Leximet e ditës

JAVA E XIX GJATË VITIT

 

E MËRKURË

 

Antifona e hyrjes Krh. Ps 73, 20.19.22.23

 

Shiko, o Zot, mbi besëlidhjen tënde dhe mos e harro kurrë jetën e të varfërve të tu. Ngrihu, o Hyj, dhe mbroje çështjen tënde, e mos e harro britmën e atyre që të kërkojnë.

 

Kolekta

 

O Hyj i gjithëpushtetshëm dhe i amshuar, të mësuar nga Shpirti Shenjt guxojmë të të thërrasim Atë: përforcoje në ne shpirtin e bijësisë hyjnore, që të meritojmë të hyjmë në trashëgimin e premtuar. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Ez 9, 1-7; 10, 18-22) (fq. 1153/4)

 

Shënoje një “tau’’ mbi ballin e atyre njerëzve që ofshajnë për shkak të gjitha këtyre turpësive që po bëhen në Jerusalem.

 

Lexim prej Librit të Ezekielit profet

 

¹ Një zë i fortë bërtiti në veshët e mi e më tha: “U afruan ndëshkimet e qytetit! Secili le ta ketë në dorë veglën e vrasjes!” ² Dhe ja, gjashtë vetë po vinin nga dera e lartë, nga ajo që shikon drejt veriut, e secili mbante në dorën e vet armën e goditjes. Midis tyre ishte një tjetër njeri i veshur me petka të linjta e veglat e shkrimit i kishte në brez. Hynë dhe zunë vend përbri lterit të tumbakët. ³ Lavdia e Hyjit të Izraelit, nga kerubini, mbi të cilin pushonte, u ngrit në drejtim të pragut të Tempullit dhe e thirri burrin që ishte i veshur me petka të linjta dhe që i kishte veglat e shkruesit në brez.

⁴ Zoti i tha: “Kalo përmidis qytetit nëpër Jerusalem dhe shënoje një “tau” mbi ballin e atyre njerëzve që ofshajnë dhe dënesin për shkak të të gjitha këtyre turpësive që po bëhen në mes të Jerusalemit.” ⁵ Kurse atyre të tjerëve u tha e dëgjova vetë: “Kaloni nëpër qytet e shkoni pas tij dhe goditni: syri juaj të mos ketë dhimbë e mos kini mëshirë: ⁶ vritni plak e të ri, vajzë, foshnjë e grua, tretuani farën; por ruajuni se vritni ndonjë prej atyre që e kanë shenjën “tau”. Nisjani nga Shenjtërorja ime!” Ia filluan, pra, nga pleqtë që ishin para Tempullit. ⁷ Atëherë u tha: “Dhunojeni Tempullin! Mbusheni oborrin me të vrarë! Dilni!” Ata dolën e i vrisnin ata që ishin në qytet.

¹⁸ Lavdia e Zotit doli nga pragu i Tempullit e zuri vend mbi kerubinë. ¹⁹ Kerubinët i hapën krahët e vet ndër sy të mi e u ngritën nga toka, e, duke u nisur, me ta shkuan edhe rrotat. U ndal në hyrje të derës së Shtëpisë së Zotit, në lindje. Lavdia e Zotit të Izraelit ishte mbi ta.

²⁰ Është ky po ai gjallor që e pashë nën Hyjin e Izraelit bri lumit Kobar dhe e kuptova se ishin kerubinë. ²¹ Secili ishte me katër faqe e me katër krahë edhe secili kishte nën krahë diçka të ngjashme me dorën e njeriut. ²² Fytyrat i kishin të njëjta me ato që i pashë bri lumit Kobar. Secili ecte përpara.

 

Fjala e Zotit

 

Psalmi 113 (112), 1-2.3-4.5-6 (fq. 791)

 

Ref. Lavdia jote, o Zot, i tejkalon qiejt.

 

¹ Lavdërojeni, shërbëtorët e Zotit,

lavdërojeni, Emrin e Zotit!

² Qoftë bekuar Emri i Zotit

qysh tash e deri në amshim,

 

Ref. Lavdia jote, o Zot, i tejkalon qiejt.

 

³ Që kur lind dielli e derisa perëndon

qoftë bekuar Emri i Zotit!

⁴ I madhërueshëm është Zoti mbi të gjithë popujt,

lavdia e tij i tejkalon qiejt.

 

Ref. Lavdia jote, o Zot, i tejkalon qiejt.

 

⁵ Kush është si Zoti, Hyji ynë,

që fronin e ka në Lartësi,

⁶ e nga lart vrojton qiellin e tokën?

 

Ref. Lavdia jote, o Zot, i tejkalon qiejt.

 

Aleluja!

Hyji nëpër Krishtin e pajtoj botën me vetvete, duke na e besuar neve fjalën e pajtimit. (2 Kor 5, 19)

Aleluja!

 

Ungjilli (Mt 18, 15-20) (fq. 1409)

 

Në qoftë se të dëgjon, e shpëtove vëllanë tënd.

 

Leximi i Ungjillit të shenjtë sipas Mateut

 

Në atë kohë Jezusi u tha nxënësve të vet: ¹⁵ “Në qoftë se vëllai yt mëkaton kundër teje, qortoje vetëm për vetëm. Në qoftë se të dëgjon, e shpëtove vëllain tënd. ¹⁶ Po qe se nuk të dëgjon, merr me vete edhe një ose dy njerëz të tjerë, që çdo gjë të mbështetet në pohimin e dy ose tre dëshmitarëve. ¹⁷ Në qoftë se as ata nuk i dëgjon, tregoji Kishës. Nëse as Kishën nuk e dëgjon, mbaje si të ishte pagan ose tagrambledhës.

¹⁸ Përnjëmend po ju them: çdo gjë që ju të lidhni përmbi tokë, do të jetë e lidhur edhe në qiell dhe, çdo gjë që ju të zgjidhni mbi tokë, do të jetë e zgjidhur edhe në qiell.

¹⁹ Prapë po ju them: nëse dy vetë prej jush këtu mbi tokë, të një mendimi, luten për çfarëdo sendi, Ati im që është në qiell, do t’ua japë. ²⁰ Sepse, ku janë dy ose tre të bashkuar në emrin tim, aty jam edhe unë, midis tyre.”

 

Fjala e Zotit

 

Lutja mbi dhurata

 

Pranoji, o Zot, dhuratat e Kishës sate, të cilat Ti vetë ia dhe për t’i kushtuar dhe me pushtetin tënd shndërroji në sakramentin e shpëtimit tonë. Nëpër Krishtin Zotin tonë.

 

Antifona e kungimit Ps 147, 12.14

 

Lëvdoje, o Jerusalem, Zotin, sepse ai të ushqen me më të mirin grurë.

 

Ose: Krh. Gjn 6, 52

 

Buka që unë do t’ju jap është Trupi im për jetën e botës, thotë Zoti.

 

Lutja pas kungimit

 

Na shpëtoftë, o Zot, pjesëmarrja në sakramentet e tua dhe na forcoftë në dritën e së vërtetës sate. Nëpër Krishtin Zotin tonë.