Leximet e ditës

JAVA E DYTË E KRESHMEVE

 

E ENJTE

 

Antifona e hyrjes Krh. Ps 138, 23-24

 

Më shqyrto, o Zot, dhe njihe zemrën time, shiko në mos ka në mua udhë kotësie dhe më kthe në udhën e amshueshme.

 

Kolekta

 

O Hyj, dashurues dhe ripërtëritës i pafajësisë, drejtoji nga ti zemrat e shërbëtorëve të tu, kështu që, me zellin që vjen prej Shpirtit tënd, të jenë të qëndrueshëm në fe dhe plot fryte në vepra e tyre. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Jer 17, 5-10) (fq. 1075/6)

 

Qoftë mallkuar ai njeri që shpreson në njeriun; qoftë bekuar ai që shpreson në Zotin.

 

Lexim prej librit të Jeremisë profet

 

⁵ Kështu thotë Zoti: Qoftë mallkuar ai njeri që në njeriun shpreson, ai që mbështetjen e vet e ka në njeriun e zemra e tij largohet prej Zotit. ⁶ Ai do të jetë porsi marena në shkretëtirë: nuk sheh kurrë asnjë të mirë, i shkon ditët në thatësirën e shkretëtirës, në tokë të kriposur, të pabanueshme.

⁷ Qoftë bekuar ai që shpreson në Zotin, Zoti do të jetë shpresa e tij. ⁸ Ai do të jetë porsi druri i mbëltuar në breg të ujit, që kah përroi i lëshon rrënjët e s’do të trembet kur të vijë zhegu: gjethi i tij do të jetë i blertë. Për vit thatësie s’është në kujdes, nuk pushon duke dhënë fruta.⁹ Më dinake se çdo gjë tjetër është zemra, e pashërueshme; kush është ai që mund ta njohë? ¹⁰ Unë, Zoti, shqyrtoj zemrën, sprovoj veshkat, i jap secilit sipas sjelljes së tij, sipas fryteve të veprave të tij.

 

Fjala e Zotit

 

Psalmi 1, 1-2.3.4-6 (fq. 659)

 

Ref. Lum njeriu që shpreson në Zotin.

 

¹ Lum njeriu që nuk i ndjek këshillat e bakëqijve,

që nuk qëndron në udhën e mëkatarëve

e nuk rri së bashku me përqeshës,

² por kënaqet në Ligjin e Zotit

dhe e kujton atë ditë e natë.

 

Ref. Lum njeriu që shpreson në Zotin.

 

³ Ai është porsi pema e mbjellë në bregun e ujit që rrjedh,

e cila frytin e vet e jep në stinë

dhe gjethet kurrë s’i vyshken:

i ecën mbarë gjithçka të ndërmarrë.

 

Ref. Lum njeriu që shpreson në Zotin.

 

⁴ Jo, kështu jo, s’do t’u ndodhë të paudhëve,

por ata janë porsi byku që shpërndan era.

⁶ Sepse Zoti e di udhën e të drejtëve,

kurse udha e keqbërësve do të mbarojë.

 

Ref. Lum njeriu që shpreson në Zotin.

 

Lavdi ty, o Krisht, Mbret i lavdisë së amshuar!

Lum ata që e dëgjojnë Fjalën e Zotit dhe e ruajnë në zemër të mirë e bujare dhe japin fryt me qëndrueshmëri. (Lk 8, 15)

Lavdi ty, o Krisht, Mbret i lavdisë së amshuar!

 

Ungjilli (Lk 16, 19-31) (fq. 1489)

 

Ti i gëzove të mirat e tua gjatë jetës sate, ndërsa Lazri të këqijat; tashti ky këtu gëzon e ti vuan.

 

Leximi i Ungjillit të shenjtë sipas Lukës

 

Në atë kohë, Jezusi u tha farisenjve: ¹⁹ “Ishte një njeri i pasur që vishej me cohë të kuqe e me pëlhurë të çmueshme dhe gostitej shkëlqimisht si një ditë përditë. ²⁰ Kurse para derës së tij rrinte një skamnor, plot çibana, që quhej Lazër ²¹ e dëshironte të ngihej me dromcat që binin nga tryeza e pasanikut. Madje edhe qentë vinin e ia lëpinin varrët.

²² Vdiq skamnori e engjëjt e çuan në prehër të Abrahamit. Vdiq edhe pasaniku dhe e varrosën. ²³ Në ferr, ndër mundime të mëdha, çoi sytë e pa prej së largu Abrahamin dhe Lazrin në prehrin e tij ²⁴ e bërtiti: ‘O atë Abraham, ki mëshirë për mua e dërgoje Lazrin ta lagë majën e gishtit të vet në ujë e të ma flladisë gjuhën se po mundohem për së tepërmi në këtë flakë.’

²⁵ Abrahami i përgjigji: ‘Mos harro, o bir, se ti i gëzove të mirat e tua gjatë jetës sate, ndërsa Lazri të këqijat; tashti, ky këtu gëzon e ti vuan. ²⁶ Por, për më tepër, ndërmjet nesh e jush është një humnerë e madhe, kështu që, edhe ata që do të donin të kalojnë prej këndej te ju, nuk munden, po ashtu edhe prej andej të kalojë këndej, s’mundet askush!’

²⁷ Pasaniku vazhdoi: ‘Atëherë, po të lutem, o atë, dërgoje Lazrin në shtëpinë e tim eti, ²⁸ se i kam pesë vëllezër e le t’i qortojë seriozisht që të mos vijnë edhe ata në këtë vend mundimesh.’ ²⁹ Abrahami iu përgjigj: ‘Kanë Moisiun e profetët, le t’i dëgjojnë ata!’ ³⁰ Pasaniku i tha: ‘Jo, o atë Abraham, por nëse shkon ndokush prej të vdekurish tek ata, veç atëherë do të kthehen!’ ³¹ Iu përgjigj: ‘Nëse, vërtet, nuk e dëgjojnë Moisiun e profetët, nuk do t’u mbushet mendja edhe nëse ndokush ngjallet prej të vdekurish. ’“

 

Fjala e Zotit

 

Lutja mbi dhurata

 

Po të lutemi, o Zot, që me anë të kësaj flije, ta shenjtërosh pendesën tonë të kreshmëve, që ushtrimit kreshmor të jashtëm t’i përgjigjet përtëritja e vërtetë e brendshme. Nëpër Krishtin Zotin tonë.

 

PREFACIONI I KRESHMËVE – I

Kuptimi shpirtëror i Kreshmëve

 

39. Ky prefacion thuhet në kohën e Kreshmëve, sidomos të dielave, kur nuk thuhet ndonjë prefacion tjetër më i veçantë.

 

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

 

Përnjëmend është punë e denjë dhe e drejtë,

është detyra jonë dhe burim shpëtimi

të të falënderojmë gjithmonë e gjithkund ty,

o Zot, Atë i shenjtë, Hyj i gjithëpushtetshëm dhe i amshuar,

nëpër Krishtin, Zotin tonë.

Ti çdo vit mirësisht bën që besimtarët e tu

t’i presin me gëzim dhe me shpirt të pastruar

misteret e Pashkëve,

kështu që, duke i kryer me zell

detyrat e përshpirtërisë dhe veprat e dashurisë,

me pjesëmarrje të shumtë në misteret me të cilat u rilindën,

të arrijnë plotësinë e hirit të bijësisë në shpirt.

Dhe prandaj, bashkë me engjëj dhe kryeengjëj,

me frone dhe zotërues,

dhe me të gjithë aradhën e ushtrisë qiellore,

po këndojmë himnin e lavdisë sate

duke thënë pa pushim:

Shenjt, Shenjt, Shenjt...

 

PREFACIONI I KRESHMËVE – II

Pendesa shpirtërore

 

40. Ky prefacion thuhet në kohën e Kreshmëve, sidomos të dielave, kur nuk thuhet ndonjë prefacion tjetër më i veçantë.

 

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

 

Përnjëmend është punë e denjë dhe e drejtë,

është detyra jonë dhe burim shpëtimi

të të falënderojmë gjithmonë e gjithkund ty,

o Zot, Atë i shenjtë, Hyj i gjithëpushtetshëm dhe i amshuar.

Ti ua caktove bijve të tu këtë kohë të veçantë

për të ripërtërirë pastërtinë e shpirtit

që me shpirt të lirë nga ndjenjat e çrregullta,

të angazhohen për vlerat e përkohshme

në mënyrë që t’i kërkojnë më shumë vlerat e përhershme.

Dhe prandaj, me shenjtërit dhe me të gjithë engjëjt,

të lavdërojmë duke thënë pa pushim:

Shenjt, Shenjt, Shenjt...

 

Antifona e kungimit Ps 118, 1

 

Lum ata që janë të pastër në jetë, ata që ecin në ligjin e Zotit.

 

Lutja pas kungimit

 

Bëj, o Hyj që kjo fli ta vijojë në ne veprën e vet dhe fryti i saj të shtohet me bashkëveprimin tonë. Nëpër Krishtin Zotin tonë.

 

Lutja mbi popull

 

Qëndro, o Zot, mes besimtarëve të tu të cilët kërkojnë ndihmën e hirit tënd, që të fitojnë mbrojtjen dhe sundimin tënd. Nëpër Krishtin Zotin tonë.