Leximet e ditës

JAVA E TRETË E PASHKËVE

E ENJTE MË POSHTË Shën Gjergji, martir

Antifona e hyrjes Krh. Dal 15, 1-2

T’i këndojmë Zotit, sepse mrekullisht ngadhënjeu. Zoti është fuqia ime dhe lavdia ime, ai është bërë shpëtimtari im, aleluja.

Kolekta

O Hyj i gjithëpushtetshëm dhe i amshuar, në këto ditë e kemi njohur më mirë bujarinë tënde: bëj ta pranojmë plotësisht dhuratën e dashurisë sate, që pasi na çlirove nga errësira e gabimit, t’i mbahemi më ngultas së vërtetës. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

Leximi i parë (Vap 8, 26-40) (fq. 1556/7)

Filipi ia shpalli oborrtarit lajmin e gëzueshëm të Jezusit.

Lexim prej Veprave të Apostujve

Në ato ditë, ²⁶ engjëlli i Zotit iu drejtua Filipit dhe i tha: “Ngritu e shko në jug udhës që shpie nga Jerusalemi për në Gazë; ajo është e shkretë.” ²⁷ Ai u ngrit dhe shkoi. Kur qe, një etiopas, oborrtar dhe funksionar i lartë i Kandacës, mbretëreshës së Etiopisë dhe mbarështues kryesor i të gjitha visareve të saja! Kishte qenë për shtegtim në Jerusalem ²⁸ e po kthente. Ndenjur në karrocën e vet, po lexonte Isainë profet.

²⁹ Atëherë Shpirti Shenjt i tha Filipit: “Shpejto e zëre atë karrocë!” ³⁰ Filipi vrapoi dhe e dëgjoi se po lexonte Isainë profet. I tha: “Vallë a vërtet e merr vesh atë që po lexon?” ³¹ “E si mundem ‑ i përgjigj ai ‑ kur nuk e kam atë që të më udhëzojë?” dhe e grishi Filipin të hipte e të ulej afër tij.

³² Pjesa që po lexonte prej Shkrimit të shenjtë ishte kjo: ‘E çuan porsi delen që çohet në thertore, ishte porsi qengji i pa zë në duart e qethësit. Nuk e çeli gojën e vet. ³³ Në përvujtërimin e tij iu mohua e drejta. Kush do ta përshkruajë fatin e tij? Sepse jeta e tij hiqet nga toka.’

³⁴ Atëherë oborrtari iu drejtua Filipit: “Të lutem për kë e thotë këtë profeti? Për vetveten apo për ndokënd tjetër?” ³⁵ Atëherë Filipi mori fjalën e, duke u nisur prej këtij teksti të Shkrimit të shenjtë, ia kumtoi Ungjillin e Jezusit.

³⁶ Duke udhëtuar kështu, arritën te një ujë dhe oborrtari tha: “Qe ujët! Çka më pengon të pagëzohem?” ^[37] ³⁸ Urdhëroi të ndalet karroca dhe të dy, Filipi e oborrtari, zbritën në ujë e Filipi e pagëzoi.

³⁹ Kur dolën nga ujët, Shpirti i Hyjit e rrëmbeu Filipin dhe oborrtari nuk e pa më. Ai e vazhdoi rrugën e vet me gëzim, ⁴⁰ kurse Filipi u gjend në Azot. Vazhdoi prej andej udhën duke predikuar Ungjillin nëpër të gjitha qytetet derisa arriti në Cezare.

Fjala e Zotit

Psalmi 66 (65), 8-9.16-17.20. (fq. 729)

Ref. Bekojeni, o popuj, Hyjin tonë.

⁸ Bekojeni, o popuj, Hyjin tonë

dhe shpalleni lavdinë e tij!

⁹ Ai i dha shpirtit tonë jetën,

këmbët na i ruan nga hapat e gabuar.

Ref. Bekojeni, o popuj, Hyjin tonë.

¹⁶ Ejani, dëgjoni, të gjithë ju që e druani Hyjin,

do t’ju tregoj çka i bëri shpirtit tim.

¹⁷ Me gojën time e thirra në ndihmë,

dhe me gjuhën time e madhërova.

Ref. Bekojeni, o popuj, Hyjin tonë.

²⁰ Qoftë bekuar Hyji

që s’ma hodhi poshtë lutjen time

e nuk ma mohoi mëshirën e vet!

Ref. Bekojeni, o popuj, Hyjin tonë.

Aleluja!

Unë jam buka e gjallë që zbriti prej qiellit: nëse ndokush ha këtë bukë, do të jetojë për amshim. (Gjn 6, 51)

Aleluja!

Ungjilli (Gjn 6, 44-51) (fq. 1515)

Unë jam buka e jetës që zbret nga qielli.

Leximi i Ungjillit të shenjtë sipas Gjonit

Në atë kohë, Jezusi i tha turmës: ⁴⁴ Askush s’mund të vijë tek unë, po qe se Ati, që më dërgoi, nuk e tërheq. Atë unë do ta ringjall në ditën e fundit.

⁴⁵ Profetët shkruan: ‘Të gjithë do të jenë nxënës të Hyjit.’ Kushdo, pra e dëgjon Atin dhe e përvetëson mësimin e tij, vjen tek unë. ⁴⁶ Kjo s’do të thotë se ndokush e pa Atin, përveç Atij që është te Hyji; vetëm Ai e pa Atin! ⁴⁷ Përnjëmend, përnjëmend po ju them: ai që beson, ka jetën e pasosur.

⁴⁸ Unë jam buka e jetës. ⁴⁹ Etërit tuaj hëngrën manën në shkretëtirë dhe vdiqën. ⁵⁰ Kjo është buka që zbret nga qielli: që, kush ta hajë atë, të mos vdesë askurrë.

⁵¹ Unë jam buka e gjallë që zbriti prej qiellit: nëse ndokush ha këtë bukë, do të jetojë për amshim. E buka që unë do ta jap është trupi im ‑ për jetën e botës.”

Fjala e Zotit

Lutja mbi dhurata

O Hyj, me shkëmbimin e mrekullueshëm të kësaj flie Ti na bën pjesëtarë të natyrës sate hyjnore, bëj, po të lutemi, që sikurse e kemi njohur të vërtetën tënde, po ashtu edhe ta dëshmojmë me jetë. Nëpër Krishtin Zotin tonë.

PREFACIONI I PASHKËVE – II

Jeta e re në Krishtin

46. Ky prefacion thuhet në kohën e Pashkëve.

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

Përnjëmend është punë e denjë dhe e drejtë,

është detyra jonë dhe burim shpëtimi

të të lëvdojmë ty, o Zot, në çdo kohë,

por sidomos të madhërojmë më me hare në këtë kohë,

kur u flijua Krishti, Pashka jonë.

Nëpër të lindin bijtë e dritës për jetën e pasosur

dhe besimtarëve u hapen dyert e parajsës.

Me vdekjen e tij u shëlbua vdekja jonë,

e në ngjalljen e tij u ngjall edhe jeta e të gjithëve.

Prandaj njerëzimi në mbarë botën

galdon me harenë e plotë të Pashkëve.

Por edhe fuqitë e epërme dhe pushtetet engjëllore

e këndojnë himnin e lavdisë sate

duke thënë pa pushim:

Shenjt, Shenjt, Shenjt...

PREFACIONI I PASHKËVE – IV

Ripërtritja e gjithësisë me anë të misterit të Pashkëve

48. Ky prefacion thuhet në kohën e Pashkëve.

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

Përnjëmend është punë e denjë dhe e drejtë,

është detyra jonë dhe burim shpëtimi

të të lëvdojmë ty, o Zot, në çdo kohë,

por sidomos të madhërojmë më me hare në këtë kohë,

kur u flijua Krishti, Pashka jonë.

Me fitoren mbi mëkatin,

rimëkëmbet mbarë rruzullimi

e në Krishtin, na ripërtërihet jeta.

Prandaj njerëzimi në mbarë botën

galdon me harenë e plotë të Pashkëve.

Por edhe fuqitë e epërme dhe pushtetet engjëllore

e këndojnë himnin e lavdisë sate

duke thënë pa pushim:

Shenjt, Shenjt, Shenjt...

Antifona e kungimit 2 Kor 5, 15

Krishti vdiq për të gjithë, në mënyrë që ata që jetojnë, të mos jetojnë më për vete, por për atë që vdiq dhe u ngjall për ta, aleluja.

Lutja pas kungimit

O Zot, ji gjithmonë me popullin tënd dhe, pasi e ushqeve me misteret qiellore, bëj të kalojë nga ligështia e tanishme në jetën e re. Nëpër Krishtin Zotin tonë.

23 prill

Shën Gjergji, martir

Përkujtim

Antifona e hyrjes Krh. 4 Ezd 2, 35

Një dritë që kurrë nuk shuhet do të ndriçojë martirët e tu, o Zot, ata do të jetojnë në amshim të amshimeve, aleluja.

Antifona

O Zot, ne po e madhërojmë fuqinë tënde dhe po të lutemi me përvujtëri: bëj që shën Gjergji martir i cili i përngjau Krishtit në mundimet e tij, të jetë edhe ndihmës i gatshëm i ligështisë sonë. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

Leximi i parë (Zb 21, 5-7) (fq. 1753/4)

S’do të ketë më vdekje.

Leximi i parë (Zb 21, 5-7) (fq. 1753/4)

Atij që ka etje unë do t’i jap falas nga burimi i jetës.

Lexim prej Librit të Zbulesës së Shën Gjonit apostull

⁵Atëherë Ai që rri mbi fron tha: »Ja, unë i bëj të reja të gjitha sendet!«. Dhe shtoi: »Shkruaj! Këto fjalë janë të besueshme dhe të vërteta!«

⁶Mandej më tha: »U bënë! Unë jam Alfa dhe Omega! Fillimi dhe Mbarimi! Atij që ka etje unë do t’i jap falas nga burimi i jetës.

⁷Ngadhënjyesi do t’i trashëgojë këto edhe unë do të jem Hyji i tij e ai biri im.

Fjala e Zotit

Psalmi 126 (125), 1-2ab.2cd-3.4-5.6 (fq. 809)

Ref. Ai që mbjell me lot, do të korrë me gëzim.

Ose:

Ref. Aleluja, aleluja, aleluja.

¹ Kur Zoti i ktheu robërit e Sionit,

na dukej si të ishim në ëndërr.

² Atëherë goja na u mbush me gaz

e gjuha jonë ia thoshte këngës së gëzimit!

Ref. Ai që mbjell me lot, do të korrë me gëzim.

Ose:

Ref. Aleluja, aleluja, aleluja.

Asohere thuhej ndër paganë:

“Zoti bëri për ta punë të mëdha”!

³ Vërtet Zoti bëri për ne mrekulli

e zemrat na u mbushën me gëzim!

Ref. Ai që mbjell me lot, do të korrë me gëzim.

Ose:

Ref. Aleluja, aleluja, aleluja.

⁴ Ktheji, o Zot, robërit tanë

porsi përrenjtë e Negebit!

⁵ Ata që mbjellin me lot,

deh, le të korrin me gëzim!

Ref. Ai që mbjell me lot, do të korrë me gëzim.

Ose:

Ref. Aleluja, aleluja, aleluja.

⁶ Në të shkuar ecnin e qanin

duke mbartur farën për ta mbjellë,

kurse në kthim do të vijnë plot gëzim

duke mbartur dorëzat e veta.

Ref. Ai që mbjell me lot, do të korrë me gëzim.

Ose:

Ref. Aleluja, aleluja, aleluja.

Aleluja!

³Qoftë bekuar Hyji, Ati i mëshirshëm dhe Hyji që jep çdo ngushëllim. Ai na ngushëllon në të gjitha vështirësitë tona (2 Kor, 1, 3b-4a)

Aleluja!

Ungjilli (Lk9, 23-26) (fq.1475)

I dërgoi për ta shpallur Mbretërinë e Hyjit dhe të shërojnë të sëmurët.

Leximi i Ungjillit të shenjtë sipas Lukës

Në atë kohë, Jezusi ²³iu drejtua të gjithëve: »Nëse ndokush do të vijë pas meje, ta mohojë vetveten, ta marrë kryqin e vet çdo dit dhe të më ndjekë.

²⁴Sepse, kush do të shpëtojë jetën e vet, do ta humbë, ndërsa kush ta humbë jetën e vet për shkakun tim, do ta shpëtojë.

²⁵E njëmend, ç’dobi do të kishte njeriu, nëse e fiton mbarë botën, por e humb vetveten ose e rrënon?

²⁶Për të vërtetë, kujt t’i vijë turp për mua e për fjalët e mia, për atë do t’i vijë turp edhe Birit të njeriut kur të hyjë në lavdinë e vet, të Atit dhe të engjëjve të shenjtë.

Fjala e Zotit

Lutja mbi dhurata

Pëlqeje, o Zot, flinë e pajtimit e të lavdit që po ta kushtojmë në përkujtimin e shën Gjergjit martir: ajo na fitoftë faljen e mëkateve e na bëftë mirënjohës të tu të përhershëm. Nëpër Krishtin Zotin tonë.

Antifona e kungimit Ps 115, 15

E çmueshme është para Zotit vdekja e shenjtërve të tij, aleluja.

Lutja pas kungimit

I morëm, o Zot, dhuratat qiellore në kremtimin e gëzueshëm të sotëm; bëj që, pasi në këtë gosti hyjnore shpallim vdekjen e Birit tënd, të kemi pjesë në ngjalljen dhe lavdinë e tij bashkë me shën Gjergjin martirin tënd. Nëpër Krishtin Zotin tonë.