Leximet e ditës
JAVA E XIV GJATË VITI
E MËRKURË
Antifona e hyrjes Krh. Ps 47, 10-11
E kujtojmë, o Hyj, mëshirën tënde në mesin e tempullit tënd. Sikurse emri yt, o Hyj, ashtu edhe lavdia jote arrin deri në skajin e botës, e djathta jote është plot drejtësi.
Kolekta
O Hyj, Ti me përvujtërinë e Birit tënd e ngrite botën që pati rënë poshtë: jepu besimtarëve të tu gëzimin e shenjtë, dhe, pasi i shpëtove prej robërisë së mëkatit, bëj të gëzojnë me ty për amshim. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.
Leximi i parë (Oz 10, 1-3.7-8.12) (fq. 1240/41)
Është koha ta kërkojmë Zotin.
Lexim prej Librit të Ozesë profet
1 Shermendmadhe hardhi Izraeli, jepte fruta me mbushullim; sipas shumësisë së frutave të saja, edhe lterët i shumoi, sipas begatisë së tokës së vet, i stolisi tempujt e vet. 2 Zemrën e vet e ka të ndarë, s'do të vonojnë, do ta paguajnë! Zoti lterët do t'ua thyejë, tempujt e tyre do 'i rrënojë! 3 Atëherë ata kanë për të thënë: 'Nuk kemi mbret, sepse nuk e druam Zotin. Po mbreti për ne ç'do të bënte?' 7 E pat Samaria, mbreti i saj kashtërrojë mbi ujë! 8 Do të rrafshohen lartësitë e turpshme, mëkati i Izraelit! Do të ngallitin ferrë, hallugë përmbi lterët e tyre! Atëherë maleve do t'u thonë: 'Na mbuloni!' edhe kodrave: 'Mbi ne bini!' 12 Drejtësinë mbillni dashuri do të korrni! Tokë të re çelni: është koha Zotin të kërkoni derisa të vijë e ta zbrazë mbi ju drejtësinë.
Fjala e Zotit
Psalmi 105 (104), 2-3.4-5.6-7 (fq. 778)
Ref. Kërkojeni gjithmonë fytyrën e Zotit.
2 Këndoni, luani në vegla muzikore për nder të tij,
kujtoni të gjitha mrekullitë e tija!
3 Mburruni me Emrin e tij të shenjtë:
le të galdojë zemra e atyre që e kërkojnë Zotin.
Ref. Kërkojeni gjithmonë, fytyrën e Zotit.
4 Kërkojeni Zotin dhe fuqinë e tij,
kërkojeni gjithmonë fytyrën e tij!
5 T'ju bien në mend mrekullitë që bëri,
mrekullitë e tij dhe gjyqet e gojës së tij.
Ref. Kërkojeni gjithmonë fytyrën e Zotit.
6 Ju fara e Abrahamit, shërbëtorët e tij,
ju, o bijtë e Jakobit, të zgjedhurit e tij!
7 Ai është Zoti, Hyji ynë,
mbi mbarë tokën gjyqet e tij!
Ref. Kërkojeni gjithmonë fytyrën e Zotit.
Aleluja!
Është afër Mbretëria qiellore, kthehuni e besoni Ungjillit. (Mk 1, 15)
Ungjilli (Mt 10, 1-7) (fq. 1396)
Por shkoni më mirë te delet e humbura të shtëpisë së Izraelit.
Leximi i Ungjillit të shenjtë sipas Mateut
Në atë kohë, 1 Jezusi i mblodhi rreth vetes të dymbëdhjetë nxënësit e vet e u dha pushtetin të mund t'i dëbojnë shpirtrat e ndytë dhe të mund të shërojnë çdo sëmundje e lëngatë.
2 Emrat e Dymbëdhjetë apostujve janë këta: i pari Simoni, që quhet Pjetër e vëllai i tij Andreu; Jakobi i Zebedeut dhe Gjoni, i vëllai; 3 Filipi dhe Bartolomeu; Toma e Mateu - tagrambledhësi; Jakobi i Alfeut dhe Tadeu; 4 Simon Kananeu dhe Judë Iskarioti - ai që e tradhtoi.
5 Shi këta të Dymbëdhjetët Jezusi i dërgoi dhe u urdhëroi: »Mos shkoni ndër paganë as mos hyni në asnjë qytet të samaritanëve! 6 Por shkoni më mirë te delet e humbura të shtëpisë së Izraelit. 7 Gjatë udhëtimit predikoni: 'Mbretëria e qiellit është ngjat!'
Fjala e Zotit
Lutja mbi dhurata
O Zot, na pastroftë kushti që po ia paraqesim emrit tënd dhe na drejtoftë përditë kah jeta qiellore. Nëpër Krishtin Zotin tonë.
Antifona e kungimit Ps 33, 9
Shijoni e shihni sa i mirë është Zoti. I lumi ai që shpreson në të.
Ose: Mt 11, 28
Ejani tek unë ju të gjithë që jeni të lodhur prej barrës së rëndë dhe unë do t’ju çlodh, thotë Zoti.
Lutja pas kungimit
O Zot, Ti na mbushe me dhurata kaq të mrekullueshme: na ndihmo ta fitojmë shpëtimin e amshuar dhe kurrë të mos pushojmë duke të të lëvduar. Nëpër Krishtin Zotin tonë.