Leximet e ditës

KRESHMET

 

JAVA E PARË E KRESHMEVE

 

E PREMTE

 

Antifona e hyrjes Ps 24, 17-18

 

Më nxirr, o Zot, nga vështirësitë e mia. Shiko përvujtërimin tim dhe mundimin e m’i fal të gjitha fajet e mia.

 

Kolekta

 

Bëj, po të lutemi, o Zot, që besimtarët e tu të përgatiten si duhet për kremtimin e Pashkëve, që angazhimi i përbashkët për pendesën trupore t’i vlejë secilit për të mirën shpirtërore. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Ez 18, 21-28) (fq. 1164)

 

      Unë nuk i kënaqem vdekjes së mëkatarit, por dëshiroj që të kthehet nga sjellja e vet dhe të jetojë.

 

      Lexim prej librit të Ezekielit profet

 

      Kështu thotë Zoti Hyj: ²¹ Por, në qoftë se i paudhi pendohet për të gjitha mëkatet e veta që i ka bërë dhe i mban të gjitha urdhërimet e mia, e bën të drejtën e drejtësinë, po, do të jetojë, nuk do të vdesë! ²² Asnjë prej mëkateve të tij që ka bërë nuk do t’i kujtohet; do të jetojë në saje të drejtësisë që bën. ²³ Vallë, a thua i kënaqem vdekjes së mëkatarit ‑ është fjala e Zotit Hyj ‑ e jo që të kthehet nga sjellja e vet e të jetojë?

      ²⁴ Por, në qoftë se i drejti largohet nga drejtësia e vet dhe bën padrejtësinë e të gjitha turpësitë që i bën i patenzoni, vallë a do të jetojë? Asnjë prej drejtësive të tij që i ka bërë, nuk do t’i merren parasysh; për shkak të pabesisë së vet me të cilën e theu besën e të mëkatit që e bëri, në to do të vdesë.

      ²⁵ Ju thatë: ‘Nuk është e drejtë udha e Zotit’. Dëgjoni, pra, shtëpia e Izraelit: A thua mënyra e sjelljes sime vërtet s’është e mirë? Apo më parë mënyra e veprimit tuaj është e keqe? ²⁶ Sepse, kur i drejti e lë drejtësinë e vet e bën padrejtësinë, ai do të vdesë: për shkak të padrejtësisë që bëri, do të vdesë. ²⁷ E kur i paudhi kthehet prej paudhësisë së vet që e ka bërë, e bën të drejtën e drejtësinë, ai ia kthen jetën vetvetes: ²⁸ ai pleqëron imët dhe kthehet nga të gjitha padrejtësitë që i ka bërë, këndej do të jetojë e, jo, nuk do të vdesë.

 

      Fjala e Zotit

 

Psalmi 130 (129) (fq. 811)

 

Ref. NA FAL, O ZOT, E NE DO TË JETOJMË.

 

¹ Prej humnerës klitha tek ti, o Zot,

² o Zot, dëgjoje britmën time!

Le ta dëgjojnë veshët e tu,

zërin e lutjes sime.

 

Ref. NA FAL, O ZOT, E NE DO TË JETOJMË.

 

³ Nëse do t’i mbash mend paudhësitë, o Zot,

O Zot, e kush do të qëndrojë para teje?

⁴ Por tek ti gjendet falja

që të dimë të të druajmë.

 

Ref. NA FAL, O ZOT, E NE DO TË JETOJMË.

 

⁵ Shpresoj në ty, o Zot,

shpirti im shpreson në premtimin e tij.

E pret ⁶ shpirti im Zotin

më tepër se rojtarët agimin.

 

Ref. NA FAL, O ZOT, E NE DO TË JETOJMË.

 

⁷ Le të shpresojë Izraeli në Zotin,

sepse te Zoti është mëshira

dhe i madh është tek Ai shpërblimi.

⁸ Ai do ta nxjerrë Izraelin

prej të gjitha paudhësive të tija.

 

Ref. NA FAL, O ZOT, E NE DO TË JETOJMË.

 

      Lavdi ty, o Krisht, Mbret i lavdisë së amshuar!

Lëre dhuratën tënde aty para lterit, shko e pajtohu më parë me vëllanë tënd e pastaj eja dhe kushtoje dhuratën tënde! (Ez 18, 31)

      Lavdi ty, o Krisht, Mbret i lavdisë së amshuar!

 

Ungjilli (Mt 5, 20-26) (fq. 1388)

 

      Shko e pajtohu më parë me vëllanë tënd.

 

      Leximi i Ungjillit të shenjtë sipas Mateut

 

      Në atë kohë, Jezusi u tha nxënësve të vet: ²⁰ nëse drejtësia juaj nuk do të jetë më e madhe se drejtësia e skribëve dhe e farisenjve, nuk do të hyni në Mbretërinë e qiellit.”

      ²¹ “Keni dëgjuar se u qe thënë të vjetërve: ‘Mos vra!’ Kush vret do të jetë përgjegjës para gjyqit. ²² E unë po ju them: Kushdo zemërohet kundër vëllait të vet, do të jetë përgjegjës para gjyqit; e kush t’i thotë vëllait të vet: ‘Budalla’, do të jetë përgjegjës para Sinedrit; kush t’i thotë: ‘I marrë’, do të përgjigjet në zjarrin e ferrit.

      ²³ Pra, nëse e sjell dhuratën tënde për ta kushtuar në lter e aty të bie në mend se yt vëlla ka diçka kundër teje, ²⁴ lëre dhuratën tënde aty para lterit, shko e pajtohu më parë me vëllain tënd e pastaj eja e kushtoje dhuratën tënde!

      ²⁵ Ndrequ me shpejt me kundërshtarin tënd sa të jesh ende në udhëtim me të, që kundërshtari të mos të të dorëzojë gjykatësit e ky rojtarit të gjyqit, që të mos të ndryjnë në burg. ²⁶ Për të vërtetë po të them: s’do të dalësh prej andej para se ta paguash edhe paranë më të fundit.”

 

      Fjala e Zotit

 

Lutja mbi dhurata

 

Pranoje me mirësi, o Zot, këtë fli, nëpërmjet së cilës deshe të pajtohemi me ty dhe të fitojmë shpëtimin. Nëpër Krishtin Zotin tonë.

 

PREFACIONI I KRESHMËVE – I

Kuptimi shpirtëror i Kreshmëve

 

39. Ky prefacion thuhet në kohën e Kreshmëve, sidomos të dielave, kur nuk thuhet ndonjë prefacion tjetër më i veçantë.

 

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

 

Përnjëmend është punë e denjë dhe e drejtë,

është detyra jonë dhe burim shpëtimi

të të falënderojmë gjithmonë e gjithkund ty,

o Zot, Atë i shenjtë, Hyj i gjithëpushtetshëm dhe i amshuar,

nëpër Krishtin, Zotin tonë.

Ti çdo vit mirësisht bën që besimtarët e tu

t’i presin me gëzim dhe me shpirt të pastruar

misteret e Pashkëve,

kështu që, duke i kryer me zell

detyrat e përshpirtërisë dhe veprat e dashurisë,

me pjesëmarrje të shumtë në misteret me të cilat u rilindën,

të arrijnë plotësinë e hirit të bijësisë në shpirt.

Dhe prandaj, bashkë me engjëj dhe kryeengjëj,

me frone dhe zotërues,

dhe me të gjithë aradhën e ushtrisë qiellore,

po këndojmë himnin e lavdisë sate

duke thënë pa pushim:

Shenjt, Shenjt, Shenjt...

 

PREFACIONI I KRESHMËVE – II

Pendesa shpirtërore

 

40. Ky prefacion thuhet në kohën e Kreshmëve, sidomos të dielave, kur nuk thuhet ndonjë prefacion tjetër më i veçantë.

 

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

 

Përnjëmend është punë e denjë dhe e drejtë,

është detyra jonë dhe burim shpëtimi

të të falënderojmë gjithmonë e gjithkund ty,

o Zot, Atë i shenjtë, Hyj i gjithëpushtetshëm dhe i amshuar.

Ti ua caktove bijve të tu këtë kohë të veçantë

për të ripërtërirë pastërtinë e shpirtit

që me shpirt të lirë nga ndjenjat e çrregullta,

të angazhohen për vlerat e përkohshme

në mënyrë që t’i kërkojnë më shumë vlerat e përhershme.

Dhe prandaj, me shenjtërit dhe me të gjithë engjëjt,

të lavdërojmë duke thënë pa pushim:

Shenjt, Shenjt, Shenjt...

 

Antifona e kungimit Ez 33, 11

 

Pasha jetën time, nuk e dua vdekjen e mëkatarit, thotë Zoti, por të kthehet e të jetojë.

 

Lutja pas kungimit

 

Na përtëriftë o Zot, kungimi i shenjtë, që, të pastruar prej mëkateve, të mund të marrim frytet e misterit të shpëtimit. Nëpër Krishtin Zotin tonë.

 

Lutja mbi popull

 

Shikoje me mirësi, o Zot, popullin tënd, që duke ushtruar vepra pendestare, ta fitojë pastërtinë e brendshme. Nëpër Krishtin Zotin tonë.