Leximet e ditës
JAVA E TRETË E KRESHMEVE
E SHTUNË
Antifona e hyrjes Ps 102, 2-3
Bekoje, shpirti im Zotin dhe i mos i harro bamirësitë e tij, ai i fal të gjitha fajësitë e tua.
Kolekta
Duke kremtuar me gëzim këto kreshme, po të lutemi, o Zot, që të përshkuar me misteret pashkore, t’i gëzojmë plotësisht frytet e tyre. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.
Leximi i parë (Oz 6, 1-6) (fq. 1237)
Dashurinë dua e jo flinë.
Lexim prej librit të Ozesë profet
1 Ejani të kthehemi te Zoti! Ai na bëri kortarë – kortarë Ai edhe do të na shërojë, na goditi, por edhe do të na shëndoshë. 2 Pas dy ditësh do të na e kthejë jetën, të tretën ditë do të na çojë në këmbë, do të jetojmë në praninë e tij. 3 Le ta njohim, le ta ndjekim për njohjen e Zotit. E sigurt si agimi ardhja e tij, do të vijë porsi shiu për ne i përshtatshëm, si shiu i vjeshtës që lag tokën.
4 Çka do të bëj për ty, o Efraim, çka do të bëj për ty, o Judë? Re mëngjesi dashuria juaj e kalon si vesa e mëngjesit. 5 Këndej i latova me anë të profetëve, i vrava me fjalë të gojës sime, gjyqi im do të lindë si drita. 6 Dashurinë dua e jo flinë, njohjen e Hyjit më se holokaustet.
Fjala e Zotit
Psalmi 51 (50), 3-4.18-19.20-21ab (fq. 714)
Ref. Ti, o Zot, i pëlqen të përvuajturit në zemër.
3 Ki mëshirë për mua, o Hyj, sipas mëshirës sate,
pashë mirësinë tënde shlyeje mëkatin tim!
4 Më laj krejtësisht prej mëkatit tim
e më pastro prej fajit tim!
Ref. Ti, o Zot, i pëlqen të përvuajturit në zemër.
18 Sepse ti nuk kënaqesh në fli,
e, nëse të kushtoj fli shkrumbimi, s’të pëlqejnë.
19 Flija e vërtetë për Hyjin: shpirti i penduar;
ti, o Hyj, nuk e përbuz zemrën e penduar, të thërmuar!
Ref. Ti, o Zot, i pëlqen të përvuajturit në zemër.
20 Pashë mirësinë tënde, o Zot, bëji mirë Sionit,
ndreqi përsëri muret e Jerusalemit.
21 Atëherë do t’i pranosh flitë e drejtësisë,
flitë e shkrumbimit e të gjitha kushtet.
Ref. Ti, o Zot, i pëlqen të përvuajturit në zemër.
Lavdi ty, o Krisht, Mbret i lavdisë së amshuar!
Sot mos e bëni zemrën tuaj gur por dëgjojeni zërin e Zotit. (krh. Ps 95 (94), 8ab)
Lavdi ty, o Krisht, Mbret i lavdisë së amshuar!
Ungjilli (Lk 18, 9-14) (fq. 1491)
Tagrambledhësi u kthye në shtëpinë e vet i shfajësuar, e fariseu jo.
Leximi i Ungjillit të shenjtë sipas Lukës
Në atë kohë, 9 Jezusi ju tregoi edhe këtë shëmbëlltyrë për disa që e mbanin veten të drejtë e i përbuznin tjerët: 10 “Dy njerëz u ngjitën në Tempull për t’u lutur: njëri farise e tjetri tagrambledhës.
11 Fariseu, qiri në këmbë, lutej në vetvete kështu: ‘Të falënderoj, o Hyj, që nuk jam porsi njerëzit tjerë: cuba, të padrejtë, kurorëshkelës, ose ‑ si ky tagrambledhës. 12 Agjëroj dy herë në javë, jap të dhjetën e krejt fitesës.’
13 Kurse tagrambledhësi zuri vend në fund, nuk i bëhej as sytë t’i ngrejë drejtë qiellit, por rrihte kraharorin e vet e thoshte: ‘O Hyj, ki mëshirë për mua mëkatarin!’
14 Unë po ju them: ky u kthye në shtëpinë e vet i shfajësuar e jo ai, sepse: kushdo krenohet, do të përvujtërohet ndërsa kush përvujtërohet, do të lartësohet.”
Fjala e Zotit
Lutja mbi dhurata
O Hyj, me hirin tënd, me zemër të pastruar, u afrohemi mistereve të tua. Bëj, po të lutemi, që me kremtimin e themelimin e tyre të ta japim ty nderimin e duhur. Nëpër Krishtin Zotin tonë.
PREFACIONI I KRESHMËVE – III
Frytet e pendesës
41. Ky prefacion thuhet në Meshët e ditëve të lira të Kreshmëve dhe në ditë agjërimi.
M. Zoti qoftë me ju.
P. Dhe me shpirtin tënd.
M. T’i lartësojmë zemrat.
P. I kemi te Zoti.
M. Të falënderojmë Zotin, Hyjin tonë.
P. Është punë e denjë dhe e drejtë.
Përnjëmend është punë e denjë dhe e drejtë,
është detyra jonë dhe burim shpëtimi
të të falënderojmë gjithmonë e gjithkund ty,
o Zot, Atë i shenjtë, Hyj i gjithëpushtetshëm dhe i amshuar.
Ti deshe që ne të të falënderojmë
me anën e mbajtjes së Kreshmëve
që neve mëkatarëve na e zbut krenarinë
dhe duke na nxitur t’i ndihmojmë skamnorët
na bën t’i përngjajmë dashamirësisë sate.
Dhe prandaj, po të madhërojmë bashkë me engjëjt e panumërt
duke kënduar këngën e lavdit:
Shenjt, Shenjt, Shenjt...
PREFACIONI I KRESHMËVE – IV
Frytet e agjërimit
42. Ky prefacion thuhet në Meshët e ditëve të lira të Kreshmëve dhe në ditë agjërimi.
M. Zoti qoftë me ju.
P. Dhe me shpirtin tënd.
M. T’i lartësojmë zemrat.
P. I kemi te Zoti.
M. Të falënderojmë Zotin, Hyjin tonë.
P. Është punë e denjë dhe e drejtë.
Përnjëmend është punë e denjë dhe e drejtë,
është detyra jonë dhe burim shpëtimi
të të falënderojmë gjithmonë e gjithkund ty,
o Zot, Atë i shenjtë, Hyj i gjithëpushtetshëm dhe i amshuar.
Ti me agjërim trupor i ndrydh veset, e lartëson mendjen
dhe jep virtytet e shpërblimet,
nëpër Krishtin, Zotin tonë.
Nëpër të engjëjt e lavdërojnë madhërinë tënde,
zotëruesit të adhurojnë e dridhen pushtetet.
Qiejt e fuqitë qiellore e serafinët e lumtur
bashkohen për të brohoritur me galdim.
Me ta, po të lutemi, bëj të marrin pjesë edhe zërat tanë
ndërsa përvujtërisht po themi:
Shenjt, Shenjt, Shenjt...
Antifona e kungimit Lk 18, 13
Tagrambledhësi zuri vend në fund, rrihte kraharorin e vet dhe thoshte: O Hyj, ki mëshirë për mua mëkatarin.
Lutja pas kungimit
Bëj, po të lutemi, o Hyj i mëshirshëm, t’i afrohemi me nderim të çiltër dhe ta pranojmë me zemër të pastër kungimin e shenjtë me të cilin vazhdimisht ushqehemi. Nëpër Krishtin Zotin tonë.
Lutja mbi popull
Shtrijua besimtarëve të tu, o Zot, të djathtën tënde me ndihmë qiellore, që të të kërkojnë ty me gjithë zemër dhe të meritojnë ta fitojnë atë, që denjësisht lypin. Nëpër Krishtin Zotin tonë.