Leximet e ditës
JAVA E XIX GJATË VITIT
E MARTË
Antifona e hyrjes Krh. Ps 73, 20.19.22.23
Shiko, o Zot, mbi besëlidhjen tënde dhe mos e harro kurrë jetën e të varfërve të tu. Ngrihu, o Hyj, dhe mbroje çështjen tënde, e mos e harro britmën e atyre që të kërkojnë.
Kolekta
O Hyj i gjithëpushtetshëm dhe i amshuar, të mësuar nga Shpirti Shenjt guxojmë të të thërrasim Atë: përforcoje në ne shpirtin e bijësisë hyjnore, që të meritojmë të hyjmë në trashëgimin e premtuar. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.
Leximi i parë (Ez 2, 8-3, 4) (fq. 1147/8)
Unë e hëngra atë libër dhe për gojën time qe i ëmbël si mjalti.
Lexim prej Librit të Ezekielit profet
Kështu thotë Zoti: 8 E ti, biri i njeriut, dëgjo ç’po të them: mos ji kryekëcyer porsi kjo pjellë kundërshtarësh; hape gojën dhe ha çka unë po të jap.” 9 Shikova dhe, ja, një dorë ishte e shtrirë drejt meje e në të ishte një libër i mbështjellë. E shtriu ndër sy të mi dhe, ja, ishte i shkruar përbrenda e përjashta: ishin të shkruara vajtime, gjëmë e dënesje.
3, 1 Ai më tha: “Biri i njeriut, haje ç’të është vënë përpara! Haje këtë rrotull dhe nisu e folu bijve të Izraelit!” 2 Unë e hapa gojën, ai më bëri ta ha rrotullin 3 e më tha: “Biri i njeriut, ushqeju dhe ngiju me këtë vëllim që unë po ta jap.” Unë e hëngra dhe për gojën time qe i ëmbël si mjalti. 4 Atëherë më tha: “Biri i njeriut, shko te shtëpia e Izraelit dhe thuaju fjalët e mia.
Fjala e Zotit
Psalmi 119 (118), 14.24.72.103.111.131 (fq. 797/805)
Ref. Sa të ëmbla janë premtimet e tua, o Zot!
14 Më shumë i gëzohem udhës së dëshmive të tua
se pasurisë tejet të madhe.
24 Sepse dëshmitë e tua janë kënaqja ime,
rregulloret e tua këshilltarët e mi.
Ref. Sa të ëmbla janë premtimet e tua, o Zot!
72 Më i mirë është për mua Ligji yt
se me mijëra monedha ari e argjendi.
103 Sa të ëmbla janë për qiellzën time fjalët e tua,
më të ëmbla se mjalti për gojën time.
Ref. Sa të ëmbla janë premtimet e tua, o Zot!
111 Dëshmitë e tua janë trashëgimi im i përhershëm,
janë kënaqësia e shpirtit tim.
131 Hap gojën e marr frymë
i mallëngjyer për porositë e tua.
Ref. Sa të ëmbla janë premtimet e tua, o Zot!
Aleluja!
Merrni mbi vete zgjedhën time, thotë Zoti, pranoni t’ju mësoj unë që jam zemër butë e i përvujtë. (Mt 11, 29ab)
Aleluja!
Ungjilli (Mt 18, 1-5.10.12-14) (fq. 1408/9)
Nëse nuk bëheni si fëmijët, nuk do të hyni në Mbretërinë e qiellit.
Leximi i Ungjillit të shenjtë sipas Mateut
1 Në atë kohë, nxënësit iu afruan Jezusit dhe e pyetën: “Kush, pra, është më i madhi në Mbretërinë e qiellit?”
2 Atëherë Jezusi thirri një fëmijë, e vuri para tyre 3 e u tha:
“Përnjëmend po ju them: nëse nuk ktheheni e nuk bëheni si fëmijët, nuk do të hyni në Mbretërinë e qiellit. 4 Prandaj, kush e përul vetveten e bëhet i vogël si ky fëmijë, ai është më i madhi në Mbretërinë e qiellit. 5 Dhe kushdo e pranon në Emër tim një fëmijë sikurse është ky, ai më pranon mua.”
10 “Ruajuni se përbuzni ndonjë prej kësi të vegjlish, sepse po ju them: engjëjt e tyre në qiell shohin vazhdimisht fytyrën e Atit tim qiellor. [11]
12 Ç’ju thotë mendja? Po i pati ndokush njëqind dele dhe po i treti njëra prej tyre, a nuk i lë të nëntëdhjetenëntat në mal e nuk shkon për të kërkuar atë që i treti? 13 Dhe, po ia doli ta gjejë, për të vërtetë po ju them: për atë gëzohet më tepër se për nëntëdhjetenëntë të tjerat, që nuk i humbën. 14 Kështu as Ati juaj që është në qiell nuk do të tretë asnjë ndër këta të vegjlit.”
Fjala e Zotit
Lutja mbi dhurata
Pranoji, o Zot, dhuratat e Kishës sate, të cilat Ti vetë ia dhe për t’i kushtuar dhe me pushtetin tënd shndërroji në sakramentin e shpëtimit tonë. Nëpër Krishtin Zotin tonë.
Antifona e kungimit Ps 147, 12.14
Lëvdoje, o Jerusalem, Zotin, sepse ai të ushqen me më të mirin grurë.
Ose: Krh. Gjn 6, 52
Buka që unë do t’ju jap është Trupi im për jetën e botës, thotë Zoti.
Lutja pas kungimit
Na shpëtoftë, o Zot, pjesëmarrja në sakramentet e tua dhe na forcoftë në dritën e së vërtetës sate. Nëpër Krishtin Zotin tonë.