Leximet e ditës

JAVA E DYTË E PASHKËVE

 

E MARTË

 

Antifona e hyrjes Zb 19, 7. 6

 

Le të galdojmë e të brohorisim dhe t’i japim lavdi Hyjit, sepse mbretëroi Zoti, Hyji ynë, i Gjithëpushtetshmi, aleluja.

 

Kolekta

 

O Hyj i gjithëpushtetshëm, bëj, po të lutemi, ta shpallim fuqinë e Krishtit të ngjallur, që, sikurse e morëm pengun e jetës së re, të mund të çmojmë të gjitha dhuratat që na jepen. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Vap 4, 32-37) (fq. 1550/1)

 

Një zemër e vetme dhe një shpirt i vetëm.

 

Lexim prej Veprave të Apostujve

 

³² Në bashkësinë e besimtarëve mbretëronte një përkim i plotë. Askush nuk e quante të vetën çkado që kishte, por ndër ta gjithçka ishte e përbashkët.

³³ Apostujt me fuqi të madhe jepnin dëshmi mbi ngjalljen e Zotërisë Jezus e të gjithë gëzonin nderim të madh.

³⁴ Gjithashtu askush prej sish nuk ishte skamnor, sepse ata që kishin ara e shtëpi i shitnin e çmimin e shitjes e binin ³⁵ dhe e vinin te këmbët e apostujve. Atëherë secilit i jepej aq sa kishte nevojë. ³⁶ Kështu Jozefi, të cilin apostujt e quajtën Barnabë ‑ që do të thotë: biri i ngushëllimit ‑ levit, me prejardhje qipriot, ³⁷ kishte një tokë; e shiti e të hollat ua solli apostujve.

 

Fjala e Zotit

 

Psalmi 93 (92), 1ab.1cd-2.5 (fq. 766)

 

Ref. Në mes nesh mbretëron Hyji i madhërueshëm.

 

¹ Hyji mbretëron! U vesh me madhëri!

Zoti u vesh, me fuqi u ngjesh.

 

Ref. Në mes nesh mbretëron Hyji i madhërueshëm.

 

Të palëkundshme e bëri botën:

assesi s’do të trandet!

² I patundshëm është froni yt qysh prej fillimit,

ti je i amshueshëm!

 

Ref. Në mes nesh mbretëron Hyji i madhërueshëm.

 

⁵ Dëshmitë e tua janë plotësisht të besueshme,

shenjtëria i përket Shtëpisë sate

përgjithmonë e jetës, o Zot.

 

Ref. Në mes nesh mbretëron Hyji i madhërueshëm.

 

Aleluja!

Biri i njeriut duhet të lartësohet, që kushdo të besojë në të ta ketë jetën e pasosur. (krh. Gjn 3, 15)

Aleluja!

 

Ungjilli (Gjn 3, 7-15) (fq. 1508/09)

 

Askush nuk u ngjit në qiell, përveç Birit të njeriut që zbriti nga qielli.

 

Leximi i Ungjillit të shenjtë sipas Gjonit

 

Në atë kohë, Jezusi i tha Nikodemit: ⁷ Mos u çudit që të thashë: ‘Duhet të lindni përsëri prej së Larti.’ ⁸ Era fryn në drejtimin që do; ia dëgjon ushtimën e nuk di nga vjen e kah shkon. Kështu ndodh edhe me secilin që lind prej Shpirtit.”

⁹ Nikodemi e pyeti: “Si mund të bëhet kjo gjë?” ¹⁰ Jezusi iu përgjigj: “Ti je mësues i Izraelit e nuk merr vesh kaq? ¹¹ Për të vërtetë, për të vërtetë, po të them: ne flasim çka dimë e dëshmojmë çka pamë, e megjithatë nuk e pranoni dëshminë tonë. ¹² Nëse nuk më besoni kur ju flas për gjëra që ndodhin në tokë si do të më besoni në qoftë se ju flas për gjërat e qiellit? ¹³ Askush nuk u ngjit në qiell, përveç Birit të njeriut që zbriti nga qielli. ¹⁴ Dhe, sikurse Moisiu e lartësoi gjarprin në shkretëtirë, po ashtu duhet të lartësohet edhe Biri i njeriut, ¹⁵ që kushdo të besojë në të ta ketë jetën e pasosur.

 

Fjala e Zotit

 

Lutja mbi dhurata

 

Bëj, po të lutemi, o Zot, të gëzohemi gjithmonë për këto mistere të Pashkëve, që veprimi i vazhdueshëm shpëtimprurës të bëhet për ne burim i pashtershëm hareje. Nëpër Krishtin Zotin tonë.

 

PREFACIONI I PASHKËVE – IV

Ripërtritja e gjithësisë me anë të misterit të Pashkëve

 

48. Ky prefacion thuhet në kohën e Pashkëve.

 

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

 

Përnjëmend është punë e denjë dhe e drejtë,

është detyra jonë dhe burim shpëtimi

të të lëvdojmë ty, o Zot, në çdo kohë,

por sidomos të madhërojmë më me hare në këtë kohë,

kur u flijua Krishti, Pashka jonë.

Me fitoren mbi mëkatin,

rimëkëmbet mbarë rruzullimi

e në Krishtin, na ripërtërihet jeta.

Prandaj njerëzimi në mbarë botën

galdon me harenë e plotë të Pashkëve.

Por edhe fuqitë e epërme dhe pushtetet engjëllore

e këndojnë himnin e lavdisë sate

duke thënë pa pushim:

 

Shenjt, Shenjt, Shenjt...

 

PREFACIONI I PASHKËVE – V

Krishti prift dhe fli

 

49. Ky prefacion thuhet në kohën e Pashkëve.

 

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

 

Përnjëmend është punë e denjë dhe e drejtë,

është detyra jonë dhe burim shpëtimi

të të lëvdojmë ty, o Zot, në çdo kohë,

por sidomos të madhërojmë më me hare në këtë kohë,

kur u flijua Krishti, Pashka jonë.

Ai, duke e kushtuar trupin e vet,

flitë e vjetra i përmbushi

në flinë e vërtetë të kryqit

dhe duke u dorëzuar në duart e tua për shpëtimin tonë,

u dëftua prift, altar dhe qengj i vërtetë.

Prandaj njerëzimi në mbarë botën

galdon me harenë e plotë të Pashkëve.

Por edhe fuqitë e epërme dhe pushtetet engjëllore

e këndojnë himnin e lavdisë sate

duke thënë pa pushim:

Shenjt, Shenjt, Shenjt...

 

Antifona e kungimit Krh. Lk 24, 46. 26

 

U desh që Krishti të pësojë mundimet dhe të ringjallet nga të vdekurit për të hyrë në lavdinë e vet, aleluja.

 

Lutja pas kungimit

 

Dëgjoji, o Zot, lutjet tona, që me pjesëmarrje në të mirat e shëlbimit të fitojmë ndihmë për jetën e tanishme e gëzimet e jetës së përhershme. Nëpër Krishtin Zotin tonë.