Leximet e ditës

JAVA E XIV GJATË VITI

 

E MARTË

 

Antifona e hyrjes Krh. Ps 47, 10-11

 

E kujtojmë, o Hyj, mëshirën tënde në mesin e tempullit tënd. Sikurse emri yt, o Hyj, ashtu edhe lavdia jote arrin deri në skajin e botës, e djathta jote është plot drejtësi.

 

Kolekta

 

O Hyj, Ti me përvujtërinë e Birit tënd e ngrite botën që pati rënë poshtë: jepu besimtarëve të tu gëzimin e shenjtë, dhe, pasi i shpëtove prej robërisë së mëkatit, bëj të gëzojnë me ty për amshim. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Oz 8, 4-7.11-13) (fq. 1259/60)

 

Pasi mbjellin erë, stuhi do të korrin.

 

Lexim prej Librit të Ozesë profet

 

Kështu thotë Zoti: ⁴ vunë mbretër pa dijen time, princa vunë e mua s'më pyetën. Me argjend e me ar të vet punuan idhuj për vete që të sharronin. ⁵ Samari, viçin tënd e përbuza! Kundër tyre flakë u ndez furia ime! Deri kur s'do të mund të pastrohen? ⁶ Po, ai vjen prej Izraelit, një mjeshtër atë e punoi e Zot s'është! Shkëndijë do të bëhet viçi i Samarisë! ⁷ Pasi mbjellin erë, stuhi do të korrin! Gruri i tyre kallinj s'do të lidhë, nëse rritet, miell s'do të japë, po edhe në dhëntë, të huajt do ta hanë! ¹¹ Kur Efraimi i shumoi lterët për mëkat, i shërbyen veç për të mëkatuar. ¹² Për të i shkruaja ligjet e mia të shumta, porse çmohen porsi gjë e huaj.

¹³ Ata i duan flitë, kushtojnë mishrat dhe i hanë, por ato Zotit s'i pëlqejnë. Tash do ta kujtojë fajësinë e tyre, do t'i ndëshkojë për mëkatet e tyre: në Egjipt do të kthehen.

 

Fjala e Zotit

 

Psalmi 115 (114), 3-4.5-6.7ab-8.9-10 (fq. 792)

 

Ref. Shtëpia e Izraelit shpreso në Zotin.

 

³ Hyji ynë është në qiell,

ai bën gjithçka i pëlqen.

⁴ Idhujt e paganëve janë argjend e ar

- prodhim i dorës së njeriut.

 

Ref. Shtëpia e Izraelit shpreso në Zotin.

 

⁵ Gojë kanë e nuk flasin,

sy kanë e nuk shohin,

⁶ veshë kanë e nuk dëgjojnë,

hundë kanë e nuk nuhasin.

 

Ref. Shtëpia e Izraelit shpreso në Zotin.

 

⁷ Duar kanë e nuk prekin,

këmbë kanë e nuk ecin,

⁸ Të tillë qofshin edhe ata që i punojnë,

të gjithë ata që shpresojnë në ta!

 

Ref. Shtëpia e Izraelit shpreso në Zotin.

 

⁹ Shtëpia e Izraelit shpreson në Zotin:

Ai është ndihma dhe mburoja e tyre.

¹⁰ Shtëpia e Aronit shpreson në Zotin:

Ai është ndihma dhe mburoja e tyre!

 

Ref. Shtëpia e Izraelit shpreso në Zotin.

 

Aleluja!

Unë jam Bariu i mirë, thotë Zoti; i njoh delet e mia dhe ato më njohin mua. (Gjn 10, 14)

Aleluja!

 

Ungjilli (Mt 9, 32-38) (fq. 1395/6)

 

Të korrat janë të mëdha, kurse punëtorë ka pak.

 

Leximi i Ungjillit të shenjtë sipas Mateut

 

Në atë kohë, ³² ia sollën Jezusit një memec të djallosur. ³³ Pasi e nxori djallin, memeci foli. Njerëzit të mrekulluar, thoshin: »Kurrë s'u pa një gjë e tillë në Izrael!« ³⁴ Ndërsa farisenjtë thoshin: »Ai i nxjerr djajtë me fuqinë e kryetarit të djajve.«

³⁵ Kështu Jezusi qarkullonte nëpër të gjitha qytetet e fshatrat. Mësonte në sinagogat e tyre: predikonte Ungjillin e Mbretërisë dhe shëronte çdo sëmundje e lëngatë. ³⁶ Kur e pa turmën e popullit, ndjen dhembshuri për të, sepse ishte e nëpërkëmbur dhe e lënë pasdore si delet pa bari. ³⁷ Atëherë u tha nxënësve të vet: »Të korrat janë të mëdha, kurse punëtorë ka pak. ³⁸ Lutuni, pra Zotërisë të të korrave, të dërgojë korrtarë në të korrat e veta.«

 

Fjala e Zotit

 

Lutja mbi dhurata

 

O Zot, na pastroftë kushti që po ia paraqesim emrit tënd dhe na drejtoftë përditë kah jeta qiellore. Nëpër Krishtin Zotin tonë.

 

Antifona e kungimit Ps 33, 9

 

Shijoni e shihni sa i mirë është Zoti. I lumi ai që shpreson në të.

 

Ose: Mt 11, 28

 

Ejani tek unë ju të gjithë që jeni të lodhur prej barrës së rëndë dhe unë do t’ju çlodh, thotë Zoti.

 

Lutja pas kungimit

 

O Zot, Ti na mbushe me dhurata kaq të mrekullueshme: na ndihmo ta fitojmë shpëtimin e amshuar dhe kurrë të mos pushojmë duke të të lëvduar. Nëpër Krishtin Zotin tonë.