Leximet e ditës
JAVA E XVIII GJATË VITIT
E MËRKURË
Antifona e hyrjes Ps 69, 2.6
O Hyj, më eja në ndihmë, o Zot, nxito të më ndihmosh. Ti je ndihmëtari e shpëtimtari im: o Zot, mos vono.
Kolekta
O Zot, qëndro me ne, shërbëtorët e tu dhe na trego mirësinë tënde të përjetshme, e pasi mburremi se je krijuesi dhe sunduesi ynë, përtërij në ne çka ty të pëlqen, e çka të përtërish bëje të qëndrueshme. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.
Leximi i parë (Jer 31, 1-7) (fq. 1092/3)
Të desha me dashuri të amshueshme.
Lexim prej Librit të Jeremisë profet
1 Në atë kohë, është fjala e Zotit, unë do të jem Hyji i të gjitha fiseve të Izraelit dhe ato do të jenë populli im. 2 Kështu thotë Zoti: Gjeti hir në shkretëtirë populli që i shpëtoi shpatës: Izraeli po shkon drejt vendbanimit të vet!
3 Prej së largu mua Zoti m’u dëftua: “Të desha me dashuri të amshueshme, prandaj mëshirën ruajta për ty. 4 Përsëri do të të ndërtoj e do të ndërtohesh, o virgjëra e Izraelit! Përsëri do të stolisesh me tupanat e tu e do të hidhesh në valle! 5 Prapë do të mbëltosh vreshta në malet e Samarisë: do të mbëltisin mbëltitsit e do të vjelin të vjela! 6 Sepse do të vijë dita kur rojtarët do të bërtasin në malin e Efraimit: “Mëkëmbni! Të ngjitemi në Sion, te Zoti, Hyji ynë!” 7 Sepse kështu thotë Zoti: Brohoritni me gëzim për Jakobin, lavdëroni të parin ndër popuj, t’ju kumtojë zëri, këndoni e thoni: ‘Shpëtoje, o Zot, popullin tënd, Tepricat e Izraelit!’
Fjala e Zotit
Psalmi Jer 31, 10.11-12ab.13 (fq. 1093)
Ref. Zoti e ruan popullin, si bariu grigjën e vet.
10 Dëgjojeni, o popuj, fjalën e Zotit,
shpalleni ndër ishuj të largët!
Thoni: “Ai që e shpërndau Izraelin
përsëri po e bashkon,
do ta ruajë porsi bariu grigjën e vet”.
.
Ref. Zoti e ruan popullin, si bariu grigjën e vet.
11 Sepse Zoti e shpërbleu Jakobin,
e çliroi nga dora e më të fortit.
12 Do të vijnë e do të këndojnë lavde
në malin e Sionit,
do të ngarendin drejt të mirave të Zotit.
Ref. Zoti e ruan popullin, si bariu grigjën e vet.
13 Atëherë vajzat do të galdojnë ndër valle,
djelmoshat së bashku me pleq.
Zinë e tyre në galdim do ta kthej,
do t’i ngushëlloj e do t’i gëzoj pas vuajtjes.
Ref. Zoti e ruan popullin, si bariu grigjën e vet.
Aleluja!
Profet i madh u duk ndër ne! Hyji e pa popullin e vet! (Lk 7, 16)
Aleluja!
Ungjilli (Mt 15, 21-28) (fq. 1405)
Grua e madhe është feja jote!
Leximi i Ungjillit të shenjtë sipas Mateut
Në atë kohë, 21 Jezusi doli prej atij vendi e kaloi në krahinat e Tirit e të Sidonit. 22 Dhe, ja, një grua nga Kaanani, që kishte ardhur prej atyre anëve, filloi të bërtasë e të thotë: “Ki mëshirë për mua, o Zot, Biri i Davidit! Djalli po ma mundon tepër vajzën!” 23 Por ai nuk iu përgjigj fare.
Atëherë iu afruan nxënësit e tij e i thanë: “Bëja këtë nderë e të shkojë, sepse po bërtet pas nesh!” 24 Ai u përgjigj: “Unë jam i dërguar vetëm te delet e humbura të shtëpisë së Izraelit.”
25 Por ajo u afrua, u përkul thellë më nderim para tij e tha: “Më ndihmo, o Zot!” 26 Jezusi iu përgjigj: “Nuk është mirë të marrësh bukën e fëmijëve e t’ua qesësh këlyshëve të qenve.” 27 “Po, o Zot ‑ shtoi ajo ‑ se edhe këlyshët hanë dromcat që bien nga tryeza e zotërinjve të tyre.” 28 Atëherë Jezusi iu përgjigj: “O grua, e madhe është feja jote! Le të bëhet ashtu si dëshiron!” Në atë moment u shërua bija e saj.
Fjala e Zotit
Lutja mbi dhurata
Shenjtëroji, po të lutemi, o Zot, këto dhurata, pranoji si fli shpirtërore të shërbesës sonë dhe bëj që ne vetë të bëhemi fli e amshuar për ty. Nëpër Krishtin Zotin tonë.
Antifona e kungimit Ur 16, 20
Na e dhe, o Zot, bukën qiellore, që ka në vete çdo ëmbëlsirë dhe është e pëlqyeshme për çdo shije.
Ose: Gjn 6, 35
Unë jam buka e jetës, thotë Zoti. Kush vjen tek unë, nuk do të ketë më kurrë uri dhe kush beson në mua, nuk do të ketë më etje.
Lutja pas kungimit
Pasi, o Zot, na përtërin me dhurata qiellore, na shoqëro gjithmonë me mbrojtjen tënde dhe pasi nuk na mungon kurrë dashuria jote, na bëj të denjë për shëlbimin e amshuar. Nëpër Krishtin Zotin tonë.