Leximet e ditës

JAVA E XVII GJATË VITIT

 

E ENJTE

 

Antifona e hyrjes Krh. Ps 67, 6-7.36

 

Hyji është në banesën e vet të shenjtë; Hyji që i bashkon të gjithë në banesën e vet, ai i jep popullit të vet pushtet dhe fuqi.

 

Kolekta

 

O Hyj, Ti je mburoja e atyre që shpresojnë në ty: pa ty asgjë s’është e vyeshme as e shenjtë; na pajis me mëshirën tënde dhe na prij e na drejto, ashtu t’i përdorim të mirat e kalueshme, që qysh tani të jepemi pas të mirave të amshuara. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Jer 18, 1-6) (fq. 1076/7)

 

Ju jeni në duart e mia si deltina në dorën e vegsharit!

 

Lexim prej Librit të Jeremisë profet

 

¹ Kjo fjalë i qe drejtuar prej Zotit Jeremisë: ² “Çohu e zbrit në shtëpi të vegsharit dhe aty do t’i dëgjosh fjalët e mia!”

³ Unë zbrita në shtëpinë e vegsharit dhe, ja, ai po punonte në çarkun e vet. ⁴ Dhe iu prish ena që ai po e punonte prej balte me duart e veta, por përsëri me atë deltinë, punoi një enë tjetër, siç i pëlqente atij të bëjë.

⁵ Atëherë më qe drejtuar fjala e Zotit e më tha: ⁶ “Pse a nuk mund të sillem me ju si ky vorbëtar, o shtëpia e Izraelit? tha Zoti. Ja, ju jeni në duart e mia, o shtëpia e Izraelit, si deltina në dorën e vegsharit!

 

Fjala e Zotit

 

Psalmi 146 (145), 1b-2.3-4.5-6ab (fq. 826)

 

Ref. I lumi ai që e ka ndihmën e Hyjit të Jakobit.

 

¹ Lavdëroje, shpirti im, Zotin!

² Do ta lavdëroj Zotin gjithë jetën time,

derisa të jem, Hyjit tim do t’i këndoj.

 

Ref. I lumi ai që e ka ndihmën e Hyjit të Jakobit.

 

³ Mos e vini shpresën tuaj në princa,

në njeri që s’është i zoti të shpëtojë.

⁴ Njeriu jep shpirt e kthehet në dheun e vet,

brenda një dite humbasin synimet e tija.

 

Ref. I lumi ai që e ka ndihmën e Hyjit të Jakobit.

 

⁵ I lumi ai që e ka ndihmën e Hyjit të Jakobit,

që e ka shpresën në Zotin, Hyjin e vet,

⁶ i cili krijoi qiellin e tokën,

detin e gjithçka është në ta.

 

Ref. I lumi ai që e ka ndihmën e Hyjit të Jakobit.

 

Aleluja!

Hape, o Zot, zemrën tonë që t’i pranojmë fjalët e Birit tënd. (krh. Vap 16, 14b)

Aleluja!

 

Ungjilli (Mt 13, 47-53) (fq. 1402/3)

 

I mbledhin peshqit e mirë në enë e të këqijtë i tresin.

 

Leximi i Ungjillit të shenjtë sipas Mateut

 

Në atë kohë Jezusi i tha nxënësve të vet : ⁴⁷ Mbretëria e qiellit i ngjan rrjetës që hidhet në det dhe mbledh çdo lloj peshku.

⁴⁸ Kur mbushet, peshkatarët e qesin në breg, ulen dhe i mbledhin peshqit e mirë në enë e të këqijtë i tresin. ⁴⁹ Kështu do të ndodhë edhe në mbarimin e botës: do të dalin engjëjt e do t’i ndajnë të këqijtë prej të drejtëve ⁵⁰ dhe do t’i hedhin në furrë të ndezur, ku do të jetë vaj dhe kërcëllim dhëmbësh.”

⁵¹ “A i kuptuat të gjitha këto? Po! ‑ iu përgjigjën ata. ⁵² E ai u tha:

“Kështu pra, çdo skrib, që e përvetësoi mësimin e Mbretërisë së qiellit i përngjan të zotështëpisë, që nxjerr nga visari i vet gjëra të reja e të vjetra.” ⁵³ Kur Jezusi i kreu së treguari këto shëmbëlltyra, shkoi prej andej.

 

Fjala e Zotit

 

Lutja mbi dhurata

 

Pranoji, o Zot, dhuratat që bujaria jote na ka falur, e bëj që këto mistere të shenjta, në saje të hirit tënd, ta shenjtërojnë jetën tonë të tanishme dhe të na çojnë drejt gëzimeve të amshuara. Nëpër Krishtin Zotin tonë.

 

Antifona e kungimit Ps 102, 2

 

Bekoje, shpirti im, Zotin dhe mos i harro bamirësitë e tij.

 

Ose: Mt 5, 7-8

 

Lum të mëshirshmit, sepse do të gjejnë mëshirë. Lum të pastrit në zemër, sepse do ta shohin Hyjin.

 

Lutja pas kungimit

 

E morëm, o Zot, sakramentin hyjnor, kujtimin e përjetshëm të mundimeve të Birit tënd; bëj, po të lutemi, që kjo dhuratë që kemi marrë prej dashurisë së tij të pakufi të na vlejë për shpëtimin tonë. Ai jeton e mbretëron në shekujt e shekujve.