Leximet e ditës

JAVA E XVII GJATË VITIT

 

E SHTUNË

 

Antifona e hyrjes Krh. Ps 67, 6-7.36

 

Hyji është në banesën e vet të shenjtë; Hyji që i bashkon të gjithë në banesën e vet, ai i jep popullit të vet pushtet dhe fuqi.

 

Kolekta

 

O Hyj, Ti je mburoja e atyre që shpresojnë në ty: pa ty asgjë s’është e vyeshme as e shenjtë; na pajis me mëshirën tënde dhe na prij e na drejto, ashtu t’i përdorim të mirat e kalueshme, që qysh tani të jepemi pas të mirave të amshuara. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Lev 25, 1.8-17) (fq. 160/1)

 

Në vitin e jubileut le të kthehet secili në pronën e vet.

 

Lexim prej Librit të Levitikut

 

¹ Në malin e Sinait Zoti foli me Moisiun e tha: ⁸ “Numëroj shtatë javë vitesh, domethënë shtatë herë shtatë, që të gjitha së bashku bëjnë dyzetë e nëntë vjet. ⁹ Atëherë bjeri trumbetës në muajin e shtatë, të dhjetën ditë të muajit, Ditën e shpërblimit, bini trumbetës anekënd vendit tuaj. ¹⁰ Të pesëdhjetin vjet shpalleni vit të shenjtë; kumtoni në mbarë vendin çlirimin e të gjithë banorëve. Ky le të jetë për ju jubile: le të kthehet secili në pronën e vet, le të kthehet secili në fisin e vet të mëparshëm. ¹¹ I pesëdhjeti vit le të jetë për ju jubile: mos mbillni, mos korrni çka të mbijë vetvetiu në arat dhe mos i vilni vreshtat e pakrasitura, ¹² sepse është jubileu, një gjë e shenjtë për ju. Hani çka të mbijë vetvetiu në ara.

¹³ Në këtë vit jubilar secili prej jush le të kthehet në pronën e vet.

¹⁴ Kur t’i shitesh ndonjë send të afërmit tënd ose të blesh ndonjë send prej tij, askush të mos e shfrytëzojë vëllanë e vet, por të blejë prej tij sipas numrit të vjetëve pas jubileut ¹⁵ dhe ai le të të shesë sipas numrit të viteve të fryteve. ¹⁶ Sa më shumë vite të mbesin pas jubileut, ashtu të rritet edhe çmimi dhe sa më pak kohë të numërosh, aq më pak të kushtojë shitja: sepse i duhet të shesë kohën e fryteve. ¹⁷ Mos i shfrytëzoni të afërmit tuaj, por druaje Hyjin tënd, sepse unë jam Zoti, Hyji juaj”.

 

Fjala e Zotit

 

Psalmi 67 (66) (fq. 730)

 

Ref. Zoti na bekon me dritën e fytyrës së vet.

 

² Hyji pastë mëshirë për ne dhe na bekoftë,

bëftë të ndriçojë fytyra e tij mbi ne,

³ që në tokë të njihet udha e tij,

në të gjitha kombet shpëtimi i tij.

 

Ref. Zoti na bekon me dritën e fytyrës së vet.

 

⁵ Le të galdojnë e le brohorisin popujt,

sepse popujt i gjykon me drejtësi,

sepse kombet mbi tokë ti i sundon.

 

Ref. Zoti na bekon me dritën e fytyrës së vet.

 

⁶ Të dhënçin lavdi mbarë popujt, o Hyj,

mbarë popujt e botës ty të lavdërofshin!

⁸ Na bekoftë Hyji!

Frikë e paçin mbarë skajet e botës!

 

Ref. Zoti na bekon me dritën e fytyrës së vet.

 

Aleluja!

Lum ata që salvohen për shkak të drejtësisë, sepse e tyre është Mbretëria qiellore. (Krh. Mt 5, 10)

Aleluja!

 

Ungjilli (Mt 14, 1-12) (fq. 1403)

 

Herodi dërgoi që t’ia shkurtonin kryet Gjonit e nxënësit e Gjonit shkuan dhe i treguan Jezusit.

 

Leximi i Ungjillit të shenjtë sipas Mateut

 

¹ Në atë kohë Herodi tetrark dëgjoi ç’flitej për Jezusin ² dhe u tha shërbëtorëve të vet: “Ky është Gjon Pagëzuesi! U ngjall së vdekuri! Ja, përse ka pushtet të bëjë mrekulli!”

E vërtet Herodi e kishte zënë Gjonin, e kishte lidhur dhe e kishte qitur në burg për shkak të Herodiadës, gruas së Filipit, vëllait të vet. ⁴ Sepse Gjoni i kishte thënë: “Nuk guxon ta mbash për grua Herodiadën!” ⁵ Herodi donte ta vrasë, por druante nga populli, sepse Gjonin e mbanin për profet.

⁶ Në ditëlindjen e Herodit, bija e Herodiadës vallëzoi para të grishurve dhe aq i pëlqeu Herodit, ⁷ sa që me përbetim i premtoi se do t’i japë çkado që t’i kërkojë. ⁸ Ajo, e mësuar prej së ëmës: “Ma jep ‑ tha ‑ këtu në pjatë kryet e Gjon Pagëzuesit!” ⁹ Mbretit i erdhi keq, por për shkak të përbetimit e të të grishurve, urdhëroi t’i jepet. ¹⁰ Dërgoi dikë dhe ia shkurtoi Gjonit kryet në burg. ¹¹ Kryet e Gjonit e sollën në pjatë, ia dha vajzës e kjo së ëmës.

¹² Pastaj erdhën nxënësit e Gjonit, e morën trupin e tij dhe e varrosën, pastaj shkuan dhe i treguan Jezusit.

 

Fjala e Zotit

 

Lutja mbi dhurata

 

Pranoji, o Zot, dhuratat që bujaria jote na ka falur, e bëj që këto mistere të shenjta, në saje të hirit tënd, ta shenjtërojnë jetën tonë të tanishme dhe të na çojnë drejt gëzimeve të amshuara. Nëpër Krishtin Zotin tonë.

 

Antifona e kungimit Ps 102, 2

 

Bekoje, shpirti im, Zotin dhe mos i harro bamirësitë e tij.

 

Ose: Mt 5, 7-8

 

Lum të mëshirshmit, sepse do të gjejnë mëshirë. Lum të pastrit në zemër, sepse do ta shohin Hyjin.

 

Lutja pas kungimit

 

E morëm, o Zot, sakramentin hyjnor, kujtimin e përjetshëm të mundimeve të Birit tënd; bëj, po të lutemi, që kjo dhuratë që kemi marrë prej dashurisë së tij të pakufi të na vlejë për shpëtimin tonë. Ai jeton e mbretëron në shekujt e shekujve.