Leximet e ditës

JAVA E TRETË E PASHKËVE

 

E PREMTE

 

Antifona e hyrjes Zb 5, 12

 

I denjë është Qengji i prerë të marrë pushtetin, pasurinë, dijen, fuqinë, nderin, lumturinë dhe lavdinë, aleluja.

 

Kolekta

 

Po të lutemi, o Hyj i gjithëpushtetshëm, pasi e kemi njohur hirin e ngjalljes së Zotit, bëj që në saje të dashurisë së Shpirtit Shenjt, të ngjallemi për një jetë të re. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Vap 9, 1-20) (fq. 1557/8)

 

Unë e kam zgjedhur për të përgjigjur për Emrin tim para popujve paganë.

 

Lexim prej Veprave të Apostujve

 

Ndërkaq, ¹ Sauli, që s’merrte frymë për tjetër por për t’u kërcënuar e për vrasje kundër nxënësve të Zotërisë, erdhi te kryeprifti ² e kërkoi prej tij letrat për sinagogat e Damaskut, në mënyrë që, nëse do të gjejë ndokënd të kësaj Udhe, burra e gra, të mund t’i sjellë të lidhur në Jerusalem.

³ Kur, duke udhëtuar, iu afrua Damaskut, papritmas e shndriti një dritë prej qiellit. ⁴ U rrëzua për tokë dhe dëgjoi një zë që i tha: “Saul, Saul, pse po më salvon?” ⁵ Ai pyeti: “Kush je ti, Zotëri?” E Ai: “Unë jam Jezusi që ti e salvon! ⁶ Më mirë ngrihu e hyr në qytet dhe atje do të tregohet se çka duhet të bësh!”

⁷ Bashkudhëtarët e tij, të habitur, zunë vend pa folur asnjë fjalë, sepse vërtet e dëgjuan zërin, por nuk panë askënd. ⁸ Sauli u ngrit nga toka, por edhe pse i kishte hapur sytë, nuk shihte asgjë. E shtinë në Damask duke e marrë për dore, ⁹ dhe për tri ditë as nuk pa as nuk hëngri as nuk piu.

¹⁰ Në Damask ishte një nxënës që quhej Anani. Këtij Zoti i tha në vegim: “O Anani!” “Urdhëro, o Zot” ‑ u përgjigj ai. ¹¹ “Çohu ‑ i tha Zoti ‑ dhe shko në rrugën që quhet: ‘E drejtë’ e në shtëpinë e Judës lype njeriun prej Tarsit që quhet Saul. Ai tani po thotë uratë, ¹² dhe e pa [në vegim] një njeri që quhet Anani duke hyrë tek ai dhe duke i vënë duart për t’ia rikthyer dritën e syve.” ¹³ “O Zot ‑ përgjigji Anania ‑ prej shumëkujt kam dëgjuar për atë njeri sa shumë të këqija u ka bërë shenjtërve të tu në Jerusalem. ¹⁴ Ai ka edhe fuqizimin prej kryepriftërinjve për të lidhur në hekura të gjithë ata që e thërrasin Emrin tënd.” ¹⁵ “Shko ‑ i përgjigji Zoti ‑ sepse ai është vegla ime, që unë e kam zgjedhur për të përgjigjur për Emrin tim para popujve paganë, para mbretërve dhe para bijve të Izraelit. ¹⁶ Jo po, unë vetë do t’i tregoj se sa shumë do t’i duhet të pësojë për shkak të Emrit tim!”

¹⁷ Anania shkoi, hyri në shtëpi e, duke ia vënë duart, i tha: “Vëlla Saul, Zotëria Jezus, që t’u dëftua në udhë kur ishe duke ardhur këtu, më dërgoi që ta rifitosh dritën e syve e të mbushesh me Shpirtin Shenjt.” ¹⁸ Dhe aty për aty i ra diçka prej syve si pare peshku dhe menjëherë iu kthye drita e syve, u ngrit dhe qe pagëzuar, ¹⁹ hëngri dhe u përtëri në fuqi. I kaloi disa ditë bashkë me nxënës në Damask ²⁰ dhe menjëherë filloi të predikojë në sinagoga se Jezusi është Biri i Hyjit.

 

Fjala e Zotit

 

Psalmi 117 (116), 1bc.2 (fq. 795)

 

Ref. Shkoni në mbarë botën e predikoni Ungjillin.

 

¹ Lavdërojeni Zotin, o kombe të gjitha,

madhërojeni së bashku, o popuj të gjithë!

 

Ref. Shkoni në mbarë botën e predikoni Ungjillin.

 

² Sepse e madhe është dashuria e tij ndaj nesh,

besnikëria e Zotit qëndron për amshim!

 

Ref. Shkoni në mbarë botën e predikoni Ungjillin.

 

Aleluja!

Kush ushqehet me Korpin tim dhe pi Gjakun tim ai mbetet në mua dhe unë në të. (Gjn 6, 56)

Aleluja!

 

Ungjilli (Gjn 6, 52-59) (fq. 1515/6)

 

Korpi im është ushqimi i vërtetë e gjaku im është pije e vërtetë.

 

Leximi i Ungjillit të shenjtë sipas Gjonit

 

Në at kohë, ⁵² judenjtë filluan të grinden me shoqi‑shoqin e thoshin: “Si mundet ky të na japë korpin (e vet) për ushqim?”

⁵³ Prandaj Jezusi u tha: “Përnjëmend, përnjëmend po ju them: nëse nuk e hani korpin e Birit të njeriut e nuk e pini gjakun e tij, nuk keni jetë në vetvete! ⁵⁴ Kush ushqehet me korpin tim dhe pi gjakun tim ka jetën e pasosur. Unë atë do ta ringjall në ditën e fundit. ⁵⁵ Sepse korpi im është ushqim i vërtetë e gjaku im është pije e vërtetë.

⁵⁶ Kush ushqehet me korpin tim dhe pi gjakun tim ai mbetet në mua dhe unë në të. ⁵⁷ Sikurse mua më dërgoi Ati i gjallë dhe unë jetoj për Atin, po ashtu edhe ai që ha mua do të jetojë për mua.

⁵⁸ Kjo është buka që zbriti prej qiellit, jo porsi ajo që hëngrën etërit e vdiqën: kush ushqehet me këtë bukë do të jetojë në amshim.”

⁵⁹ Këtë mësim Jezusi e dha në sinagogën e Kafarnaumit.

 

Fjala e Zotit

 

Lutja mbi dhurata

 

Në mirësinë tënde shenjtëroji, o Zot, këto dhurata, pranoje kushtin e kësaj flie shpirtërore, dhe na shndërro në dhuratë të përhershme për lavdinë tënde. Nëpër Krishtin Zotin tonë.

 

PREFACIONI I PASHKËVE – I

Misteri i Pashkëve

 

45. Ky prefacion thuhet në kohën e Pashkëve.

 

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

 

Përnjëmend është punë e denjë dhe e drejtë,

është detyra jonë dhe burim shpëtimi

të të lëvdojmë ty, o Zot, në çdo kohë,

por sidomos të madhërojmë më me hare

në këtë (natë) (ditë) (kohë),

kur u flijua Krishti, Pashka jonë.

Dhe njëmend ky është Qengji i vërtetë

që i shleu mëkatet e botës:

duke vdekur, e shkatërroi vdekjen tonë

dhe, duke u ngjallur, na përtëriu jetën.

Prandaj njerëzimi në mbarë botën

galdon me harenë e plotë të Pashkëve.

Por edhe fuqitë e epërme dhe pushtetet engjëllore

e këndojnë himnin e lavdisë sate

duke thënë pa pushim:

 

Shenjt, Shenjt, Shenjt...

 

PREFACIONI I PASHKËVE – IV

Ripërtritja e gjithësisë me anë të misterit të Pashkëve

 

48. Ky prefacion thuhet në kohën e Pashkëve.

 

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

 

Përnjëmend është punë e denjë dhe e drejtë,

është detyra jonë dhe burim shpëtimi

të të lëvdojmë ty, o Zot, në çdo kohë,

por sidomos të madhërojmë më me hare në këtë kohë,

kur u flijua Krishti, Pashka jonë.

Me fitoren mbi mëkatin,

rimëkëmbet mbarë rruzullimi

e në Krishtin, na ripërtërihet jeta.

Prandaj njerëzimi në mbarë botën

galdon me harenë e plotë të Pashkëve.

Por edhe fuqitë e epërme dhe pushtetet engjëllore

e këndojnë himnin e lavdisë sate

duke thënë pa pushim:

 

Shenjt, Shenjt, Shenjt...

 

Antifona e kungimit

 

Krishti i kryqëzuar u ngjall nga të vdekurit dhe na shëlboi, aleluja.

 

Lutja pas kungimit

 

E morëm, o Zot, dhuratën e misterit të shenjtë, e po të lutemi me përvujtëri, që kremtimi i Birit tënd, të cilin na urdhëroi ta bëjmë në përkujtimin e tij, ta shtojë në ne dashurinë e shenjtë. Nëpër Krishtin Zotin tonë.