Leximet e ditës
JAVA E XIV GJATË VITI
E HËNË
Antifona e hyrjes Krh. Ps 47, 10-11
E kujtojmë, o Hyj, mëshirën tënde në mesin e tempullit tënd. Sikurse emri yt, o Hyj, ashtu edhe lavdia jote arrin deri në skajin e botës, e djathta jote është plot drejtësi.
Kolekta
O Hyj, Ti me përvujtërinë e Birit tënd e ngrite botën që pati rënë poshtë: jepu besimtarëve të tu gëzimin e shenjtë, dhe, pasi i shpëtove prej robërisë së mëkatit, bëj të gëzojnë me ty për amshim. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.
Leximi i parë (Oz 2, 16.17b-18.21-22) (fq. 1233/4)
Do të të bëj fatin tim të përhershëm.
Lexim prej Librit të Ozesë profet
Kështu thotë Zoti: 16 Vetë do ta josh atë, do ta shpie në shkretëtirë e do t'i flas zemrës së saj. 17 Atje ajo do të përgjigj porsi në ditët e rinisë së vet, porsi në ditët kur pati dalë prej tokës së Egjiptit! 18 E do të ndodhë po shi atë ditë - është fjala e Zotit, ti do të më thërrasësh: 'Burri im', e s'do të më quash: 'Baali im'. 21 Do të të bëj fatin tim të përhershëm, do të të fejoj në drejtësi e në të drejtë, me dhembshuri e dashuri. 22 Do të të fejoj në besnikëri e ti Zotin do ta njohësh!
Fjala e Zotit
Psalmi 145 (144), 2-3.4-5.6-7.8-9 (fq. 825)
Ref. Do t’i këndoj përgjithmonë besnikërisë sate, o Zot.
2 Çdo ditë do të të bekoj
dhe do ta lavdëroj Emrin tënd
3 Zoti është i madh e i lavdërueshëm,
e pashqyrtueshme është madhëria e tij!
Ref. Do t’i këndoj përgjithmonë besnikërisë sate, o Zot.
4 Breznia breznisë do t'ia tregojë veprat e tua
dhe do ta shpallin pushtetin tënd.
5 Do ta shpallin madhërinë e shenjtërisë sate,
do t'i tregojnë mrekullitë e tua.
Ref. Do t’i këndoj përgjithmonë besnikërisë sate, o Zot.
6 Do ta tregojnë fuqinë e veprave të tua të tmerrshme,
do t'i kumtojnë veprat e madhërishme të tuat.
7 Do ta përhapin kujtimin e hirësisë sate të madhe,
do t'i brohorisin drejtësisë sate.
Ref. Do t’i këndoj përgjithmonë besnikërisë sate, o Zot.
8 Zoti është vetë butësia e mëshira,
i ngadalshëm në zemërim dhe plot dashuri.
9 Zoti është i mirë për të gjithë,
i dhimbshëm për të gjitha krijesat e veta.
Ref. Do ti këndoj përgjithmonë besnikërisë sate, o Zot.
Aleluja!
Shëlbuesi ynë Jezu Krishti e asgjësoi vdekjen dhe bëri të shndris jeta me anë të Ungjillit (krh. 2 Tim 1, 10)
Aleluja!
Ungjilli (Mt 9, 18-26) (fq. 1395)
Posa më vdiq vajza. Megjithatë eja dhe ajo do të ngjallet.
Leximi i Ungjillit të shenjtë sipas Mateut
Në atë kohë, 18 ndërsa Jezusi ende po mësonte, qe se iu afrua një kryetar, ra përmbys para tij dhe i tha: »Posa më vdiq vajza. Megjithatë eja, vëre dorën mbi të dhe ajo do të ngjallet.« 19 Jezusi u ngrit dhe bashkë me nxënësit e vet shkoi pas tij.
20 Kur qe, një grua e cila vuante nga derdhja e gjakut tash dymbëdhjetë vjet, iu afrua mbas shpine e ia preku kindin e petkut të tij, 21 sepse thoshte në vete: »Do të shërohem nëse ia preku vetëm petkun e tij! 22 Jezusi u suall, e pa dhe i tha: »Ki besim, o bijë! Feja jote të shpëtoi!« Dhe gruaja u shërua në atë moment.
23 Kur Jezusi arriti në shtëpinë e kryetarit, dhe si i pa ata që u binin fyejve dhe njerëzit që po bënin zhurmë,24 u tha: »Largohuni se vajza nuk ka vdekur, por po fle.« Ata e përqeshën. 25 Dhe, pasi u qitën njerëzit përjashta, hyri Jezusi, e mori për dore vajzën dhe ajo u ngrit. 26 Lajmi i kësaj mrekullie u përhap anembanë asaj krahine.
Fjala e Zotit
Lutja mbi dhurata
O Zot, na pastroftë kushti që po ia paraqesim emrit tënd dhe na drejtoftë përditë kah jeta qiellore. Nëpër Krishtin Zotin tonë.
Antifona e kungimit Ps 33, 9
Shijoni e shihni sa i mirë është Zoti. I lumi ai që shpreson në të.
Ose: Mt 11, 28
Ejani tek unë ju të gjithë që jeni të lodhur prej barrës së rëndë dhe unë do t’ju çlodh, thotë Zoti.
Lutja pas kungimit
O Zot, Ti na mbushe me dhurata kaq të mrekullueshme: na ndihmo ta fitojmë shpëtimin e amshuar dhe kurrë të mos pushojmë duke të të lëvduar. Nëpër Krishtin Zotin tonë.