Leximet e ditës

JAVA E XV GJATË VITIT

 

E HËNË

 

Antifona e hyrjes Krh. Ps. 16, 15

 

Unë në drejtësi do të dukem përpara teje; do të kënaqem kur të shfaqet lavdia jote.

 

Kolekta

 

O Hyj, Ti ua tregon dritën e së vërtetës sate atyre që humbën për t’u kthyer në udhën tënde: bëj që të gjithë ata që e pranojnë se janë të krishterë, të flakin çka i kundërshton këtij emri e të pranojnë çka i përket. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Is 1, 10-17) (fq. 974/5)

 

Lahuni, pastrohuni, Hiqeni fajësinë tuaj prej syve të mi, pushoni të bëni keq.

 

Lexim prej Librit të Isaisë Profet

 

¹⁰ Dëgjojeni fjalën e Zotit, o prijës të Sodomës! Dëgjoje Urdhrin e Hyjit tonë, o populli i Gomorës! ¹¹ "Ç'më duhen flitë tuaja të panumërta?" - thotë Zoti. - "Jam ngopur me fli shkrumbimi deshësh, me dhjamë bagëtish të majura; e gjak demash qengjash e edhash nuk dua! ¹² Kur donit të dilni përpara meje, kush i kërkoi këto prej duarve tuaja që të shëtitni nëpër tremet e mia? ¹³ Pushoni të më sillni fli të padobi; në iri e kam kemin. Hëna e re, e shtuna dhe tubimet... s'duroj dot paudhësi e festime bashkë! ¹⁴ Hënat e reja e festimet tuaja i urren shpirti im, u bënë barrë e rëndë për mua, s'mund t'i duroj më! ¹⁵ Kur i shtrini duart tuaja në uratë, unë i largoj sytë e mi prej jush; edhe nëse i shumoni uratat tuaja, unë nuk ju dëgjoj. Duart tuaja pikojnë gjak. ¹⁶ Lahuni, pastrohuni, Hiqeni fajësinë tuaj prej syve të mi, pushoni të bëni keq! ¹⁷ Mësoni të bëni vepra të mira: kërkojeni drejtësinë, ndihmoni të shtypurit, jepni të drejtën bonjakut, mbrojeni të vejën!

 

Fjala e Zotit

 

Psalmi 50 (49), 8-9.16bc-17.21.23 (fq. 713)

 

Ref. Atij që ecën në udhë të drejtë, do ia tregoj shëlbimin e Hyjit.

 

⁸ Nuk të qortoj për flitë e tua,

flitë e shkrumbimit të tuat i kam gjithherë para sysh!

⁹ S'do të pranoj prej shtëpisë sate mëzat,

as cjap prej tufave të tua.

 

Ref. Atij që ecën në udhë të drejtë, do ia tregoj shëlbimin e Hyjit.

 

¹⁶ Si guxon ti t’i shtjellosh urdhërimet e mia?

Si e merr nëpër gojë Besëlidhjen time,

¹⁷ kur ti e urren disiplinën,

pas shpine i hedh urdhrat e mi?

 

Ref. Atij që ecën në udhë të drejtë, do ia tregoj shëlbimin e Hyjit.

 

²¹ "Kështu veprove e unë heshtova.

A mendon ti se unë jam si ti?

²³ Më nderon ai që më kushton flinë e lavdit,

do t'ia tregoj shpëtimin e Hyjit

atij që ecën udhës së drejtë.

 

Ref. Atij që ecën në udhë të drejtë, do ia tregoj shëlbimin e Hyjit.

 

Aleluja!

Lum ata që salvohen për shkak të drejtësisë, sepse e tyre është Mbretëria qiellore. (krh. Mt 5, 10)

Aleluja!

 

Ungjilli (Mt 10, 34 - 11, 1) (fq. 1397)

 

Nuk erdha ta bie paqen, por shpatën.

 

Leximi i Ungjillit të shenjtë sipas Mateut

 

Në atë kohë, Jezusi u tha nxënësve te vet: ³⁴ »Mos mendoni se erdha ta bie paqen mbi tokë. Nuk erdha ta bie paqen, po shpatën. ³⁵ Sepse erdha të ndaj djalin prej t'et, vajzën prej s'ëmës, të renë prej së vjehrrës, ³⁶ Njeriu do t'i ketë armiq shtëpiakët e vet.

³⁷ Kush e do të atin e t'ëmën më shumë se mua, nuk është i denjë për mua. Kush e do djalin apo vajzën më shumë se mua, nuk është i denjë për mua! ³⁸ Kush nuk e merr kryqin e vet e nuk vjen pas meje, nuk është i denjë për mua!

³⁹ Kush do ta ruajë jetën e vet, do ta humbë, e kush do ta bjerrë jetën e vet për shkak tim, do ta rifitojë.«

⁴⁰ »Kush ju pranon ju, më pranon mua; e kush më pranon mua, pranon Atë që më dërgoi mua.

⁴¹ Kush pranon profetin pse është profet, do të marrë shpërblimin që i takon profetit; kush pranon të drejtin, pse është i drejtë, do të marrë shpërblimin që i takon të drejtit.

⁴² Kush ia jep ndonjërit prej këtyre të vegjëlve, madje edhe një gotë uji të freskët, pse është nxënësi im, për të vërtetë po ju them: nuk do t'i humbë shpërblimi!

^{11, 1} Kur Jezusi i kreu porositë që deshi t'ua japë dymbëdhjetë nxënësve të vet, u nis së andejmi për të mësuar e për të predikuar në qytetet e atjeshme.

 

Fjala e Zotit

 

Lutja mbi dhurata

 

Shikoji, o Zot, dhuratat e Kishës sate që po të lutet dhe bëj t’u shtohet shenjtëria besimtarëve, të cilët do të ushqehen me këto dhurata. Nëpër Krishtin Zotin tonë.

 

Antifona e kungimit Krh. Ps. 83, 4-5

 

Trumcaku e gjen banesën e vet edhe turtulli çerdhen e vet, ku i vendos zogjtë e vet: e unë altaret e tua, o Hyj i Ushtrive, Mbreti im dhe Hyji im! Lum ata që banojnë në shtëpinë tënde, do të të lavdërojnë për amshim.

 

Ose: Gjn 6, 57

 

Kush ha Trupin tim dhe pi Gjakun tim, ai qëndron në mua dhe unë në të, thotë Zoti.

 

Lutja pas kungimit

 

I morëm, o Zot, dhuratat e tua dhe po të lutemi që, me kremtim të shpeshtë të këtij misteri, të na shtohet fryti i shpëtimit. Nëpër Krishtin Zotin tonë.