Leximet e ditës
JAVA E V GJATË VITIT
E HËNË
Ejani ta adhurojmë Hyjin, të biem përmbys para Zotit që na krijoi, sepse ai është Zoti, Hyji ynë.
Kolekta
Ruaje, po të lutemi, o Zot, me dashuri të vazhdueshme, këtë familje dhe, pasi kjo mbështetet vetëm në shpresën e hirit qiellor, ta gëzojë gjithherë ndihmën e mbrojtjes sate. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.
II
Leximi i parë (1 Mbr 8, 1-7.9-13) (fq. 409/10)
E sollën Arkën e Besëlidhjes së Zotit në vendin e saj, në Dabirin e Tempullit.
Lexim prej Librit të parë të Mbretërve
1 Në ato ditë, Salomoni i bashkoi në Jerusalem te vetja te gjithë parinë e Izraelit: të gjithë të parët e fiseve, prijësit e vëllazërive të bijve të Izraelit për ta bartur Arkën e Besëlidhjes së Zotit prej qytetit të Davidit, domethënë prej Sionit. 2 Të gjithë izraelitët u bashkuan të Mbreti Salomon në muajin Etanim, domethënë në muajin e shtatë, në festë.
3 Kur erdhën të parët e Izraelit, priftërinjtë e morën Arkën 4 dhe e bartën Arkën e Zotit, Tendën e Takimit dhe të gjitha enët e Shenjtërores që ishin në Tendë. I bartën priftërinjtë e levitët. 5 Mbreti Salomon dhe mbarë populli i Izraelit që ishte mbledhur rreth tij, së bashku me të flijonin para Arkës dele e gjedhë aq shumë, saqë s'mund të çmoheshin as të numëroheshin.
6 Priftërinjtë e sollën Arkën e Besëlidhjes së Zotit në vendin e saj në Dabirin e Tempullit, në Shenjtëroren e shenjtëroreve, nën krahët e kerubinëve. 7 Kështu kerubinët i shtrinin krahët mbi vendin e Arkës dhe mbronin Arkën edhe shtagat e saja. 9 Në Arkë nuk kishte tjetër përveç dy rrasave guri që i kishte futur në të Moisiu në Malin Horeb, kur Zoti lidhi Besëlidhje me bijtë e Izraelit pasi kishin dalë prej tokës së Egjiptit.
10 Posa dolën priftërinjtë prej shenjtërores, reja mbushi shtëpinë e Zotit. 11 dhe priftërinjtë nuk mund të qëndronin e të shërbenin për shkak të resë: dhe njëmend lavdia e Zotit e kishte mbushur Shtëpinë e Zotit. 12 Atëherë Salomoni tha: "Zoti vendosi të banojë në renë e errët. 13 Unë, pra, bëra mirë që të ndërtova një Shtëpi të madhërishme, një fron të qëndrueshëm e të përhershëm për ty".
Fjala e Zotit
Psalmi 132 (131), 6-7.8-10 (fq. 812/3)
Ref. Ngrihu, o Zot, ti dhe arka e pushtetit tënd!
6 Ja, dëgjuam se është në Efratë,
e kemi gjetur në Fushat e Jaarit!
7 Le të hyjmë në tendën e tij,
të adhurojmë te shtroja e këmbëve të tija!
Ref. Ngrihu, o Zot, ti dhe arka e pushtetit tënd!
8 Ngrihu, o Zot, eja në vendin e pushimit tënd,
ti dhe arka e Pushtetit tënd!
9 Priftërinjtë e tu le të veshën me drejtësi,
shenjtërit e tu le të brohoritin me galdim.
10 Për dashuri të shërbëtorit tënd Davidit,
mos e përbuz fytyrën e Mesisë tënd!
Ref. Ngrihu, o Zot, ti dhe arka e pushtetit tënd!
Aleluja!
Jezusi e predikonte Ungjillin e Mbretërisë duke shëruar në popull çdo sëmundje e çdo lëngatë. (Mt 4, 23)
Ungjilli (Mk 6, 53-56) (fq. 1438)
Të gjithë ata që e preknin Jezusin, shëroheshin.
Leximi i Ungjillit të shenjtë sipas Markut
Në atë kohë, pasi Jezusi dhe nxënësit e tij 53 lundruan deri në breg, arritën në Gjenezaret e aty e lidhën barkën.
54 Posa dolën nga barka, njerëzit që e njohën 55 menjëherë shpejtuan të shkojnë nëpër mbarë krahinën e filluan të sjellin të sëmurit në vigje atje ku dëgjonin se ishte.
56 E kudo që hynte: në fshatra, në qytete apo në katunde, i vendosnin të sëmurit në sheshe dhe e lutnin t'ia preknin së paku kindin e petkut. Të gjithë ata që e preknin, shëroheshin.
Lutja mbi dhurata
O Zot, Hyji ynë, Ti e krijove bukën dhe verën për ushqim të trupit tonë të ligshtë: bëj, po të lutemi, të shndërrohen në sakramentin e përjetësisë. Nëpër Krishtin Zotin tonë.
Antifona e kungimit Krh. 106, 8-9
Le t’ia dinë për nder Zotit për dashurinë e tij, për mrekullitë që u bëri bijve të njerëzve, që ngiu shpirtin e të eturit e mbushi me të mira shpirtin e të uriturit.
Ose: Mt 5, 5-6
Lum ata që qajnë, sepse do të ngushëllohen. Lum ata që kanë uri dhe etje për drejtësi, sepse do të ngihen.
Lutja pas kungimit
O Hyj, Ti deshe të marrim pjesë në të njëjtën bukë dhe në të njëjtin kelk: bëj, po të lutemi, që me jetën tonë të jemi plotësisht të bashkuar në Krishtin, dhe me gëzim të japim fryt për shpëtimin e botës. Nëpër Krishtin Zotin tonë.