Leximet e ditës

JAVA E MADHE

 

E MARTË

 

Antifona e hyrjes Krh. Ps 26, 12

 

Mos më lësho në pamëshirën e armiqve të mi, o Zot, sepse u ngritën kundër meje dëshmitarë të rrejshëm, të cilët shfrynë dhunë.

 

Kolekta

 

O Hyj i gjithëpushtetshëm dhe i amshuar, bëj që ashtu t’i kremtojmë misteret e mundimeve të Zotit, që të mund të fitojmë faljen e mëkateve. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Is 49, 1-6) (fq. 1030)

 

Do të caktoj të jesh drita e popujve, që shëlbimi im të arrijë në skaj të tokës.

 

Lexim prej librit të Isaisë profet

 

¹ Më dëgjoni, o ishuj, vështroni me kujdes, popuj të largët: Zoti më thirri prej prehrit të nënës, prej barkut të nënës sime iu kujtua emri im. ² Gojën time e bëri shpatë të mprehtë, më mbrojti nën hijen e dorës së vet, më bëri shigjetë të zgjedhur e më fshehu në kukurrën e vet.

 ³ Ai më tha: “Shërbëtori im je, o Izrael, në të cilin do ta dëftoj lavdinë time!” ⁴ E unë thashë: “Kot u mundova, më kot forcat i treta të miat! Megjithatë, e drejta ime është me Zotin, shpërblimi im është te Hyji im.”

⁵ E tash thotë Zoti që më trajtoi që nga kraharori shërbëtor për vete, për t’ia kthyer Jakobin Atij, për ta mbledhur rreth tij Izraelin. U bëra i lavdishëm ndër sytë e Zotit, Hyji im u bë fuqia ime. ⁶ Ai më tha: “Tepër pak është të më jesh shërbëtor për t’i rilindur fiset e Jakobit, për t’i riatdhesuar Tepricat e Izraelit: por të caktoj të jesh drita e popujve që shëlbimi im të arrijë në skaj të tokës!”

 

Fjala e Zotit

 

Psalmi 71 (70), 1-2.3-4a.5ab-6ab.15.17 (fq. 736)

 

Ref. Goja ime do ta shpallë shëlbimin tënd, o Zot.

 

¹ Në ndore tënde, o Zot,

askurrë mos u turpërofsha.

² Më shpëto e më dil zot pashë drejtësinë tënde,

prire mbi mua veshin tënd e më shëlbo!

 

Ref. Goja ime do ta shpallë shëlbimin tënd, o Zot.

 

³ Ji për mua shkëmb mbrojtjeje,

kullë e pamposhtur për të më shpëtuar,

sepse ti je kështjella ime e strehimi im.

⁴ Hyji im, më shpëto prej dorës së mëkatarit.

 

Ref. Goja ime do ta shpallë shëlbimin tënd, o Zot.

 

⁵ Sepse ti, o Zot, je shpresa ime,

Mbështetja ime , o Zot, që prej rinisë sime.

⁶ Në ty jam mbështetur që prej kraharorit të nënës,

që prej prehrit të nënës ti je mbrojtësi im.

 

Ref. Goja ime do ta shpallë shëlbimin tënd, o Zot.

 

¹⁵ Goja ime do ta shpallë drejtësinë tënde,

gjithë ditën shpëtimin tënd:

që s’di të ketë masë në madhëri.

¹⁷ Ti më ke mësuar, o Hyj, qysh prej rinisë sime

dhe ende sot i kumtoj mrekullitë e tua.

 

Ref. Goja ime do ta shpallë shëlbimin tënd, o Zot.

 

Lavdi ty, o Krisht, Mbret i lavdisë së amshuar!

Lavdi të qoftë ty, o Mbreti ynë, i dëgjueshmi i Atit: të vunë në kryq, sikurse qengjin që e çojnë në therore.

Lavdi ty, o Krisht, Mbret i lavdisë së amshuar!

 

Ungjilli (Gjn 13, 21-33.36-38) (fq. 1530/1)

 

Njëri prej jush do të më tradhtojë. Para se të këndojë gjeli, ti do të më mohosh tri herë!

 

Leximi i Ungjillit të shenjtë sipas Gjonit

 

Në atë kohë, derisa Jezusi ishte ende në darkë me nxënësit e vet ²¹ i tronditur në shpirt, shpalli: “Përnjëmend, përnjëmend po ju them: njëri prej jush do të më tradhtojë.”

²² Atëherë nxënësit shikuan njëri‑tjetrin duke mos ditur për cilin po fliste. ²³ Njëri prej nxënësve, ai, të cilin Jezusi e donte veçanërisht, ishte në tryezë përbri parzmës së Jezusit. ²⁴ Atëherë Simon Pjetri i dha shenjë ta pyeste Jezusin për cilin po thoshte: ²⁵ Ky atëherë iu mbështet Jezusit në parzëm dhe e pyeti: “Zotëri, cili është?” ²⁶ Jezusi i përgjigji: “Ky, të cilit po ia jap kafshatën pasi ta ngjyej në kupë.” Atëherë e ngjeu kafshatën [e mori dhe] ia dha Judës së Simon Iskariotit. ²⁷ Pas kësaj kafshate në të hyri djalli.

Atëherë Jezusi i tha: “Ç’ke në mend të bësh, bëje shpejt!” ²⁸ Askush prej atyre që ishin në tryezë nuk e mori vesh pse i tha ashtu. ²⁹ E, pasi Juda mbante qesen, disa menduan se Jezusi i tha të shkojë të blejë çka duhet për festë, ose t’u japë ndonjë gjë skamnorëve. ³⁰ Juda, posa mori kafshatën, menjëherë doli jashtë. Ishte natë.

³¹ Pasi Juda doli përjashta, Jezusi tha: “Tani u lavdërua Biri i njeriut! Edhe Hyji u lavdërua në të! ³² [Nëse Hyji u lavdërua në të] edhe Hyji do ta lavdërojë atë në vetvete. Po, madje menjëherë do ta lavdërojë! ³³ Fëmijëzit e mi! Edhe pak kohë jam me ju! Do të më kërkoni, por, sikurse u thashë judenjve, tani po ju them edhe juve: ‘ku unë po shkoj, ju nuk mund të vini.’

³⁶ Simon Pjetri i tha: “Zotëri, ku mendon të shkosh?” Jezusi i përgjigji: “Ku unë mendoj të shkoj, ti tani nuk mund të më ndjekësh; por më vonë do të më ndjekësh.” ³⁷ “Zotëri ‑ i tha atëherë Pjetri ‑ E pse tani nuk mund të vij pas teje? Unë do ta jap jetën për ty!” ³⁸ Jezusi përgjigji: “Ti do ta japësh jetën tënde për mua? Përnjëmend, përnjëmend po të them: para se të këndojë gjeli, ti do të më mohosh tri herë!”

 

Fjala e Zotit

 

Lutja mbi dhurata

 

O Zot, shikoji me mirësi kushtet e familjes sate dhe, pasi e bën pjesëtare në mistere të shenjta, jepi fatin të arrijë plotësinë e tyre. Nëpër Krishtin Zotin tonë.

 

PREFACIONI I MUNDIMIT TË ZOTIT – II

Fitorja e Mundimit

 

44. Ky prefacion thuhet të hënën, të martën, dhe të mërkurën e Javës së Shenjtë.

 

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

 

Përnjëmend është punë e denjë dhe e drejtë,

është detyra jonë dhe burim shpëtimi

të të falënderojmë gjithmonë e gjithkund ty,

o Zot, Atë i shenjtë, Hyj i gjithëpushtetshëm dhe i amshuar,

nëpër Krishtin, Zotin tonë.

Po afrohen ditët e mundimit shëlbimprurës

dhe të ngjalljes së lavdishme të tij,

kur kremtojmë ngadhënjimin e tij

mbi krenarinë e armikut të vjetër

dhe përkujtojmë misterin e shëlbimit tonë.

Nëpër të e adhurojnë madhërinë tënde fuqitë engjëllore

që për amshim galdojnë në praninë e fytyrës sate.

Me ta, po të lutemi, bëj të marrin pjesë edhe zërat tanë,

që, të shoqëruar në galdim, po themi:

Shenjt, Shenjt, Shenjt...

 

Antifona e kungimit Rom 8, 32

 

Hyji as Birin e vet nuk e kurseu, por e dorëzoi të flijohet për ne të gjithë.

 

Lutja pas kungimit

 

Të ushqyer me dhuratën shpëtimtare, po i lutemi, o Zot, mirësisë sate, që, në saje të këtij sakramenti, me të cilin na forcon në këtë jetë tokësore, ta fitojmë jetën e pasosur. Nëpër Krishtin Zotin tonë.

 

Lutja mbi popull

 

Mëshira jote, o Hyj, e pastroftë popullin tënd nga të gjitha veset e të kaluarës dhe e bëftë të aftë për jetën e shenjtë, të re. Nëpër Krishtin Zotin tonë.