Leximet e ditës

JAVA E DYTË E KRESHMEVE

E HËNË

Antifona e hyrjes Krh. Ps 25, 11-12

Më shëlbo, o Zot, dhe ki dhimbje për mua. Tashmë këmba ime shkel në udhë të drejta, në bashkime do ta bekoj Zotin.

Kolekta

O Hyj, ti përcakton pendesën trupore për mjekim shërues të shpirtit, bëj të agjërojmë prej çdo mëkati, që shpirti ynë t’i zbatojë urdhërimet e dashurisë sate. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

Leximi i parë (Dan 9, 4b-10) (fq. 1221)

Kemi mëkatuar.

Lexim prej librit të Danielit profet

⁴ Unë iu luta Zotit Hyj, dëshmova e thashë: “Po të lutem, o Zot, Hyj i madhërishëm e i tmerrshëm, ti që e mban Besëlidhjen dhe mëshirën ndaj atyre që të duan e i mbajnë urdhërimet e tua. ⁵ Ne mëkatuam, bëmë keq, vepruam paudhësisht, kundërshtuam, i lamë urdhërimet e rregulloret e tua. ⁶ Nuk i dëgjuam shërbëtorët e tu profetët, të cilët, në emër tënd, u folën mbretërve tanë, prijësve tanë, etërve tanë e mbarë popullit të vendit.

⁷ Ty, o Zot, të përket drejtësia, kurse neve turpi në fytyrë, siç u ndodhi edhe sot njerëzve të Judës, banorëve të Jerusalemit, e mbarë Izraelit, këtyre që janë afër e atyre që janë larg anembanë tokës, ku i trete për shkak të paudhësisë së tyre, me të cilën mëkatuam kundër teje.

⁸ O Zot, neve na takon turpi në fytyrë, mbretërve tanë, prijësve tanë e etërve tanë, sepse mëkatuam kundër teje; ⁹ kurse Zotit, Hyjit tonë, i takon mëshira e falja, sepse ne u larguam prej teje. ¹⁰ Nuk e dëgjuam zërin e Zotit, Hyjit tonë, për të ecur ligjit të tij që na e dha nëpërmjet shërbëtorëve të vet, profetëve.

Fjala e Zotit

Psalmi 79 (78), 8.9.11.13 (fq. 749)

Ref. Na fal, o Zot, në mëshirën tënde.

⁸ Mos i kujto fajet e etërve tanë,

le të na vijë në ndihmë sa më parë mëshira jote,

sepse jemi bërë tepër të mjerë.

Ref. Na fal, o Zot, në mëshirën tënde.

⁹ Na ndihmo, o Hyj, Shëlbuesi ynë,

për nder të Emrit tënd e na çliro:

pashë nderin e Emrit tënd na i fal fajet!

Ref. Na fal, o Zot, në mëshirën tënde.

¹¹ Le të arrijë tek ti gjëma e të robëruarve,

me fuqinë e krahut tënd

shpëtoji të dënuarit me vdekje.

Ref. Na fal, o Zot, në mëshirën tënde.

¹³ E ne, populli yt ‑ delet e kullotës sate,

do të të lavdërojmë për amshim,

do ta shpallim nga brezi në brez

lavdinë tënde.

Ref. Na fal, o Zot, në mëshirën tënde.

Lavdi ty, o Krisht, Mbret i lavdisë së amshuar!

Fjalët e tua, o Zot, janë shpirt dhe jetë; ti i ke fjalët e jetës së pasosur. (Gjn 6, 63c.68c)

Lavdi ty, o Krisht, Mbret i lavdisë së amshuar!

Ungjilli (Lk 6, 36-38) (fq. 1469)

Falni e do të gjeni falje.

Leximi i Ungjillit të shenjtë sipas Lukës

Në atë kohë, Jezusi u tha nxënësve të vet: ³⁶ Bëhuni edhe ju të mëshirshëm sikurse (edhe) Ati juaj është i mëshirshëm.”

³⁷“Mos gjykoni dhe nuk do të gjykoheni! Mos dënoni e nuk do të dënoheni! Falni e do të gjeni falje!

³⁸ Jepni e do t’ju jepet: masë e mirë, e dendur, e tundur, me grumbull do t’ju jepet nën sqetullën tuaj: sepse me atë masë që të matni, do t’ju matet edhe juve në kthim.”

Fjala e Zotit

Lutja mbi dhurata

Pranoji me mirësi, o Zot, lutjet tona, na liro prej ngashënjimeve tokësore pasi na grishe t’u shërbejmë mistereve qiellore. Nëpër Krishtin Zotin tonë.

PREFACIONI I KRESHMËVE – I

Kuptimi shpirtëror i Kreshmëve

39. Ky prefacion thuhet në kohën e Kreshmëve, sidomos të dielave, kur nuk thuhet ndonjë prefacion tjetër më i veçantë.

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

Përnjëmend është punë e denjë dhe e drejtë,

është detyra jonë dhe burim shpëtimi

të të falënderojmë gjithmonë e gjithkund ty,

o Zot, Atë i shenjtë, Hyj i gjithëpushtetshëm dhe i amshuar,

nëpër Krishtin, Zotin tonë.

Ti çdo vit mirësisht bën që besimtarët e tu

t’i presin me gëzim dhe me shpirt të pastruar

misteret e Pashkëve,

kështu që, duke i kryer me zell

detyrat e përshpirtërisë dhe veprat e dashurisë,

me pjesëmarrje të shumtë në misteret me të cilat u rilindën,

të arrijnë plotësinë e hirit të bijësisë në shpirt.

Dhe prandaj, bashkë me engjëj dhe kryeengjëj,

me frone dhe zotërues,

dhe me të gjithë aradhën e ushtrisë qiellore,

po këndojmë himnin e lavdisë sate

duke thënë pa pushim:

Shenjt, Shenjt, Shenjt...

PREFACIONI I KRESHMËVE – II

Pendesa shpirtërore

40. Ky prefacion thuhet në kohën e Kreshmëve, sidomos të dielave, kur nuk thuhet ndonjë prefacion tjetër më i veçantë.

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

Përnjëmend është punë e denjë dhe e drejtë,

është detyra jonë dhe burim shpëtimi

të të falënderojmë gjithmonë e gjithkund ty,

o Zot, Atë i shenjtë, Hyj i gjithëpushtetshëm dhe i amshuar.

Ti ua caktove bijve të tu këtë kohë të veçantë

për të ripërtërirë pastërtinë e shpirtit

që me shpirt të lirë nga ndjenjat e çrregullta,

të angazhohen për vlerat e përkohshme

në mënyrë që t’i kërkojnë më shumë vlerat e përhershme.

Dhe prandaj, me shenjtërit dhe me të gjithë engjëjt,

të lavdërojmë duke thënë pa pushim:

Shenjt, Shenjt, Shenjt...

Antifona e kungimit Lk 6, 36

Jini të mëshirshëm, thotë Zoti, sikurse edhe Ati juaj është i mëshirshëm.

Lutja pas kungimit

Ky kungim, o Zot, na pastroftë nga fajet dhe na bëftë pjesëtarë të gëzimeve qiellore. Nëpër Krishtin Zotin tonë.

Lutja mbi popull

Përforcoji, o Zot, zemrat e besimtarëve të tu dhe mbështeti me fuqinë e hirit tënd, që të dëftohen të devotshëm në kërkesat e tyre dhe të çiltër në dashurinë e tyre. Nëpër Krishtin Zotin tonë.