Leximet e ditës

JAVA E XVII GJATË VITIT

 

E HËNË

 

Antifona e hyrjes Krh. Ps 67, 6-7.36

 

Hyji është në banesën e vet të shenjtë; Hyji që i bashkon të gjithë në banesën e vet, ai i jep popullit të vet pushtet dhe fuqi.

 

Kolekta

 

O Hyj, Ti je mburoja e atyre që shpresojnë në ty: pa ty asgjë s’është e vyeshme as e shenjtë; na pajis me mëshirën tënde dhe na prij e na drejto, ashtu t’i përdorim të mirat e kalueshme, që qysh tani të jepemi pas të mirave të amshuara. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Jer 13, 1-11) (fq. 1070)

 

Populli i Izraelit do të bëhet sikurse ky brez që s’vlen më për kurrgjë.

 

Lexim prej Librit të Jeremisë profet

 

¹ Kështu më tha Zoti: “Shko e bleje një brez të linjtë dhe ngjeshi me të ijët e tua, por mos e shtjer në ujë.” ² Unë e bleva brezin si më tha Zoti dhe e ngjesha rreth ijëve të mia.

³ Së dyti më qe drejtuar fjala e Zotit e më tha: ⁴ “Merre brezin që bleve, që e ke rreth belit tënd, çohu e shko në Eufrat dhe fshehe atje në një vrimë shkëmbi”. ⁵ Shkova dhe e fsheha te Eufrati siç më kishte urdhëruar Zoti.

⁶ Pas shumë ditësh Zoti më tha: “Ngrehu e shko në Eufrat dhe merre prej andej brezin që të urdhërova ta fshehësh atje”. ⁷ Shkova tek Eufrati, e hapa vrimën dhe e nxora brezin nga vendi, ku e kisha fshehur, dhe, ja, brezi ishte kalbur, ashtu që s’vlente më për kurrgjë.

⁸ Atëherë më qe drejtuar kjo fjalë e Zotit: ⁹ ”Kështu do të bëj të kalbet krenaria e madhe e Judës dhe e Jerusalemit. ¹⁰ Ky popull tejet i keq që s’duan t’i dëgjojnë fjalët e mia dhe jetojnë sipas zemërkeqësisë së tyre dhe shkuan pas zotave të huaj për t’u shërbyer e për t’i adhuruar do të jetë porsi ky brez që s’vlen më për kurrgjë. ¹¹ Sepse, sikurse brezi që ngjeshët rreth ijëve të njeriut, kështu kam dashur që të ngjeshët rreth meje mbarë shtëpia e Izraelit e mbarë shtëpia e Judës - është fjala e Zotit – që të jetë populli im zëri im i mirë, lavdia ime, nderi im, por nuk dëgjuan!”

 

Fjala e Zotit

 

Psalmi Lp 32, 18-19.20.21 (fq. 255)

 

Ref. E harrove Hyjin që të lindi.

 

¹⁸ E ke lënë Qetën që të lindi,

harrove Krijuesin tënd!

¹⁹ Pa Zoti dhe i përbuzi,

sepse e nguci bami i vet.

 

Ref. E harrove Hyjin që të lindi.

 

²⁰ “Fytyrën tha do ta fsheh prej tyre,

do të shikoj se ç’fund do të kenë!

Vërtet janë pjellë shumë e keqe,

bij, në të cilët besë nuk ka.

 

Ref. E harrove Hyjin që të lindi.

 

²¹ Më ngucën me zota të rrejshëm,

më hidhëruan me idhuj të kotë.

Do t’i ngucë edhe vetë me një popull,

që s’është popull askund, fare.

 

Ref. E harrove Hyjin që të lindi.

 

Aleluja!

Ai na lindi në saje të vullnet të vet, nëpër fjalën e së vërtetës, që të jemi njëfarë fryti të parë të krijesave të tija. (krh. Jak 1, 18)

Aleluja!

 

Ungjilli (Mt 13, 31-35) (fq. 1402)

 

Kokrra e sinapit zhvillohet në lëndë sa që shpendët e qiellit vijnë e bëjnë çerdhe në degë të tij.

 

Leximi i Ungjillit të shenjtë sipas Mateut

 

Në atë kohë, ³¹ Jezusi i tregoi turmës një shëmbëlltyrë tjetër; Mbretëria e qiellit është e ngjashme me kokrrën e sinapit, të cilën njeriu e mori dhe e mbolli në arën e vet. ³² Ajo është, pa dyshim, më e vogla ndër të gjitha farërat, por, kur rritet, bëhet më e madhe se të gjitha barishtet, zhvillohet në lëndë, sa që shpendët e qiellit vijnë e bëjnë çerdhe në degë të tij.”

³ U tregoi edhe një shëmbëlltyrë tjetër: Mbretëria e qiellit i përngjan tharmit që e merr gruaja dhe e përzien me tri masë miell derisa të mbruhet të gjithë.” ³⁴ Të gjitha këto Jezusi ia tha popullit në shëmbëlltyra dhe asgjë nuk i thoshte pa shëmbëlltyra ³⁵ që të plotësohej fjala e profetit: ‘Do të flas në shëmbëlltyra, do të zbuloj gjëra të fshehura që nga krijimi i botës’.

 

Fjala e Zotit

 

Lutja mbi dhurata

 

Pranoji, o Zot, dhuratat që bujaria jote na ka falur, e bëj që këto mistere të shenjta, në saje të hirit tënd, ta shenjtërojnë jetën tonë të tanishme dhe të na çojnë drejt gëzimeve të amshuara. Nëpër Krishtin Zotin tonë.

 

Antifona e kungimit Ps 102, 2

 

Bekoje, shpirti im, Zotin dhe mos i harro bamirësitë e tij.

 

Ose: Mt 5, 7-8

 

Lum të mëshirshmit, sepse do të gjejnë mëshirë. Lum të pastrit në zemër, sepse do ta shohin Hyjin.

 

Lutja pas kungimit

 

E morëm, o Zot, sakramentin hyjnor, kujtimin e përjetshëm të mundimeve të Birit tënd; bëj, po të lutemi, që kjo dhuratë që kemi marrë prej dashurisë së tij të pakufi të na vlejë për shpëtimin tonë. Ai jeton e mbretëron në shekujt e shekujve.