Leximet e ditës
Zemra e Papërlyer e Shën Marisë Virgjër
Përkujtim
Antifona e hyrjes Ps 12, 6
Le të galdojë shpirti im në shpëtimin tënd: do t’i këndoj Zotit, bamirësit tim.
Kolekta
O Hyj, Ti përgatite në Zemrën e shën Marisë Virgjër një banesë të denjë për Shpirtin Shenjt: bëj, po të lutemi, që edhe ne me ndërmjetësinë e saj, të meritojmë të bëhemi tempulli i lavdisë sate. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.
Me gëzim të madh gëzohem në Zotin.
Lexim prej Librit të Isaisë profet
9 Fara e tyre e njohur do të jetë ndër popuj, e ndër kombe pasardhësit e tyre. Kush t’i shohë, do t’i çmojë, sepse janë fara që e ka bekuar Zoti.
10 Me gëzim të madh gëzohem në Zotin, shpirti im galdon në Hyjin tim, sepse më veshi me petkat e gëzimit, ai më mbuloi me leshnik të drejtësisë, porsi dhëndër të stolisur me kezë, porsi nuse me argjendari e stolisur.
11 Po, porsi toka që bën të mbijë gjelbërimi, porsi kopshti që bën të mbijë fara e tij, kështu Zoti Hyj do të bëjë të mbijë drejtësia edhe lavdi në sy të të gjithë popujve.
Fjala e Zotit
Psalmi (1 Sam 2, 1.4-5.6-7.8abcd)
Ref. Zemra ime kërcen nga gëzimi në saje të Zotit.
1 “Zemra ime kërcen nga gëzimi në saje të Zotit,
m’u trash krahu në saje të Hyjit tim;
hapur e kam gojën kundër armiqve të mi,
sepse më gëzove me bamirësinë tënde.
Ref. Zemra ime kërcen nga gëzimi në saje të Zotit.
4 Harku i të fortëve u thye,
kurse të ligshtit u ngjeshën me fuqi!
5 Të ngopurit rrogëtarë u lidhën për bukë goje,
kurse të uriturit më s’sprovojnë skamje.
Beronja lindi fëmijë me shumicë,
kurse ajo që pati shumë u shua.
Ref. Zemra ime kërcen nga gëzimi në saje të Zotit.
6 Zoti bën që të vdiset e të jetohet,
plandos në Nëntokë dhe andej nxjerr.
7 Zoti bën skamnor e të pasur,
përul edhe lartëson.
Ref. Zemra ime kërcen nga gëzimi në saje të Zotit.
8 Prej pluhurit e ngre varfanjakun,
prej llomit e lartëson skamnorin,
që të rrijë me princa,
që ta zërë vendin e nderit.
Ref. Zemra ime kërcen nga gëzimi në saje të Zotit.
Aleluja!
Maria i mbante mend me kujdes të gjitha këto ngjarje dhe i shoshiste në zemrën e vet. (Lk 2, 19)
Aleluja!
Ungjilli (Lk 1, 41-51)
Maria i ruante me kujdes në zemër të gjitha këto ngjarje.
Leximi i Ungjillit të shenjtë sipas Lukës
41 Prindërit e Jezusit për çdo vit shkonin në Jerusalem për të kremten e Pashkëve. 42 Kur Jezusi i mbushi të dymbëdhjetat, u ngjitën sipas zakonit të festës. 43 Si kaluan ato ditë, ata u kthyen, kurse Jezusi ende fëmijë, u ndal në Jerusalem pa dijen e prindërve të tij. 44 Duke qenë të bindur se është me turmën, ecën ashtu një ditë rrugë e atëherë zunë ta kërkojnë ndër kushërinj e të njohur. 45 Pasi nuk e gjetën, u kthyen në Jerusalem për ta kërkuar.
46 Pas tri ditësh e gjetën në Tempull mes dijetarësh duke i dëgjuar ata dhe duke u bërë pyetje. 47 Të gjithë ata që e dëgjonin, i mrekullonte dija dhe përgjigjet e tij.
48 Kur e panë, u çuditën dhe e ëma i tha: “Ç’na bëre kështu, o bir? Ja, yt atë dhe unë të kërkuam plot pikëllim!” 49 Ai iu përgjigj: “Po, pse më kërkuat? A nuk e dinit se më duhet të merrem me punët e Atit tim?” 50 Por ata nuk morën vesh çka deshi t’u thotë.
51 Atëherë Jezusi u kthye me ta, erdhi në Nazaret dhe i dëgjonte. E ëma i ruante me kujdes në zemër të gjitha këto ngjarje.
Fjala e Zotit
Lutja mbi dhurata
Pranoji, o Zot, lutjet e kushtet që populli yt po t’i paraqet në përkujtimin e shën Marisë, Hyjlindëse, që të të pëlqejnë ty dhe me to, të fitojnë ndihmën tënde. Nëpër Krishtin, Zotin tonë.
PREFACIONI I SHËN MARISË VIRGJËR – I
Amësia e Shën Marisë Virgjër
62. Ky prefacion thuhet në Meshët e Shën Marisë Virgjër, duke përmendur, në vendin e caktuar, shenjën e festës, si shënohet në çdo Meshë.
M. Zoti qoftë me ju.
P. Dhe me shpirtin tënd.
M. T’i lartësojmë zemrat.
P. I kemi te Zoti.
M. Të falënderojmë Zotin, Hyjin tonë.
P. Është punë e denjë dhe e drejtë.
Përnjëmend është punë e denjë dhe e drejtë,
është detyra jonë dhe burim shpëtimi
të të falënderojmë gjithmonë e gjithkund ty,
o Zot, Atë i shenjtë, Hyj i gjithëpushtetshëm dhe i amshuar.
Dhe po të lavdërojmë, po të bekojmë dhe po të shpallim
në …. e shën Marisë përherë Virgjër.
Ajo, për virtyt të Shpirtit Shenjt,
ngjizi në kraharorin e vet të njëlindurin Birin tënd,
dhe, pa e prishur nderin e virgjërisë,
ia fali botës dritën e amshuar,
Jezu Krishtin, Zotin tonë.
Nëpër të engjëjt e lavdërojnë madhërinë tënde,
zotëruesit të adhurojnë dhe dridhen pushtetet.
Qiejt e fuqitë qiellore dhe serafinët e lumtur
bashkohen për të brohoritur me galdim.
Me ta, po të lutemi, bëj të marrin pjesë edhe zërat tanë,
ndërsa përvuajtërisht po themi:
Shenjt, Shenjt, Shenjt.
Antifona e kungimit Lk 2, 19
Maria i mbante mend të gjitha këto ngjarje dhe i shoshiste në zemrën e vet.
Lutja pas kungimit
O Zot, pasi na ke bërë pjesëmarrës të shëlbimit të amshuar, bëj që ne, që po përkujtojmë Nënën e Birit tënd, ta gëzojmë plotësinë e hirit tënd e rritjen e vazhdueshme të shpëtimit. Nëpër Krishtin, Zotin tonë.