Leximet e ditës

JAVA E PESTË E KRESHMEVE

 

E MARTË

 

Antifona e hyrjes Ps 26. 14

 

Shpreso në Zotin, bëhu burrë, ji zemërfortë e prite Zotin.

 

Kolekta

 

Bëj, po të lutemi, o Zot, të qëndrojmë në shërbimin e vullnetit tënd, që edhe në kohën tonë Kisha jote të shtohet për nga numri i anëtarëve dhe përtërirja e shpirtit. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Nr 21, 4-9) (fq. 195)

 

Kushdo që, pasi ta ketë ngrënë gjarpri, e shikon gjarprin e punuar, do të shpëtojë.

 

Lexim prej librit të Numrave

 

Në ato ditë, ⁴ Izraelitët u nisën prej malit Hor për t’i rënë tërthor tokës së Edomit udhës që shpie te Deti i Kuq. Por populli udhës filloi ta humbasë durimin, ⁵ zuri të ankohej kundër Zotit e Moisiut. Thonin: “Pse na nxore nga Egjipti a për të vdekur në këtë shkretëtirë? S’ka bukë, s’ka ujë; kurse kjo e zezëhaje na e mërziti shpirtin”!

⁶ Për këtë arsye Zoti çoi në popull gjarpërinj të hidhur, të cilët e hanin popullin dhe vdiqën shumë njerëz prej Izraelit. ⁷ Atëherë erdhën te Moisiu e i thanë: “Bëmë mëkat kur folëm kundër Zotit e kundër teje; lutu ti që të na i heqë qafës gjarpërinjtë”!

Moisiu u lut për popull, ⁸ e Zoti tha: “Punoje gjarprin helmues e vëre në shtyllë si shenjë: kushdo, pasi ta ketë ngrënë gjarpri, po qe se e shikon, do të shpëtojë”.

⁹ Moisiu e punoi një gjarpër prej bronzit dhe e vuri për shenjë; këdo që hante gjarpri, si e shikonte atë, shërohej.

 

Fjala e Zotit

 

Psalmi 102 (101), 2-3.16-18.19-21 (fq. 773)

 

Ref. Dëgjoje, o Zot, lutjen time.

 

² O Zot, dëgjoje lutjen time

e britma ime le të mbërrijë tek ti.

³ Mos e fsheh fytyrën tënde para meje

në ditën time të vështirë,

prire veshin tënd drejt meje:

kurdo që të thërras më dëgjo shpejt!

 

Ref. Dëgjoje, o Zot, lutjen time.

 

¹⁶ Paganët do ta druajnë Emrin tënd, o Zot,

të gjithë mbretërit e tokës lavdinë tënde.

¹⁷ Sepse Zoti e ndërtoi Sionin,

u dëftua në lavdinë e vet.

¹⁸ E mori parasysh lutjen e të vobektëve

dhe nuk e përbuzi uratën e tyre.

 

Ref. Dëgjoje, o Zot, lutjen time.

 

¹⁹ Le të shënohet kjo për brezninë e ardhshme

dhe populli që do të vijë le ta lavdërojë Zotin.

²⁰ Sepse Zoti shikon nga Shenjtërorja e vet e lartë,

nga qielli ai vrojton mbi tokë,

²¹ për t’i dëgjuar ofshamat e robërve,

për t’i shpëtuar të dënuarit me vdekje.

 

Ref. Dëgjoje, o Zot, lutjen time.

 

Lavdi ty, o Krisht, Mbret i lavdisë së amshuar!

Fara është fjala e Hyjit, mbjellësi është Krishti: kushdo e gjënë atë, e ka jetën e pasosur.

Lavdi ty, o Krisht, Mbret i lavdisë së amshuar!

 

Ungjilli (Gjn 8, 21-30) (fq. 1519/20)

 

Kur ta ngritni Birin e njeriut, atëherë do ta merrni vesh se UNË JAM.

 

Leximi i Ungjillit të shenjtë sipas Gjonit

 

Në atë kohë ²¹ Jezusi u tha farisenjve: “Unë po shkoj e ju do të më kërkoni dhe do të vdisni në mëkatin tuaj. Ku unë shkoj, ju s’mund të vini.” ²² Atëherë judenjtë thanë: “A mos mendon të vrasë veten pasi thotë: ‘Ku unë shkoj ju s’mund të vini?’“

²³ E Jezusi u tha: “Ju jeni prej këtu poshtë kurse unë jam prej së Larti. Ju jeni prej kësaj bote kurse unë nuk jam prej kësaj bote. ²⁴ Prandaj edhe ju thashë: ‘Do të vdisni në mëkatet tuaja!’ Për të vërtetë nëse nuk besoni se UNË JAM do të vdisni në mëkatet tuaja.” ²⁵ Atëherë ata i thanë: “Kush je ti?” “Po përse ‑ u përgjigj Jezusi ‑ t’ju tregoj prapë prej fillimit? ²⁶ Shumë gjëra kam për të thënë për ju e të gjykoj; porse Ai, që më dërgoi, është i vërtetë dhe çka dëgjova prej Tij atë i them botës.” ²⁷ Ata nuk e morën vesh se u foli për Atin.

²⁸ Atëherë Jezusi u tha: “Kur ta ngritni Birin e njeriut, atëherë do ta merrni vesh se UNË JAM dhe se prej vetvetes nuk bëj asgjë, por flas ashtu si më mësoi Ati. ²⁹ Ai që më dërgoi, është me mua e nuk më la vetëm, sepse unë gjithmonë bëj çka i pëlqen Atij.” ³⁰ Në këto fjalë të tij, shumë besuan në Të.

 

Fjala e Zotit

 

Lutja mbi dhurata

 

Po ta kushtojmë, o Zot, flinë e pajtimit, që në mirësinë tënde t’i falësh fajet tona dhe zemrat tona të luhatshme t’i drejtosh nga Ti. Nëpër Krishtin Zotin tonë.

 

PREFACIONI I MUNDIMIT TË ZOTIT – I

Fuqia e Kryqit

 

43. Ky prefacion thuhet brenda javës së pestë të Kreshmëve dhe në Meshët e misterit të Kryqit dhe të Mundimit të Zotit.

 

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

 

Përnjëmend është punë e denjë dhe e drejtë,

është detyra jonë dhe burim shpëtimi

të të falënderojmë gjithmonë e gjithkund ty,

o Zot, Atë i shenjtë, Hyj i gjithëpushtetshëm dhe i amshuar.

Me mundimet shëlbimprurëse të Birit tënd,

mbarë bota mësoi ta shpallë madhërinë tënde,

e nëpër fuqinë e patregueshme të Kryqit,

kryhet gjykimi i botës dhe shfaqet pushteti i të Kryqëzuarit.

Dhe prandaj edhe ne, o Zot, bashkë me engjëj

dhe me të gjithë shenjtërit

po të madhërojmë, duke thënë me galdim:

Shenjt, Shenjt, Shenjt...

 

Antifona e kungimit Gjn 12, 32

 

Kur të jem lartësuar nga toka, do t’i tërheq tek unë të gjithë, thotë Zoti.

 

Lutja pas kungimit

 

O Hyj i gjithëpushtetshëm, bëj që pjesëmarrja jonë e vazhdueshme në misteret e tua, të na afrojë përherë e më fort nga të mirat qiellore. Nëpër Krishtin Zotin tonë.

 

Lutja mbi popull

 

O Hyj, atyre që shpresojnë në ty Ti u dëftohesh jo i hidhëruar, por i mëshirshëm, bëj që besimtarët e tu të pendohen sinqerisht për të keqen që kanë ushtruar, që të meritojnë të fitojnë hirin e ngushëllimit tënd. Nëpër Krishtin Zotin tonë.