Leximet e ditës

JAVA E TRETË E KRESHMEVE

 

E PREMTE

 

Antifona e hyrjes Ps 85, 8. 10

 

Nuk ka hyjni që të përngjet ty, o Zot, sepse ti je i madhërueshëm e bën mrekulli. Ti je i vetmi Hyj.

 

Kolekta

 

Ndiko, o Zot, po të lutemi, hirin tënd në zemrat tona, që gjithmonë të ruhemi nga teprimet njerëzore, e të mund të jepemi, me ndihmën tënde, pas këshillave qiellore. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Oz 14, 2-10) (fq. 1244)

 

S’do t’i thërrasim më ‘Hyji ynë!’ veprat e duarve tona.

 

Lexim prej librit të Ozesë profet

 

Kështu thotë Zoti Hyj, ² Kthehu, o Izrael, te Zoti, Hyji yt sepse faji yt është që more në thua! ³ Bëni gati fjalët e lutjes edhe kthehuni kah Zoti e thoni: ‘Na shlyej fajet, prano të mirën që mund të bëjmë e do të kushtojmë frytin e buzëve tona. ⁴ Asiria s’do të na shpëtojë, kalit në shpinë nuk do t’i hipim as s’do t’i thërrasim më ‘Hyjnitë tona!’ veprat e duarve tona, sepse në ty bonjaku e gjen mëshirën.’

 ⁵ “Do t’ua shëroj pabesnikërinë, do t’i dua me bujari, sepse m’u largua zemërimi prej tyre.

Vesë do të jem për Izraelin, porsi zambaku do të lulëzojë, si Libani do të lëshojë rrënjët. ⁷ Hapët e drejtë do t’i shtrijë gemat, bukurinë do të ketë të ullirit, era e tij erë e Libanit. ⁸ Do të vijnë të rrinë nën hijen time, do të bëjnë të përparojë gruri, porsi vreshti do të lulëzojnë, verë të përmendur si vera e Libanit.

⁹ Efraimi ç’ka më të përbashkët me idhuj? Unë e vështroj e kujdesem për të. Unë si bredhi gjithmonë i blertë: prej meje të vjen fryti yt!”

¹⁰ Kush është i urtë, t’i marrë vesh këto, Kush është i mençur, do t’i dijë këto! Të drejta janë rrugët e Zotit e të drejtët nëpër to ecin, ndërsa të këqijtë në to marrin në thua.

 

Fjala e Zotit

 

Psalmi 81 (80), 6c-8a.8bc-9.10-11ab.14.17 (fq. 752)

 

Ref. O Zot, ti i ke fjalët e jetës së pasosur.

 

⁶ Dëgjova një zë që s’e njihja:

⁷ “Nga barra krahët ia çlirova,

nga duart ia hoqa shportën.

⁸ Në ditë të vështirë më thirre e unë të shpëtova.

 

Ref. O Zot, ti i ke fjalët e jetës së pasosur.

 

Të jam përgjigjur i fshehur në stuhi,

të vura në provë tek uji i Meribës.

⁹ Dëgjo, populli im, dua të të qortoj:

oh sikur të më dëgjoje, ti, o Izrael!

 

Ref. O Zot, ti i ke fjalët e jetës së pasosur.

 

¹⁰ Pranë teje tjetër zot të mos kesh,

zot të huaj mos adhuro!

¹¹ Sepse unë Zoti jam Hyji yt,

unë që të nxora nga dheu i Egjiptit!

 

Ref. O Zot, ti i ke fjalët e jetës së pasosur.

 

¹² Por populli im s’e dëgjoi zërin tim,

Izraeli nuk pati kujdes për mua.

¹⁷ Unë do t’i ushqeja me më të mirin grurë,

do t’i ngija me mjaltë të nxjerrë nga shkëmbi”.

 

Ref. O Zot, ti i ke fjalët e jetës së pasosur.

 

Lavdi ty, o Krisht, Mbret i lavdisë së amshuar!

Kthehuni, thotë Zoti, sepse mbretëria e Hyjit është ngjat. (krh. Mt 4, 17)

Lavdi ty, o Krisht, Mbret i lavdisë së amshuar!

 

Ungjilli (Mk 12, 28b-34) (fq. 1448)

 

Zoti Hyji ynë, është një Zot i vetëm: duaje Zotin, Hyjin tënd.

 

Leximi i Ungjillit të shenjtë sipas Markut

 

²⁸ Në atë kohë, një nga skribët ju afrua Jezusit dhe e pyeti: “Cili urdhërim është i pari i të gjitha urdhërimeve?”

²⁹ Jezusi i përgjigji: “I pari është: ‘Dëgjo, Izrael! Zoti Hyji ynë, është një Zot i vetëm. ³⁰ Duaje Zotin, Hyjin tënd, me gjithë zemrën tënde, me gjithë mendjen tënde e me gjithë fuqinë tënde!’ ³¹ Urdhri i dytë është: ‘Duaje të afërmin tënd porsi vetveten!’ Tjetër urdhër më të madh se këta nuk ka.”

³² Skribi u përgjigj: “Mirë fort, Mësues! U përgjigje ashtu siç është e vërteta! Ai është i Vetmi, e pos tij s’ka tjetër. ³³ Të duash Atë me gjithë zemër, me gjithë mendje, me gjithë fuqi e të duash të afërmin tënd porsi vetveten, ’ vlen më shumë se të gjitha flitë e shkrumbimit e theroret.”

³⁴ Jezusi, duke parë se u përgjigj me urti, i tha: “Nuk je larg prej Mbretërisë së Hyjit.” Dhe askush s’pati më guxim të hyjë me të në rragatje.

 

Fjala e Zotit

 

Lutja mbi dhurata

 

Priri, o Zot, sytë e tu mbi dhuratat që po t’i kushtojmë: që të të pëlqejnë ty dhe neve të na japin shpëtimin. Nëpër Krishtin Zotin tonë.

 

PREFACIONI I KRESHMËVE – III

Frytet e pendesës

 

41. Ky prefacion thuhet në Meshët e ditëve të lira të Kreshmëve dhe në ditë agjërimi.

 

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

 

Përnjëmend është punë e denjë dhe e drejtë,

është detyra jonë dhe burim shpëtimi

të të falënderojmë gjithmonë e gjithkund ty,

o Zot, Atë i shenjtë, Hyj i gjithëpushtetshëm dhe i amshuar.

Ti deshe që ne të të falënderojmë

me anën e mbajtjes së Kreshmëve

që neve mëkatarëve na e zbut krenarinë

dhe duke na nxitur t’i ndihmojmë skamnorët

na bën t’i përngjajmë dashamirësisë sate.

Dhe prandaj, po të madhërojmë bashkë me engjëjt e panumërt

duke kënduar këngën e lavdit:

Shenjt, Shenjt, Shenjt...

 

PREFACIONI I KRESHMËVE – IV

Frytet e agjërimit

 

42. Ky prefacion thuhet në Meshët e ditëve të lira të Kreshmëve dhe në ditë agjërimi.

 

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

 

Përnjëmend është punë e denjë dhe e drejtë,

është detyra jonë dhe burim shpëtimi

të të falënderojmë gjithmonë e gjithkund ty,

o Zot, Atë i shenjtë, Hyj i gjithëpushtetshëm dhe i amshuar.

Ti me agjërim trupor i ndrydh veset, e lartëson mendjen

dhe jep virtytet e shpërblimet,

nëpër Krishtin, Zotin tonë.

Nëpër të engjëjt e lavdërojnë madhërinë tënde,

zotëruesit të adhurojnë e dridhen pushtetet.

Qiejt e fuqitë qiellore e serafinët e lumtur

bashkohen për të brohoritur me galdim.

Me ta, po të lutemi, bëj të marrin pjesë edhe zërat tanë

ndërsa përvujtërisht po themi:

Shenjt, Shenjt, Shenjt...

 

Antifona e kungimit Krh. Mk 12, 33

 

Të duash Hyjin me gjithë zemër dhe të afërmin porsi vetveten, vlen më shumë se të gjitha flitë.

 

Lutja pas kungimit

 

Po të lutemi, o Zot, që veprimi i fuqisë sate të përshkojë shpirtin dhe trupin tonë, kështu që, çka morëm me kungim, ta gëzojmë me shëlbimin e plotë. Nëpër Krishtin Zotin tonë.

 

Lutja mbi popull

 

Shikoji me mirësi, o Zot, besimtarët e tu që po kërkojnë mëshirën tënde, sikurse ata besojnë në bamirësinë tënde, ashtu të përhapin dhuratat e dashurisë sate. Nëpër Krishtin Zotin tonë.