Leximet e ditës

JAVA E TRETË E PASHKËVE

 

E MËRKURË

 

Antifona e hyrjes Krh. Ps 70, 8.23

 

Goja ime të lavdëron pa pushim, që të mund të të këndoj; do të galdojnë buzët e mia duke të të kënduar ty, aleluja.

 

Kolekta

 

Ji pranë familjes sate, o Zot, dhe ndihmoje me bujari, Ti, që ia dhe hirin e fesë, bëje edhe pjesëtare në ngjalljen e të Njëlindurit Birit tënd. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Vap 8, 1b-8) (fq. 1556)

 

Shkonin prej një vendi në vend tjetër dhe predikonin Fjalën e Hyjit.

 

Lexim prej Veprave të Apostujve

 

¹ Po atë ditë kur e vranë Shtjefnin, u bë salvim i madh kundër Kishës në Jerusalem. Të gjithë, me përjashtim të apostujve, u shpërndanë nëpër krahinat e Judesë e të Samarisë.

² Disa njerëz të përshpirtshëm e varrosën Shtjefnin dhe bënë gjëmë të madhe për të. ³ Ndërkaq, Sauli bënte çmosin për ta asgjësuar Kishën: hynte nëpër shtëpi, merrte burra e gra dhe i dorëzonte në burg.

⁴ Ata, pra, të cilët qenë shpërndarë, shkonin prej një vendi në një vend tjetër dhe predikonin Fjalën.

⁵ Kështu Filipi zbriti në qytet të Samarisë dhe filloi të predikojë Mesinë. ⁶ Turmat ua vinin veshin me kujdes mësimeve të Filipit, sepse i dëgjonin dhe i shikonin shenjat e mrekullueshme që bënte. ⁷ E njëmend, prej shumë të djallosurish dilnin shpirtrat e ndytë duke bërtitur me zë të lartë, shëroheshin shumë të paralizuar e të çalë. ⁸ Dhe u bë gëzim i madh në atë qytet.

 

Fjala e Zotit

 

Psalmi 66 (65), 1-3a.4-5.6-7a(fq. 729)

 

Ref. Mbarë toka le t’i brohoritë Hyjit.

 

¹ Mbarë toka le t’i brohoritë Hyjit,

² këndoni lavdisë së Emrit të tij,

lartësojeni lavdinë e tij të pamasë!

³ Thuani Hyjit: “Sa të mrekullueshme janë veprat e tua!

 

Ref. Mbarë toka le t’i brohoritë Hyjit.

 

⁴ Le të të adhurojë mbarë toka e le të të këndojë,

le t’ia thotë këngës për nder të Emrit tënd”!

⁵ Ejani e shikoni veprat e Hyjit:

bëri mrekulli shtanguese mes bijve të njerëzve!

 

Ref. Mbarë toka le t’i brohoritë Hyjit.

 

⁶ Ai e shndërroi detin në terik,

këmbë e kaluan lumin

për këtë galdojmë me gëzim.

⁷ Ai sundon për amshim me pushtetin e vet.

 

Ref. Mbarë toka le t’i brohoritë Hyjit.

 

Aleluja!

Kushdo beson në mua, do ta ketë jetën e pasosur, thotë Zoti, e unë do ta ringjall në ditën e fundit (Krh Gjn 6, 40)

Aleluja!

 

Ungjilli (Gjn 6, 35-40) (fq. 1515)

 

Ky është vullneti i Atit tim, që, kushdo sheh Birin dhe beson në Të, ta ketë jetën e pasosur.

 

Leximi i Ungjillit të shenjtë sipas Gjonit

 

Në atë kohë, Jezusi i tha turmës: ³⁵ “Unë jam buka e jetës. Kush vjen tek unë nuk do të ketë më kurrë uri, kush beson në mua, nuk do të ketë më etje. ³⁶ Por ju thashë: më patë e prapë s’më besoni.

³⁷ Të gjithë ata që m’i jep Ati do të vijnë tek unë dhe atë që vjen tek unë, s’do ta qes jashtë, ³⁸ sepse zbrita prej qiellit, jo për të bërë vullnetin tim, por vullnetin e atij që më dërgoi.

³⁹ E vullneti i Atij që më dërgoi është të mos humbë asnjë prej atyre që më dha, por t’i ringjall në ditën e fundit. ⁴⁰ Po, ky është vullneti i Atit tim, që, kushdo sheh Birin dhe beson në Të, ta ketë jetën e pasosur e unë do ta ringjall në ditën e fundit.”

 

Fjala e Zotit

 

Lutja mbi dhurata

 

Bëj, po të lutemi, o Zot, të gëzohemi gjithmonë për këto mistere të Pashkëve, që veprimi i vazhdueshëm shpëtimprurës të bëhet për ne burim i pashtershëm hareje. Nëpër Krishtin Zotin tonë.

 

PREFACIONI I PASHKËVE – I

Misteri i Pashkëve

 

45. Ky prefacion thuhet në kohën e Pashkëve.

 

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

 

Përnjëmend është punë e denjë dhe e drejtë,

është detyra jonë dhe burim shpëtimi

të të lëvdojmë ty, o Zot, në çdo kohë,

por sidomos të madhërojmë më me hare

në këtë (natë) (ditë) (kohë),

kur u flijua Krishti, Pashka jonë.

Dhe njëmend ky është Qengji i vërtetë

që i shleu mëkatet e botës:

duke vdekur, e shkatërroi vdekjen tonë

dhe, duke u ngjallur, na përtëriu jetën.

Prandaj njerëzimi në mbarë botën

galdon me harenë e plotë të Pashkëve.

Por edhe fuqitë e epërme dhe pushtetet engjëllore

e këndojnë himnin e lavdisë sate

duke thënë pa pushim:

 

Shenjt, Shenjt, Shenjt...

 

PREFACIONI I PASHKËVE – V

Krishti prift dhe fli

 

49. Ky prefacion thuhet në kohën e Pashkëve.

 

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

 

Përnjëmend është punë e denjë dhe e drejtë,

është detyra jonë dhe burim shpëtimi

të të lëvdojmë ty, o Zot, në çdo kohë,

por sidomos të madhërojmë më me hare në këtë kohë,

kur u flijua Krishti, Pashka jonë.

Ai, duke e kushtuar trupin e vet,

flitë e vjetra i përmbushi

në flinë e vërtetë të kryqit

dhe duke u dorëzuar në duart e tua për shpëtimin tonë,

u dëftua prift, altar dhe qengj i vërtetë.

Prandaj njerëzimi në mbarë botën

galdon me harenë e plotë të Pashkëve.

Por edhe fuqitë e epërme dhe pushtetet engjëllore

e këndojnë himnin e lavdisë sate

duke thënë pa pushim:

 

Shenjt, Shenjt, Shenjt...

 

Antifona e kungimit

 

Krishti u ngjall dhe na ndriçoi, pasi na shëlboi me gjakun e vet, aleluja.

 

Lutja pas kungimit

 

Dëgjoji, o Zot, lutjet tona, që me pjesëmarrje në të mirat e shëlbimit të fitojmë ndihmë për jetën e tanishme e gëzimet e jetës së përhershme. Nëpër Krishtin Zotin tonë.