Leximet e ditës
PASHKËT
JAVA E DYTË E PASHKËVE
E HËNË
Antifona e hyrjes Rom 6, 9
Krishti i ngjallur prej të vdekurish, nuk vdes më; vdekja nuk ka më pushtet mbi të, aleluja.
Kolekta
O Hyj i gjithëpushtetshëm, të përtërirë në saje të hirit të Pashkëve nuk jemi më në përngjasimin e prindit tonë tokësor, bëj, po të lutemi, të shndërrohemi në përngjasimin e autorit tonë qiellor. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.
Leximi i parë (Vap 4, 23-31) (fq. 1550)
Pasi e kryen uratën, të gjithë u mbushën me Shpirtin Shenjt dhe u vunë ta shpallin me guxim Fjalën e Hyjit.
Lexim prej Veprave të Apostujve
Në ato ditë, posa i lëshuan, Pjetri dhe Gjoni, 23 shkuan te të vetët dhe u treguan çka u thanë kryepriftërinjtë dhe paria e popullit. 24 Ata, kur morën vesh, të gjithë së bashku iu lutën Hyjit kështu: “O Zot, Ti krijove qiellin, tokën e detin dhe gjithçka është në ta! 25 Ti the nëpërmjet Shpirtit Shenjt me gojë të atit tonë Davidit, shërbëtorit tënd: ‘Përse çohen peshë paganët e përse fiset bëjnë shestime të kota? 26 Mbretërit e dheut po ngrihen kundër, princat bëjnë besëlidhje kundër Zotit e kundër të Shuguruarit të tij.’ 27 Qe, në këtë qytet, vërtet, bënë lidhje Herodi e Ponc Pilati me paganë e me fiset e Izraelit kundër Jezusit ‑ Shërbëtorit tënd të shenjtë, të cilin ti e shugurove, 28 kështu s’bënë tjetër veçse çka dora jote e vullneti yt paracaktoi të bëhet.
29 E tani, o Zot, shih kërcënimin e tyre e bëj që shërbëtorët e tu ta shpallin me plot guxim Fjalën tënde! 30 Shtrije dorën tënde e bëj shërime, shenja të bindshme e mrekulli me fuqinë e Emrit të Shërbëtorit tënd të shenjtë, Jezusit.”
31 Pasi e kryen uratën, u trand vendi ku ishin të bashkuar, të gjithë u mbushën me Shpirtin Shenjt dhe u vunë ta shpallin me guxim Fjalën e Hyjit.
Fjala e Zotit
Psalmi 2 (fq. 660)
Ref. I LUMI AI NJERI, QË SHPRESON NË ZOTIN.
1 Përse paganët çohen peshë
e përse popujt bluajnë punë të kota?
2 Mbretërit e tokës po ngrihen,
princat me përbetim çohen kundër Zotit e Mesisë së tij:
3 “Le t’i këputim vargjet e tyre,
le ta flakim prej nesh zgjedhën e tyre”!
Ref. I LUMI AI NJERI, QË SHPRESON NË ZOTIN.
4 Qeshet Ai që selinë e ka në qiell,
i Larti Zot i përqesh ata!
5 Pastaj u thotë në hidhërimin e vet,
me felgrimin e hidhërimit të vet i huton:
6 “Unë e kam shuguruar mbretin tim
mbi Sion, malin tim të shenjtë”!
Ref. I LUMI AI NJERI, QË SHPRESON NË ZOTIN.
7 Unë do ta shpall vendimin e Zotit.
Ai më tha: “Ti je im Bir, unë sot të linda!
8 M’i kërko e unë për pronë do të t’i jap popujt,
nën sundimin tënd gjithçka përfshin toka.
9 Sundo mbi ta me skeptër hekuri
dhe do t’i thyesh porsi vegsha vorbëtari”!
Ref. I LUMI AI NJERI, QË SHPRESON NË ZOTIN.
Aleluja!
Nëse u ngjallët bashkë me Krishtin, kërkoni çka është lart ku gjendet Krishti ndenjur në fron në të djathtën e Hyjit. (Kol 3, 1)
Aleluja!
Ungjilli (Gjn 3, 1-8) (fq. 1508)
Kush nuk rilind prej së larti, nuk mund ta shohë Mbretërinë e Hyjit.
Leximi i Ungjillit shenjt sipas Gjonit
1 Tashti ndër farisenj ishte një njeri që quhej Nikodem, një nga bujarët e judenjve. 2 Ky erdhi natën te Jezusi dhe i tha: “Rabbi, e dimë se ti je Mësues që erdhi prej Hyjit, sepse askush s’mund t’i bëjë këto mrekulli, që i bën ti, po qe se Hyji nuk është me të.”
3 Jezusi i përgjigji: “Përnjëmend, përnjëmend po të them: kush nuk lind përsëri prej së larti, nuk mund ta shohë Mbretërinë e Hyjit.”
4 “Si është e mundur ‑ i tha Nikodemi ‑ të lindë njeriu kur është i moçëm? A thua mund të hyjë përsëri në barkun e nënës së vet e të lindë?”
5 Jezusi përgjigji: “Përnjëmend, përnjëmend po të them: kush nuk lind me anë të ujit e të Shpirtit nuk mund të hyjë në Mbretërinë e Hyjit. 6 Çka lind prej mishit, mish është, e çka lind prej Shpirtit, shpirt është. 7 Mos u çudit që të thashë: ‘Duhet të lindni përsëri prej së Larti.’ 8 Era fryn në drejtimin që do; ia dëgjon ushtimën e nuk di nga vjen e kah shkon. Kështu ndodh edhe me secilin që lind prej Shpirtit.”
Fjala e Zoti
Lutja mbi dhurata
Pranoji, o Zot, dhuratat e Kishës sate në festë: dhe pasi je Ti shkaku i gjithë këtij gëzimi, jepi edhe frytin e haresë së përhershme. Nëpër Krishtin Zotin tonë.
PREFACIONI I PASHKËVE – II
Jeta e re në Krishtin
46. Ky prefacion thuhet në kohën e Pashkëve.
M. Zoti qoftë me ju.
P. Dhe me shpirtin tënd.
M. T’i lartësojmë zemrat.
P. I kemi te Zoti.
M. Të falënderojmë Zotin, Hyjin tonë.
P. Është punë e denjë dhe e drejtë.
Përnjëmend është punë e denjë dhe e drejtë,
është detyra jonë dhe burim shpëtimi
të të lëvdojmë ty, o Zot, në çdo kohë,
por sidomos të madhërojmë më me hare në këtë kohë,
kur u flijua Krishti, Pashka jonë.
Nëpër të lindin bijtë e dritës për jetën e pasosur
dhe besimtarëve u hapen dyert e parajsës.
Me vdekjen e tij u shëlbua vdekja jonë,
e në ngjalljen e tij u ngjall edhe jeta e të gjithëve.
Prandaj njerëzimi në mbarë botën
galdon me harenë e plotë të Pashkëve.
Por edhe fuqitë e epërme dhe pushtetet engjëllore
e këndojnë himnin e lavdisë sate
duke thënë pa pushim:
Shenjt, Shenjt, Shenjt...
PREFACIONI I PASHKËVE – III
Krishti i ngjallur gjithmonë ndërmjetëson për ne
47. Ky prefacion thuhet në kohën e Pashkëve.
M. Zoti qoftë me ju.
P. Dhe me shpirtin tënd.
M. T’i lartësojmë zemrat.
P. I kemi te Zoti.
M. Të falënderojmë Zotin, Hyjin tonë.
P. Është punë e denjë dhe e drejtë.
Përnjëmend është punë e denjë dhe e drejtë,
është detyra jonë dhe burim shpëtimi
të të lëvdojmë ty, o Zot, në çdo kohë,
por sidomos të madhërojmë më me hare në këtë kohë,
kur u flijua Krishti, Pashka jonë.
Ai nuk pushon së flijuari për ne
dhe na mbron duke ndërmjetësuar përjetësisht para teje.
Një herë i flijuar, më nuk vdes,
një herë i vrarë, jeton për amshim.
Prandaj njerëzimi në mbarë botën
galdon me harenë e plotë të Pashkëve.
Por edhe fuqitë e epërme dhe pushtetet engjëllore
e këndojnë himnin e lavdisë sate
duke thënë pa pushim:
Shenjt, Shenjt, Shenjt...
Antifona e kungimit Gjn 20, 19
Jezusi qëndroi midis nxënësve të vet dhe u tha: Paqja me ju, aleluja.
Lutja pas kungimit
Shikoje me mirësi, o Zot, popullin tënd që e përtërite me sakramentet e përjetshme, bëj të arrijë ngjalljen e trupit në lavdi. Nëpër Krishtin Zotin tonë.