Leximet e ditës

JAVA E XIV GJATË VITI

 

E PREMTE

 

Antifona e hyrjes Krh. Ps 47, 10-11

 

E kujtojmë, o Hyj, mëshirën tënde në mesin e tempullit tënd. Sikurse emri yt, o Hyj, ashtu edhe lavdia jote arrin deri në skajin e botës, e djathta jote është plot drejtësi.

 

Kolekta

 

O Hyj, Ti me përvujtërinë e Birit tënd e ngrite botën që pati rënë poshtë: jepu besimtarëve të tu gëzimin e shenjtë, dhe, pasi i shpëtove prej robërisë së mëkatit, bëj të gëzojnë me ty për amshim. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Oz 14, 2-10) (fq. 1244)

 

S'do t'i thërrasim më 'Hyjnitë tona!' veprat e duarve tona.

 

Lexim prej Ozesë profet

 

² Kthehu, o Izrael, te Zoti, Hyji yt, faji është yt pse more në thua! ³ Përgatitni fjalët edhe kthehuni kah Zoti e thoni: 'Na e shlyej çdo fajësi, prano çka është e mirë e do të kushtojmë frytin e buzëve tona. ⁴ Asyria s'do të na shpëtojë, kalit në shpinë nuk do t'i hipim as s'do t'i thërrasim më 'Hyjnitë tona!' veprat e duarve tona, sepse pranë teje bonjaku mëshirën e gjen.'

⁵ "Do ta shëroj pabesnikërinë e tyre, do t'i dua me bujari, sepse u largua zemërimi im prej tyre. Vesë do të jem për Izraelin, porsi lili do të lulëzojë, si Libani do të lëshojë rrënjët. ⁷ Hapët e drejtë do t'i shtrijë gemat, bukurinë do ta ketë të ullirit, era e tij erë e Libanit. ⁸ Do të vijnë të rrinë nën hijen time, do të bëjnë të përparojë gruri, porsi vreshti do të lulëzojnë; verë të përmendur si vera e Libanit. ⁹ Efraimi ç'ka më me idhuj të përbashkët? Unë e vështroj e kujdesem për të. Unë si bredhi gjithmonë i blertë: prej meje të vjen fryti yt!"

¹⁰ Kush është i urtë, t'i marrë vesh këto, kush është i mençur, do t'i dijë këto! Të drejta janë rrugët e Zotit e të drejtët nëpër to ecin, ndërsa të këqijtë në to marrin në thua.

 

Fjala e Zotit

 

Psalmi 51 (50), 3-4.8-9.12-13.14.17 (fq. 714)

 

Ref. Goja ime, o Zot, le ta shpall lavdinë tënde.

 

³ Ki mëshirë për mua, o Hyj, sipas mëshirës sate,

pashë mirësinë tënde shlyeje mëkatin tim!

⁴ Më laj krejtësisht prej mëkatit tim

e më pastro prej fajit tim!

 

Ref. Goja ime, o Zot, le ta shpall lavdinë tënde.

 

⁸ Ti që e do çiltërinë e zemrës,

m'i mëso thellësitë e dijes së shpirtit.

⁹ Më stërpik me hisop e do të bëhem i pastër,

më laj e do të bëhem më i bardhë se bora.

 

Ref. Goja ime, o Zot, le ta shpall lavdinë tënde.

 

¹² Krijoje në mua, o Hyj, zemrën e pastër,

përtërij në mua një shpirt të qëndrueshëm!

¹³ Mos më flak larg fytyrës sate,

mos e hiq prej meje shpirtin tënd të shenjtë.

 

Ref. Goja ime, o Zot, le ta shpall lavdinë tënde.

 

¹⁴ Ma kthe gëzimin e shpëtimit tënd,

dhe më forco me shpirt të gatshëm.

¹⁷ Zhdrivilloj, o Zot, buzët e mia,

dhe goja ime do ta shpallë lavdinë tënde.

 

Ref. Goja ime, o Zot, le ta shpall lavdinë tënde.

 

Aleluja!

E kur të vijë ai - Shpirti i së Vërtetës - Ai do t’ju udhëzojë ta njihni tërë të Vërtetën, e do t’ju përkujtojë gjithçka [unë] ju thashë. (Gjn 16, 13a; 14, 26d)

Aleluja!

 

Ungjilli (Mt 10, 16-23) (fq. 1396)

 

Nuk do të jeni ju që do të flisni, por Shpirti i Atit tuaj do të flasë nëpër ju.

 

Leximi i Ungjillit të shenjtë sipas Mateut

 

Në atë kohë, Jezusi u tha nxënësve të vet: ¹⁶ »Ja, unë po ju dërgoj porsi dele midis ujqish! Jini, prandaj të mençur porsi gjarpërinjtë dhe të thjeshtë porsi pëllumbat!

¹⁷ Ruajuni prej njerëzve: sepse do t'ju pandehin në gjyqe, do t'ju frushkullojnë në sinagoga të tyre. ¹⁸ Për shkak timin do t'ju qesin para sundimtarëve e mbretërve, që të dëshmoni para tyre dhe para paganëve. ¹⁹ E kur t'ju dorëzojnë, mos u shqetësoni se çka dhe si do të flisni, sepse në atë moment do t'ju jepet çka duhet të thoni, ²⁰ sepse nuk do të jeni ju që do të flisni, por Shpirti i Atit tuaj do të flasë nëpër ju.

²¹ Vëllai vëllanë dhe babai fëmijën do ta dorëzojë në vdekje; edhe fëmijët do të ngrihen kundër prindërve të vet dhe do t'i vrasin. ²² Edhe ju do t'ju urrejnë të gjithë për shkak të Emrit tim, porse, kush të qëndrojë deri në fund, ai do të shëlbohet.

²³ Kur t'ju salvojnë në njërin qytet, ikni në tjetrin! Përnjëmend, po ju them: nuk do t'i përshkoni qytetet e Izraelit para se të vijë Biri i njeriut.

 

Fjala e Zotit

 

Lutja mbi dhurata

 

O Zot, na pastroftë kushti që po ia paraqesim emrit tënd dhe na drejtoftë përditë kah jeta qiellore. Nëpër Krishtin Zotin tonë.

 

Antifona e kungimit Ps 33, 9

 

Shijoni e shihni sa i mirë është Zoti. I lumi ai që shpreson në të.

 

Ose: Mt 11, 28

 

Ejani tek unë ju të gjithë që jeni të lodhur prej barrës së rëndë dhe unë do t’ju çlodh, thotë Zoti.

 

Lutja pas kungimit

 

O Zot, Ti na mbushe me dhurata kaq të mrekullueshme: na ndihmo ta fitojmë shpëtimin e amshuar dhe kurrë të mos pushojmë duke të të lëvduar. Nëpër Krishtin Zotin tonë.