, të biem përmbys para tij, *

   të biem në gjunjë para Zotit që na krijoi!

Sepse ai është Hyji ynë,

   ne jemi populli i kullosës së tij, *

   grigja që ai ruan.

 

   Ant. Ejani, ta adhurojmë një të vetmin Hyj të vërtetë: Atin, Birin dhe Shpirtin Shenjt.

 

Oh sikur ta ndienit sot zërin e tij: *

   “Mos e bëni zemrën tuaj gur porsi në Meribë,

porsi në ditë të Masës në shkretëtirë, †

   kur etërit tuaj më vunë në sprovë: *

   më provuan megjithëse i kishin parë veprat e mia.

 

   Ant. Ejani, ta adhurojmë një të vetmin Hyj të vërtetë: Atin, Birin dhe Shpirtin Shenjt.

 

Dyzet vjet më mërziti ajo brezni †

   e thashë: 'Popull zemërluhatshëm është ky, *

   që s'i njeh udhët e mia.'

Prandaj u përbetova në hidhërimin tim: *

   'Askurrë s'do të hyjnë në prehjen time!'”

 

   Ant. Ejani, ta adhurojmë një të vetmin Hyj të vërtetë: Atin, Birin dhe Shpirtin Shenjt.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

   Ant. Ejani, ta adhurojmë një të vetmin Hyj të vërtetë: Atin, Birin dhe Shpirtin Shenjt.

 

Lavdet e mëngjesit

 

V. Hyj, më eja në ndihmë!

P. O Zot, shpejto të më ndihmosh!

 

V. Lavdi Atit e Birit e Shpirtit Shenjt,

P. si ka qenë në fillim,

   ashtu tash e përgjithmonë e jetës. Amen. (K. P. aleluja).

 

   Kjo hyrje nuk përdoret kur Lavdet fillojnë me Ftesë.

 

   Himni

 

   O Krisht, zotërues hyjnor i të gjitha sendeve,

   për ty jehojnë ndër treme turma lutësish,

   në kohë vjetore kur prapë kthehen festat

   për t’i kremtuar.

 

   Vërtet ky vend ushton nga zërat në tremet

   e mbretit të madh e porta e qiellit të ndritshëm

   që i pret të gjithë që sulen për t’u futur

   n’atdheun e jetës.

 

   Kjo banesë shenjte mbështjell turmën tënde,

   që e përshpirtshme është plot me sakramente,

   për gjellë qiellore ushqen me dhurata

   të jetës s’amshueshme.

 

   Lutemi pra, o Zot, me fytyrë të qetë

   të bësh një shenjë duke drejtuar shërbëtorët,

   që me dashuri të lartë kremtojnë gëzimet

   e tempullit tënd.

 

   Lavd i njëllojtë madhëroftë Prindin e Epërm,

   dhe ty, Shëlbues, mbret i drejtë ndër shekuj;

   le të jehojë lavdia e Shpirtit Shenjt

   nëpër mbarë botën. Amen.

 

   Ose një këngë e miratuar nga autoritetet kishtare.

 

Ant. 1 Krishti, dielli i ri i botës, është mbret i dritës, i drejtësisë dhe i paqes.

 

   Psalmi 63 /62/ (2-9) Shpirti i etshëm për Hyjin

 

   Kisha ka etje për Shëlbuesin e vet, me dëshirë që të shuaj etjen në burimin e ujit të gjallë që rrjedh për jetën e pasosur (Krh. Cassiodoro).

 

O Hyj, Hyji im je ti, qysh në agim të kërkoj. *

   Ka etje për ty shpirti im,

ty të dëshiron mishi im, *

   si toka e shkretë, e thatë, e paujë,

 

kështu erdha në Shenjtëroren tënde *

   për ta parë fuqinë tënde e lavdinë tënde.

Sepse më e mirë është dashuria jote se jeta: *

   buzët e mia do të të lavdërojnë.

 

Kështu do të të bekoj në jetën time *

   e në Emrin tënd do t’i lartësoj duart e mia,

do të ngihem si në gosti të shkëlqyeshme, *

   me buzë të hareshme do të të lavdërojë goja ime.

 

Ty do të të kujtoj edhe në shtratin tim, *

   në përgim natën do të mendoj për ty,

sepse ti je bërë ndihma ime, *

   prandaj do të brohoris nën hijen e krahëve të tu!

 

Shpirti im u mbështet në ty, *

   e djathta jote më merr për dore.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 1 Krishti, dielli i ri i botës, është mbret i dritës, i drejtësisë dhe i paqes.

 

Ant. 2 Krishti është paqja, sundimi i tij deri në fund të botës.

 

   Kënga Dan 3, 57-88. 56 Çdo krijesë le ta lavdërojë Zotin

 

   Lavdërojeni Hyjin tonë, të gjithë shërbëtorët e tij! (Zb 19, 5).

 

Bekojeni, të gjitha veprat e Zotit, Zotin, *

   lëvdojeni dhe madhërojeni në shekuj!

Bekojeni, engjëjt e Zotit, Zotin, *

   Bekojeni, o qiej, Zotin.

 

Ujëra që jeni përmbi qiell, bekojeni Zotin, *

   të gjitha ju, o fuqi, bekojeni Zotin.

Diell e hënë, bekojeni Zotin, *

   yjet e qiellit, bekojeni Zotin.

 

Të gjitha shirat e vesa, bekojeni Zotin, *

   të gjitha ju, o erëra, bekojeni Zotin.

Zjarr e nxehtësi, bekojeni Zotin, *

   acar e vapë, bekojeni Zotin.

 

Vesë e brymë, bekojeni Zotin, *

   akull e cegëm, bekojeni Zotin.

Breshra e bora, bekojeni Zotin, *

   net e ditë, bekojeni Zotin.

 

Dritë e errësirë, bekojeni Zotin, *

   vetëtima e re, bekojeni Zotin.

Toka e bekoftë Zotin, *

   lëvdojeni e madhërojeni në shekuj!

 

Bekojeni, o male e kodra, Zotin, *

   bekojeni Zotin, të gjitha bimësitë e tokës. –

Dete e lumenj, bekojeni Zotin, *

   bekojeni, burime, Zotin.

 

Përbindësh e gjithçka lëviz në ujëra,

   bekojeni Zotin, *

   të gjithë shpendët e qiellit, bekojeni Zotin.

Kafshë të egra e shtëpiake, bekojeni Zotin, *

   bijtë e njeriut, bekojeni Zotin.

 

Bekoje, o Izrael, Zotin, *

   lëvdojeni e madhërojeni në shekuj!

Priftërinjtë e Zotit, bekojeni Zotin, *

   shërbëtorët e Zotit, bekojeni Zotin.

 

Shpirtra e frymë të të drejtëve, bekojeni Zotin, *

   shenjtër e të përvujtë në zemër, bekojeni Zotin.

Anani, Azari, Misael, bekojeni Zotin, *

   lëvdojeni e madhërojeni në shekuj!

 

Të bekojmë Atin e Birin e Shpirtin Shenjt; *

   ta lëvdojmë e ta madhërojmë në shekuj

I bekuar je ti, o Zot, në kupën qiellore, *

   i lavdishëm e i madhërueshëm në shekuj!

 

   Në fund të kësaj kënge nuk thuhet Lavdi Atit.

 

Ant. 2 Krishti është paqja, sundimi i tij deri në fund të botës.

 

Ant. 3 Zoti ia dha pushtetin, nderin dhe lavdinë, mbarë popujt do t’i shërbejnë.

 

   Psalmi 149 (1-9) Festa e miqve të Zotit

 

   Bijtë e Kishës, bijtë e popullit të ri le të galdojnë në mbretin e tyre që është Krishti (Esichio).

 

Këndoni Zotit një këngë të re, *

   këndoni lavdi në mbledhjen e shenjtërve!

Le t’i gëzohet Izraeli Krijuesit të vet, *

   bijtë e Sionit t’i brohorisin Mbretit të vet!

 

Le ta lavdërojnë Emrin e tij në valle, *

   le t’i bien në nder të tij tupanit e citarës,

sepse Zoti kënaqet në popullin e vet, *

   të përvujtët i nderon me shëlbim.

 

Le të galdojnë të drejtët në lumturi, *

   le të brohorisin nga shtrojat e veta!

E paçin lavdinë e Zotit në gojë, *

   e shpatën dytehëshe në dorë!

 

Për të marrë shpagim mbi paganë, *

   për t’u dhënë popujve ndëshkim,

për t’i lidhur mbretërit e tyre në pranga, *

   princat e tyre në zinxhirë të hekurt,

 

për ta zbatuar mbi ta dënimin kaherë të shkruar: *

   - ky është nder për të gjithë besnikët e tij.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 3 Zoti ia dha pushtetin, nderin dhe lavdinë, mbarë popujt do t’i shërbejnë.

 

   Leximi i shkurtër Ef 4, 15-16

 

   Duke e dëshmuar me dashuri të vërtetën, të rritemi në çdo pikëpamje drejt Atij që është Kryet ‑ Krishtit. Prej tij, Trupi i tërë, si një cope, mirë i lidhur në një, ashtu që çdo gjymtyrë ndihmon sipas funksionit që iu dha veçanërisht secilës pjesë dhe e mundëson rritjen e Trupit në ndërtimin e vetvetes në dashuri.

 

   Përgjigjja e shkurtër

 

   C E këndojnë besimtarët * lavdinë e mbretërisë sate.

   E këndojnë besimtarët lavdinë e mbretërisë sate.

   D I shpallin veprat e tua të madhërishme,

   lavdinë e mbretërisë sate.

   Lavdi Atit e Birit e Shpirtit Shenjt.

   E këndojnë besimtarët lavdinë e mbretërisë sate.

 

   Kënga ungjillore (Benedictus Lk 1, 68-79)

 

   Ant. Krishti është i paralinduri ndër të vdekur, mbreti i mbretërve të tokës. Ai bëri prej nesh një mbretëri për Hyjin, Atin e tij.

 

Qoftë bekuar Zoti, Hyji i Izraelit, *

   që e pa dhe e shpërbleu popullin e vet!

 

Ai e ngriti Shpëtimtarin tonë *

   në shtëpinë e Davidit, shërbëtorit të vet,

 

sikurse premtoi kaherë *

   me gojë të profetëve të tij të shenjtë:

 

se do të na shpëtojë prej armiqve tanë *

   dhe prej dorës së të gjithë atyre që na urrejnë;

 

se do të bëjë mirësinë që ua premtoi etërve tanë *

   e do t'i bjerë në mend Besëlidhja e tij e shenjtë

 

e betimi që bëri në të mirën e Abrahamit, atit tonë *

   se do të na e bëjë të mundshme t'i shërbejmë pa frikë,

 

të çliruar nga duart e armikut *

   në shenjtëri e drejtësi para tij

   për çdo ditë të jetës sonë.

 

E ti, o djalosh, do të quhesh profet i të Tejetlartit, *

   sepse do të shkosh përpara Zotit

   për t'ia përgatitur udhët,

 

për ta vënë në dijeni popullin e tij *

   se Hyji do ta shëlbojë duke ia falur mëkatet e tija,

 

në saje të zemrës së dashur të Hyjit tonë *

   që do të na e dërgojë në pasi prej qiellit Diellin,

 

për të shndritur ata që gjenden në errësirë

   dhe në hijen e vdekjes, *

   për t'i drejtuar hapat tanë në udhën e paqes.“

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

   Ant. Krishti është i paralinduri ndër të vdekur, mbreti i mbretërve të tokës. Ai bëri prej nesh një mbretëri për Hyjin, Atin e tij.

 

   Lutjet e besimtarëve

 

Të bashkuar në lutjen e mëngjesit, ta lavdërojmë dhe ta thërrasim Krishtin, mbretin e gjithësisë:

 

   Ardhtë mbretëria jote, o Zot.

 

O Krisht Jezus, ti që je udhëheqësi dhe zotëria i popullit tënd,

— na udhëheq udhës që shpie në shëlbimin e amshuar.

Bari i mirë, ti që e dhe jetën për delet e tua,

— rri gjithmonë me ne dhe nuk do të na mungojë asgjë.

Shëlbuesi ynë, ty Ati të bëri mbretin e qiellit dhe të tokës,

— bëj që të bashkëpunojmë në ndërtimin e mbretërisë sate drejtësie dhe paqeje.

Mbret i amshuar, që erdhe në botë për ta dëshmuar të vërtetën,

— bëj që çdo njeri ta njohë parësinë tënde në të gjitha gjërat.

Mësues dhe shembull yni, ti që na thirre të bëjmë pjesë në mbretërinë tënde,

— na ruaj të shenjtë dhe të patëmetë deri në ditën e ardhjes sate.

 

Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.

   Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.

 

   Lutja

 

   O Hyj i gjithëpushtetshëm dhe i amshuar, ti deshe të ripërtërish gjithçka nëpër Krishtin, Birin tënd, Mbretin e gjithësisë, bëj që mbarë krijesat, të liruara nga robëria e mëkatit, t’i shërbejnë madhërisë sate e të lëvdojnë pa pushim. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve. Amen.

 

Përfundimi i Orës sikurse në Shërbesën e rëndomtë.