Leximet e ditës

11 korrik

 

SHËN BENEDIKTI, ABAT

 

PAJTORI I EVROPËS

 

Festë

 

Antifona e hyrjes

 

Ishte njeri i ndershëm, me të vërtetë i bekuar, që pasi e la shtëpinë dhe pasurinë e trashëguar, me dëshirën që t’i kushtohej krejtësisht Zotit, u vesh me petkun e rregulltarisë.

 

Thuhet Lavdi

 

Lavdi Hyjit në lartësitë qiellore

e paqe njerëzve vullnetmirë mbi tokë.

Ne po të lëvdojmë,

po të bekojmë,

po të adhurojmë,

po të madhërojmë,

po të falënderojmë për lavdinë tënde të pakufi.

Zot Hyj, Mbret qiellor,

Hyj Atë i gjithëpushtetshëm.

Zot Bir i njëlindur, Jezu Krisht,

Zot Hyj, Qengji i Hyjit, Biri i Atit,

Ti që shlyen mëkatet e botës, ki mëshirë për ne,

Ti që shlyen mëkatet e botës, pranoje lutjen tonë.

Ti që rri në të djathtën e Atit, ki mëshirë për ne.

Sepse vetëm Ti je Shenjti, vetëm Ti je Zoti,

vetëm Ti je i Tejetlarti, o Jezu Krisht,

së bashku me Shpirtin Shenjt,

në lavdinë e Hyjit Atë. Amen.

 

Kolekta

 

O Hyj, Ti e bëre shën Benediktin abat mësues të shquar në shkollën e shërbimit hyjnor, bëj, po të lutemi, të të duam ty mbi gjithçka e të vrapojmë me zemër të çiltër udhës së urdhërimeve të tua. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Fu 2, 1-9) (fq. 833)

 

Prire zemrën tënde për të njohur mençurinë.

 

Lexim prej Librit të fjalëve të urta

 

¹Biri im, nëse i pranon fjalët e mia dhe nëse duke ia vënë veshin urtisë dhe ²duke e prirur zemrën tënde për ta njohur mençurinë; ³nëse patjetër do ta vësh në veprim kuptimin e nëse do ta ftosh maturinë, ⁴nëse do ta kërkosh porsi argjendin, nëse do ta kërkosh porsi visarin, ⁵veç atëherë do ta kuptosh frikën e Zotit dhe do ta gjesh dijen e Hyjit. ⁶Sepse ai që e dhuron urtinë është Zoti dhe prej gojës së tij del dija e mençuria. ⁷Ai e ruan për udhëheqës aftësinë, mburojë do të jetë për ata që e ndjekin të drejtën.

⁸Ai e mbron atë që ecën udhës së drejtësisë, që i ruan udhët e shenjtërve.

⁹Atëherë do ta kuptosh drejtësinë e gjyqin, të drejtën dhe të gjitha udhët e mira.

 

Fjala e Zotit

 

Psalmi 34 (33), 2-3.4-5.6-7.8-9.10-11 (fq. 790)

 

Ref. Sprovoni e shihni sa i mirë është Zoti.

 

² Përherë do ta bekoj Zotin,

në gojën time përherë lavdi i tij.

³ Shpirti im mburret në Zotin:

le të dëgjojnë të përvuajturit e le të gëzohen.

 

Ref. Sprovoni e shihni sa i mirë është Zoti.

 

⁴ Bashkë me mua jepni lavdi Zotit,

le ta lartësojmë së bashku Emrin e tij.

⁵ E kërkova Zotin e ai më dëgjoi

edhe më çliroi nga çdo frikë që pata.

 

Ref. Sprovoni e shihni sa i mirë është Zoti.

 

⁶ Shikojeni atë e do të ndriçoheni

fytyra juaj nuk do të turpërohet.

⁷ Ja, ky skamnor e thirri në ndihmë e Zoti e dëgjoi

dhe e shpëtoi nga të gjitha vuajtjet e tija.

 

Ref. Sprovoni e shihni sa i mirë është Zoti.

 

⁸ Engjëlli i Zotit ngreh llogore rreth atyre

që e kanë frikë dhe i shpëton.

⁹ Sprovoni e shihni sa i mirë është Zoti!

I lumi ai që shpreson në të!

 

Ref. Sprovoni e shihni sa i mirë është Zoti.

 

¹⁰ Nderojeni Zotin, ju shenjtërit e tij,

s’u mungon gjë atyre që e druajnë.

¹¹ Pasanikët u varfëruan dhe patën uri,

ata që kërkojnë Zotin do të kenë çdo të mirë.

 

Ref. Sprovoni e shihni sa i mirë është Zoti.

 

Aleluja!

Lum skamnorët në shpirt sepse e tyre është Mbretëria e qiejve! (Mt 5, 3)

Aleluja!

 

Ungjilli (Mt 19, 27-29) (fq. 1411)

 

Ju që me keni ndjekur, do të merrni njëqind për një.

 

Leximi i Ungjillit të shenjtë sipas Mateut

 

Në atë kohë, ²⁷ Pjetri mori fjalën dhe e pyeti Jezusin: »Ja, ne lamë çdo gjë dhe erdhëm pas teje, çka, pra, do të fitojmë?«

²⁸ Jezusi u tha: »Për të vërtetë po ju them: ju që erdhët pas meje, në ripërtëritje të botës - kur Biri i njeriut të rrijë mbi fronin e lavdisë së vet - edhe ju do të rrini mbi dymbëdhjetë frone dhe do të gjykoni dymbëdhjetë fiset e Izraelit. ²⁹ Edhe kushdo që të lërë, për dashuri të emrit tim, shtëpi ose vëllezër, ose motra, ose babë ose nënë, ose grua ose fëmijë, ose ara, do të marrë njëqind për një dhe do të fitojë jetën e pasosur.

 

Fjala e Zotit

 

Lutja mbi dhurata

 

Pranoji me mirësi, o Zot, dhuratat e shenjta që po t’i kushtojmë në festën e shën Benediktit; bëj që, sipas shembullit të tij, të të kërkojmë vetëm ty e t’i fitojmë në shërbesën tënde të mirat e bashkimit e të paqes. Nëpër Krishtin Zotin tonë.

 

Antifona e kungimit Lk 12, 42

 

Mbarështues besnik e i mençur që do të të vërë Zotëria përmbi shërbëtorët e tjerë për t’u dhënë në kohën e duhur pjesën e ushqimit.

 

Lutja pas kungimit

 

Pasi e morëm pengun e jetës së amshueshme, me përvujtëri, po të lutemi, o Zot, bëj që, duke jetuar sipas mësimeve të shën Benediktit, t’i shërbejmë me besnikëri veprës sate e t’i duam vëllezërit me dashuri të flaktë. Nëpër Krishtin Zotin tonë.