Leximet e ditës

JAVA E XVIII GJATË VITIT

 

E SHTUNË

 

Antifona e hyrjes Ps 69, 2.6

 

O Hyj, më eja në ndihmë, o Zot, nxito të më ndihmosh. Ti je ndihmëtari e shpëtimtari im: o Zot, mos vono.

 

Kolekta

 

O Zot, qëndro me ne, shërbëtorët e tu dhe na trego mirësinë tënde të përjetshme, e pasi mburremi se je krijuesi dhe sunduesi ynë, përtërij në ne çka ty të pëlqen, e çka të përtërish bëje të qëndrueshme. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Hab 1, 12 - 2, 4) (fq. 1282)

 

Në saje të fesë së vet jeton i drejti!

 

Lexim prej Librit të Habakukut profet

 

Pse, ¹² a s’je ti, o Zot, që prej fillimit Hyji im, Shenjti im që nuk vdes kurrë? E caktove, o Zot, që të ushtrojë të drejtën, Shkëmbi im, e themelove për të ndëshkuar!

¹³ Ti, që sytë i ke aq të pastër sa që s’mund ta shikojnë të keqen, paudhësinë s’mund ta kundrosh, pse i shikon të mbrapshtët e heshton kur i keqi e përpin më të drejtin? ¹⁴ I bëre njerëzit si peshq deti, zvarranikë që zot nuk kanë mbi vete. ¹⁵ Të gjithë i gjuan kaldeu me grep. Të gjithë i nxjerr jashta me rrjetë, i bashkon në kariq të vet: për këtë gjë gëzon e galdon! ¹⁶ Këndej edhe rrjetës i kushton fli, kariqit të vet kem i djeg, sepse i sjellin kafshatë të majme, ushqim të shijshëm! ¹⁷ A për këtë, thua, do të nxjerrë shpatën për të prerë popuj pa farë mëshire?!

^2,1 Do të qëndroj në rojën time, do të ngjitem në majë të vrojtores, do të vëzhgoj të shoh çka do të më thotë, ç’do të më përgjigjet në ankimin tim. ² Zoti atëherë më përgjigji e më tha: “Shkruaje vegimin, zgavrroje përmbi rrasëza që lexuesi ta lexojë rrjedhshëm. ³ Është vegim për kohë të caktuar, kah përmbushja shkon, nuk gënjen; nëse vonon, prite me shpresë, se do të vijë e s’do të vonojë! ⁴ Sharron ai që i drejtë s’është në shpirt: në sajë të fesë së vet jeton i drejti!

 

Fjala e Zotit

 

Psalmi 9, 8-9.10-11.12-13 (fq. 666)

 

Ref. Ti nuk e braktis, o Zot, atë që të kërkon.

 

⁸ Zoti sundon në jetë të jetës,

e vendosi fronin e vet të gjykojë;

⁹ Ai vetë me drejtësi gjykon mbarë botën,

ua jep popujve dënimin e drejtë.

 

Ref. Ti nuk e braktis, o Zot, atë që të kërkon.

 

¹⁰ Zoti është strehimi i të salvuarit,

vend i sigurt për ditë të vështira.

¹¹ Le të shpresojnë në ty ata që e njohin Emrin tënd,

sepse ti s’i lëshon dore ata që të kërkojnë ty, o Zot.

 

Ref. Ti nuk e braktis, o Zot, atë që të kërkon.

 

¹² Këndoni Zotit që banon në Sion,

kumtoni ndër popuj mrekullitë e tija!

¹³ Sepse si ndëshkues gjakësorësh në mend i bie për ta,

e britmën e skamnorit nuk e qet në harresë.

 

Ref. Ti nuk e braktis, o Zot, atë që të kërkon.

 

Aleluja!

Shëlbuesi ynë, Jezu Krishti e asgjësoj vdekjen dhe bëri të shndrit jeta dhe pavdekësia me anë të Ungjillit. (2 Tim 1, 10)

Aleluja!

 

Ungjilli (Mt 17, 14-20) (fq. 1408)

 

Në paçit fe, asgjë s’do t’ju jetë e pamundshme.

 

Leximi i Ungjillit të shenjtë sipas Mateut

 

Në atë kohë, ¹⁴ iu afrua Jezusit një njeri, ra në gjunjë para tij ¹⁵ dhe i tha: “Zotëri, ki mëshirë për djalin tim: i bie e tokës dhe po vuan shumë. Shpesh bie herë në zjarr e herë në ujë! ¹⁶ E solla te nxënësit e tu, por ata s’mundën ta shërojnë.”

¹⁷ “O brezni e pafe dhe e prishur ‑ u përgjigj Jezusi ‑ deri kur do të jetoj mes jush? Po deri kur do t’ju duroj? Ma bini këtu!” ¹⁸ Atëherë Jezusi i urdhëroi djallit e ky doli prej djaloshit, që u shërua në atë çast.

¹⁹ Atëherë nxënësit, iu afruan veçmas Jezusit dhe e pyetën: “Përse ne nuk mundëm ta dëbojmë?” ²⁰ Ai u përgjigj: “Për shkak të besimit tuaj të pakët! Përnjëmend po ju them: në paçit fe edhe vetëm sa një kokërr sinapi e i thoni këtij mali: ‘Dil këndej e shko atje!’ do të kalojë dhe asgjë s’do t’ju jetë e pamundshme!”

 

Fjala e Zotit

 

Lutja mbi dhurata

 

Shenjtëroji, po të lutemi, o Zot, këto dhurata, pranoji si fli shpirtërore të shërbesës sonë dhe bëj që ne vetë të bëhemi fli e amshuar për ty. Nëpër Krishtin Zotin tonë.

 

Antifona e kungimit Ur 16, 20

 

Na e dhe, o Zot, bukën qiellore, që ka në vete çdo ëmbëlsirë dhe është e pëlqyeshme për çdo shije.

 

Ose: Gjn 6, 35

 

Unë jam buka e jetës, thotë Zoti. Kush vjen tek unë, nuk do të ketë më kurrë uri dhe kush beson në mua, nuk do të ketë më etje.

 

Lutja pas kungimit

 

Pasi, o Zot, na përtërin me dhurata qiellore, na shoqëro gjithmonë me mbrojtjen tënde dhe pasi nuk na mungon kurrë dashuria jote, na bëj të denjë për shëlbimin e amshuar. Nëpër Krishtin Zotin tonë.