Leximet e ditës

JAVA E TRETË E KRESHMEVE

 

E ENJTE

 

Antifona e hyrjes

 

Unë jam shpëtimi i popullit, thotë Zoti. Në çdo nevojë do të më thërrasin në ndihmë: do t’i vështroj dhe do të jem Zoti i tyre për amshim.

 

Kolekta

 

Po të lutemi me përvujtëri, o Zot i mëshirshëm, sa më fort që afrohet e kremtja e shpëtimit tonë, aq më tepër rritet në ne dëshira ta kremtojmë si duhet festën e Pashkëve. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Jer 7, 23-28) (fq. 1063)

 

Ky është populli që nuk e dëgjon zërin e Zotit, Hyjit të vet.

 

Lexim prej librit të Jeremisë profet

 

Kështu thotë Zoti: ²³ Porse unë u kam dhënë këtë urdhër: Dëgjojeni zërin tim dhe unë do të jem Hyji juaj e ju do të jeni populli im. Ecni vazhdimisht udhës që do t’ju urdhëroj që të jeni të lumë.

²⁴ Por nuk më dëgjuan as nuk e prirën veshin e vet, por shkuan sipas ëndjeve dhe mbrapshtisë së zemrës së vet të prishur edhe ma kthyen shpinën e jo fytyrën, ²⁵ që nga dita kur etërit tuaj dolën nga toka e Egjiptit e deri në ditën e sotme. E unë ju dërgova të gjithë shërbëtorët e mi, profetët, si një ditë përditë e me kujdes. ²⁶ Por ata s’më dëgjuan as s’më vunë vesh dhe u bënë kokëfortë dhe vepruan edhe më zi se etërit e tyre.

²⁷ Ti thuaju të gjitha këto fjalë, por ata s’do të dëgjojnë; do t’i thërrasësh, por ata s’do të të përgjigjen. ²⁸ Atëherë thuaju: Ky është një popull që nuk e dëgjon zërin e Zotit, Hyjit të vet, e nuk e pranon mësimin. U zhduk besnikëria, u zhduk nga goja e tyre.

 

Fjala e Zotit

 

Psalmi 95 (94), 1-2.6-7.8-9 (fq. 768)

 

Ref. Dëgjojeni sot zërin e Zotit, e mos e bëni zemrën gur.

 

¹ Ejani t’i këndojmë Zotit,

t’i brohorisim Hyjit, Shëlbuesit tonë.

² T’i dalim para me falënderim,

t’i këndojmë këngë hareje!

 

Ref. Dëgjojeni sot zërin e Zotit, e mos e bëni zemrën gur.

 

⁶ Ejani ta adhurojmë, të biem përmbys para tij,

të biem në gjunjë para Zotit që na krijoi!

⁷ Sepse ai është Hyji ynë,

ne jemi populli i kullotës së tij,

grigja që ai ruan.

 

Ref. Dëgjojeni sot zërin e Zotit, e mos e bëni zemrën gur.

 

⁸ Oh sikur ta ndienit sot zërin e tij:

“Mos e bëni zemrën tuaj gur porsi në Meribë,

⁹ porsi në ditë të Masës në shkretëtirë,

kur etërit tuaj më vunë në sprovë:

më provuan megjithëse i kishin parë veprat e mia.

 

Ref. Dëgjojeni sot zërin e Zotit, e mos e bëni zemrën gur.

 

Lavdi ty, o Krisht, Mbret i lavdisë së amshuar!

Kthehuni tek unë me gjithë zemrën tuaj, thotë Zoti, sepse unë jam i mirë e i mëshirshëm. (krh. Gal 2, 12-13)

Lavdi ty, o Krisht, Mbret i lavdisë së amshuar!

 

Ungjilli (Lk 11, 14-23) (fq. 1479/80)

 

Kush nuk është me mua, është kundër meje.

 

Leximi i Ungjillit të shenjtë sipas Lukës

 

¹⁴ Në atë kohë Jezusi po dëbonte një djall [e ky ishte memec]. Kur djalli doli, foli memeci e populli u habit. ¹⁵ Disa prej tyre thanë: “I dëbon djajtë me ndihmën e Beelzebulit, kryetarit të djajve.” ¹⁶ Do të tjerë, pastaj, për ta vënë në provë, kërkonin prej tij një shenjë prej qiellit.

¹⁷ Por ai, duke i njohur mendimet e tyre, u tha: “Çdo mbretëri, e përçarë në vetvete, shkretohet; një shtëpi bie mbi tjetrën. ¹⁸ Po qe se djalli është i ndarë në vetvete ‑ pasi ju po thoni se unë i dëboj djajtë me ndihmën e Beelzebulit ‑ si do të qëndrojë mbretëria e tij?   ¹⁹ Tashti, pasi unë i dëbokam djajtë me ndihmën e Beelzebulit, bijtë tuaj, me ndihmën e kujt i dëbojnë? Prandaj, ata do të jenë gjykatësit tuaj. ²⁰ Por, në qoftë se unë i nxjerr djajtë me pushtetin e Hyjit, atëherë me të vërtetë erdhi ndër ju Mbretëria e Hyjit!

²¹ Kur trimi i fortë, i armatosur mirë, e ruan pallatin e vet, mbarë pasuria e tij është e sigurt. ²² Por, kur vjen një më i fortë se ai, e mund atë, ia merr armët në të cilat shpresoi e i ndan plaçkat e tija.

²³ Kush nuk është me mua, është kundër meje. Kush nuk bashkon me mua, shpërndan.”

 

Fjala e Zotit

 

Lutja mbi dhurata

 

Po të lutemi, o Zot, na pastro nga çdo njollë mëkati, që të mund të të pëlqejnë dhuratat tona dhe pasi na premtove shpërblimet e së vërtetës sate, mos lejo të jepemi pas gëzimeve të rrejshme. Nëpër Krishtin Zotin tonë.

 

PREFACIONI I KRESHMËVE – III

Frytet e pendesës

 

41. Ky prefacion thuhet në Meshët e ditëve të lira të Kreshmëve dhe në ditë agjërimi.

 

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

 

Përnjëmend është punë e denjë dhe e drejtë,

është detyra jonë dhe burim shpëtimi

të të falënderojmë gjithmonë e gjithkund ty,

o Zot, Atë i shenjtë, Hyj i gjithëpushtetshëm dhe i amshuar.

Ti deshe që ne të të falënderojmë

me anën e mbajtjes së Kreshmëve

që neve mëkatarëve na e zbut krenarinë

dhe duke na nxitur t’i ndihmojmë skamnorët

na bën t’i përngjajmë dashamirësisë sate.

Dhe prandaj, po të madhërojmë bashkë me engjëjt e panumërt

duke kënduar këngën e lavdit:

Shenjt, Shenjt, Shenjt...

 

PREFACIONI I KRESHMËVE – IV

Frytet e agjërimit

 

42. Ky prefacion thuhet në Meshët e ditëve të lira të Kreshmëve dhe në ditë agjërimi.

 

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

 

Përnjëmend është punë e denjë dhe e drejtë,

është detyra jonë dhe burim shpëtimi

të të falënderojmë gjithmonë e gjithkund ty,

o Zot, Atë i shenjtë, Hyj i gjithëpushtetshëm dhe i amshuar.

Ti me agjërim trupor i ndrydh veset, e lartëson mendjen

dhe jep virtytet e shpërblimet,

nëpër Krishtin, Zotin tonë.

Nëpër të engjëjt e lavdërojnë madhërinë tënde,

zotëruesit të adhurojnë e dridhen pushtetet.

Qiejt e fuqitë qiellore e serafinët e lumtur

bashkohen për të brohoritur me galdim.

Me ta, po të lutemi, bëj të marrin pjesë edhe zërat tanë

ndërsa përvujtërisht po themi:

Shenjt, Shenjt, Shenjt...

 

Antifona e kungimit Ps 118, 4-5

 

Ti i shpalle urdhërimet e tua që të mbahen përpikërisht. Oh, sikur të ishin të drejta udhët e mia për t’i zbatuar rregulloret e tua.

 

Lutja pas kungimit

 

O Zot, që na ushqen me kungimin e shenjtë, në mirësinë tënde na ndihmo që me sakramentet dhe me jetën tonë të pranojmë fuqinë e shpëtimit tënd. Nëpër Krishtin Zotin tonë.

 

Lutja mbi popull

 

Po kërkojmë mirësinë tënde, o Zot, duke shpresuar në mëshirën tënde, që sikurse prej teje kemi marrë ekzistencën tonë, po ashtu, me hirin tënd, të marrim vullnet të mirë dhe të zbatojmë të mirën që dëshirojmë. Nëpër Krishtin Zotin tonë.