Leximet e ditës

JAVA E DYTË E PASHKËVE

 

E MËRKURË

 

Antifona e hyrjes Krh. Ps 17, 50; 21, 23

 

Do të të lavdëroj, o Zot, në mes të popujve, do ta shpall emrin tënd ndër vëllezërit e mi, aleluja.

 

Kolekta

 

O Hyj, në përkujtimin vjetor të mistereve, me të cilat njeriun e ripërtërive në dinjitetin e zanafillës dhe ia dhurove shpresën e ngjalljes, me përvujtëri po i lutemi mirësisë sate bëj të fitojmë me dashuri të përhershme atë që kremtojmë me fe. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Vap 5, 17-26) (fq. 1551/2)

 

Njerëzit që ju i qitët në burg qe, janë në Tempull e po mësojnë popullin.

 

Lexim prej Veprave të Apostujve

 

Në atë kohë, ¹⁷ u ngrit kryeprifti dhe mbarë ata të partisë së tij ‑ sekti i saducenjve. Plot smirë ¹⁸ vunë dorë në apostuj dhe i hodhën në burg të përgjithshëm.

¹⁹ Natën engjëlli i Zotit hapi dyert e burgut, i nxori përjashta dhe u tha: ²⁰ “Shkoni në Tempull dhe vazhdoni t’ia kumtoni popullit të gjitha fjalët e kësaj Jete.” ²¹ Ata dëgjuan dhe, në agim, hynë në Tempull dhe mësonin.

Ndërkaq arriti kryeprifti dhe ndjekësit e tij, thirrën Këshillin e Lartë dhe mbarë parësinë e bijve të Izraelit dhe dërguan në burg për të sjellë apostujt. ²² Kur rojtarët mbërritën atje, nuk i gjetën në burg. U kthyen dhe lajmëruan: ²³ ”Burgun e gjetëm të mbyllur me kujdes dhe rojtarët bënin rojë para derës, por kur e hapëm, nuk gjetëm askënd brenda.” ²⁴ Komandanti i rojës së Tempullit dhe kryepriftërinjtë kur e dëgjuan lajmin, të habitur, pyesnin: “Çka do të thotë kjo punë?” ²⁵ Atëherë ia behu dikush dhe u tha: “Njerëzit që ju i futët në burg, ja, janë në Tempull e po mësojnë popullin.”

²⁶ Atëherë komandanti shkoi me rojtarë dhe i solli ‑ por jo me dhunë ‑ sepse e kishin frikë popullin se mos i vriste me gurë.

 

Fjala e Zotit

 

Psalmi 34 (33), 2-3.4-5.6-7.8-9 (fq. 693)

 

Ref. Skamnori thërret në ndihmë e Zoti e dëgjon.

 

Ose: Aleluja, aleluja, aleluja.

 

² Përherë do ta bekoj Zotin,

në gojën time përherë lavdi i tij.

³ Shpirti im mburret në Zotin:

le të dëgjojnë të përvujtët e le të gëzohen.

 

Ref. Skamnori thërret në ndihmë e Zoti e dëgjon.

 

Ose: Aleluja, aleluja, aleluja.

 

⁴ Bashkë me mua jepni lavdi Zotit,

le ta lartësojmë së bashku Emrin e tij.

⁵ E kërkova Zotin e ai më dëgjoi

edhe më çliroi nga çdo frikë që pata.

 

Ref. Skamnori thërret në ndihmë e Zoti e dëgjon.

 

Ose: Aleluja, aleluja, aleluja.

 

⁶ Shikojeni atë e do të ndriçoheni

fytyra juaj nuk do të turpërohet.

⁷ Ja, ky skamnor e thirri në ndihmë e Zoti e dëgjoi

dhe e shpëtoi nga të gjitha vuajtjet e tija.

 

Ref. Skamnori thërret në ndihmë e Zoti e dëgjon.

 

Ose: Aleluja, aleluja, aleluja.

 

⁸ Engjëlli i Zotit ngreh llogore rreth atyre

që e kanë frikë dhe i shpëton.

⁹ Sprovoni e shihni sa i mirë është Zoti!

I lumi ai që shpreson në të!

 

Ref. Skamnori thërret në ndihmë e Zoti e dëgjon.

 

Ose: Aleluja, aleluja, aleluja.

 

Aleluja!

Hyji aq fort e deshi botën sa që e dha një të vetmin Birin e vet kështu që, secili që beson në të, ta ketë jetën e pasosur. ( Gjn 3, 16)

Aleluja!

 

Ungjilli (Gjn 3, 16-21) (fq. 1509)

 

Hyji e dërgoi Birin e vet në botë që ta shpëtojë.

 

Leximi i Ungjillit të shenjtë sipas Gjonit

 

Në atë kohë, Jezusi i tha Nikodemit: ¹⁶ Vërtetë Hyji aq fort e deshi botën sa që e dha një të vetmin Birin e vet kështu që, secili që beson në të, të mos birret, por të ketë jetën e pasosur. ¹⁷ Në të vërtetë Hyji nuk e dërgoi Birin që ta dënojë botën, por që bota të shpëtojë nëpër të. ¹⁸ Kush beson në të, nuk dënohet, ndërsa, kush nuk beson, ai është dënuar që tani, pse nuk besoi në Emrin e Njëlindurit, Birit të Hyjit.

¹⁹ E gjykimi është ky: Drita erdhi në botë, por njerëzit më tepër deshën errësirën se dritën, sepse veprat i kishin të këqija. ²⁰ Vërtet, kushdo që bën të keqen, e urren dritën dhe nuk del në dritë që të mos i zbulohen veprat e tija, ²¹ kurse ai që e vë në zbatim të vërtetën, ai del në dritë që të dalë ballafaqe se veprat e tija u bënë siç thotë Hyji.”

 

Fjala e Zotit

 

Lutja mbi dhurata

 

O Hyj, me shkëmbimin e mrekullueshëm të kësaj flie Ti na bën pjesëtarë të natyrës sate hyjnore, bëj, po të lutemi, që sikurse e kemi njohur të vërtetën tënde, po ashtu edhe ta dëshmojmë me jetë. Nëpër Krishtin Zotin tonë.

 

PREFACIONI I PASHKËVE – I

Misteri i Pashkëve

 

45. Ky prefacion thuhet në kohën e Pashkëve.

 

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

 

Përnjëmend është punë e denjë dhe e drejtë,

është detyra jonë dhe burim shpëtimi

të të lëvdojmë ty, o Zot, në çdo kohë,

por sidomos të madhërojmë më me hare

në këtë (natë) (ditë) (kohë),

kur u flijua Krishti, Pashka jonë.

Dhe njëmend ky është Qengji i vërtetë

që i shleu mëkatet e botës:

duke vdekur, e shkatërroi vdekjen tonë

dhe, duke u ngjallur, na përtëriu jetën.

Prandaj njerëzimi në mbarë botën

galdon me harenë e plotë të Pashkëve.

Por edhe fuqitë e epërme dhe pushtetet engjëllore

e këndojnë himnin e lavdisë sate

duke thënë pa pushim:

 

Shenjt, Shenjt, Shenjt...

 

PREFACIONI I PASHKËVE – II

Jeta e re në Krishtin

 

46. Ky prefacion thuhet në kohën e Pashkëve.

 

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

 

Përnjëmend është punë e denjë dhe e drejtë,

është detyra jonë dhe burim shpëtimi

të të lëvdojmë ty, o Zot, në çdo kohë,

por sidomos të madhërojmë më me hare në këtë kohë,

kur u flijua Krishti, Pashka jonë.

Nëpër të lindin bijtë e dritës për jetën e pasosur

dhe besimtarëve u hapen dyert e parajsës.

Me vdekjen e tij u shëlbua vdekja jonë,

e në ngjalljen e tij u ngjall edhe jeta e të gjithëve.

Prandaj njerëzimi në mbarë botën

galdon me harenë e plotë të Pashkëve.

Por edhe fuqitë e epërme dhe pushtetet engjëllore

e këndojnë himnin e lavdisë sate

duke thënë pa pushim:

 

Shenjt, Shenjt, Shenjt...

 

Antifona e kungimit Krh. Gjn 15, 16.19

 

Unë ju zgjodha nga bota dhe ju caktova të shkoni dhe të jepni fryte, thotë Zoti e fryti juaj të qëndrojë, aleluja.

 

Lutja pas kungimit

 

O Zot, ji gjithmonë me popullin tënd, dhe, pasi e ushqeve atë me misteret qiellore, bëj të kalojë nga ligështia e tanishme në jetën e re. Nëpër Krishtin Zotin tonë.