Leximet e ditës

JAVA E XIX GJATË VITIT

 

E PREMTE

 

Antifona e hyrjes Krh. Ps 73, 20.19.22.23

 

Shiko, o Zot, mbi besëlidhjen tënde dhe mos e harro kurrë jetën e të varfërve të tu. Ngrihu, o Hyj, dhe mbroje çështjen tënde, e mos e harro britmën e atyre që të kërkojnë.

 

Kolekta

 

O Hyj i gjithëpushtetshëm dhe i amshuar, të mësuar nga Shpirti Shenjt guxojmë të të thërrasim Atë: përforcoje në ne shpirtin e bijësisë hyjnore, që të meritojmë të hyjmë në trashëgimin e premtuar. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Ez 16, 1-15.60.63) (fq. 1159/61)

 

E përsosur ishte bukuria jote dhe lavdia që unë ta dhurova: por ti e shfrytëzove për fëlligështi.

 

Lexim prej Librit të Ezekielit profet

 

¹ Më qe drejtuar kjo fjalë e Zotit: ² “Biri i njeriut, njoftoja Jerusalemit të gjitha turpësitë e tija! ³ Thuaj: Kështu thotë Zoti Hyj kundër Jerusalemit: Prejardhja jote dhe vendlindja jote është toka Kanaan. Yt atë amorreas e nëna jote hetite. ⁴ Ti kur linde, ditën e lindjes sate, nuk të qe prerë kërthiza, nuk të lanë në ujë për t’u pastruar as s’qe kripur me kripë as s’qe mbështjellë me shpërgënj. ⁵ Asnjë sy s’pati dhembshuri për ty që ta bëjë ndonjërën nga këto gjëra, as s’pati mëshirë, por ditën e lindjes sate të përbuzur të hodhën përmbi faqen e dheut.

⁶ Ndërsa unë po kaloja të pashë duke u zhgërryer në gjakun tënd e të premtova ndërsa ishe ende në gjakun tënd: Jeto! Të thashë po them atëherë kur ishe në gjak: Jeto! ⁷ E bëra që të rritesh porsi bari në arë. Ti u rrite, u bëre e madhe, ia arrite moshës së vajzërisë. Parzmat e tua ngufën, flokët t’u rritën; por ishe lakuriq dhe e mbuluar me turp.

⁸ Kalova përbri teje e të pashë; mosha jote, ja, ishte mosha e dashurimit. E hodha mbi ty mallotën time dhe e mbulova zhveshtësinë tënde; atëherë unë t’u përbetova dhe lidha besëlidhjen me ty thotë Zoti Hyj e ti u bëre imja. ⁹ Unë atëherë të lava me ujë dhe ta pastrova gjakun dhe të leva me vaj. ¹⁰ Të vesha me petka të larme, në këmbë t’i mbatha sandalet prej më të mirës lëkurë, të ngjesha me li të përpunuar e të vesha me mëndafsh. ¹¹ Të stolisa me stoli, të vura në duar dorëzat, gjerdan në fytin tënd. ¹² Me unazë të zbukurova hundën, me vathë veshët e tu e me kurorën e shkëlqimit kokën tënde! ¹³ U stolise me ar e me argjend, u veshe me li të përpunuar e me mëndafsh të ngjyrëngjyrshëm. U ushqeve me më të mirin miell, me mjaltë e me vaj. U bëre shumë e bukur, tejet e hijshme, e denjë për Mbretëreshë. ¹⁴ Zëri yt i mirë u hap ndër popuj për shkak të bukurisë sate, sepse ishe e përsosur në stolinë time që ta kisha dhënë - thotë Zoti Hyj.

¹⁵ Por ty t’i mori mendtë bukuria jote dhe e shfrytëzove zërin e mirë tëndin për të bërë fëlligështi dhe i ofrove fëlligështinë tënde gjithkujt, të gjithë kalimtarëve. ⁶⁰ Por unë do ta kujtoj besëlidhjen time që e lidha me ty në ditët e rinisë sate e do të caktoj në të mirën tënde një besëlidhje të përhershme. ⁶³ që të kujtohesh e të turpërohesh e të mos guxosh kurrë më ta çilësh gojën tënde prej turpit kur unë të kam falur gjithçka ke bërë thotë Zoti Hyj.”

 

Fjala e Zotit

 

Ose:

 

Leximi i parë (Ez 16, 59-63) (fq. 1161)

 

Do ta kujtoj Besëlidhjen time që e lidha me ty.

 

Lexim prej Librit të Ezekielit profet

 

⁵⁹ Kështu thotë Zoti Hyj: Unë do të sillem me ty sikurse edhe ti u solle, ti që e theve besën me përbetim, sa që e theve deri edhe besëlidhjen. ⁶⁰ Por unë do ta kujtoj besëlidhjen time që e lidha me ty në ditët e rinisë sate e do të caktoj në të mirën tënde një besëlidhje të përhershme, ⁶³ që të kujtohesh e të turpërohesh e të mos guxosh kurrë më ta çilësh gojën tënde prej turpit kur unë të kam falur gjithçka ke bërë thotë Zoti Hyj.”

 

Fjala e Zotit

 

Psalmi Is 12, 2-3.4bcd.5-6 (fq. 988)

 

Ref. Hidhërimi yt, o Zot, u zbut dhe ti më ngushëllove.

 

² Qe, Hyji Shëlbuesi im,

kam besim e nuk kam frikë,

sepse fuqia ime e mburrja ime është Zoti,

Ai është shpëtimi im.”

 

Ref. Hidhërimi yt, o Zot, u zbut dhe ti më ngushëllove.

 

³ Me galdim do të merrni ujë

nga burimet e shëlbimit.

⁴ Edhe thoni atë ditë:

“Falënderojeni Zotin, thirreni Emrin e tij,

shpallini ndër popuj veprat e tija,

kumtojeni madhërinë e Emrit të tij!

 

Ref. Hidhërimi yt, o Zot, u zbut dhe ti më ngushëllove.

 

⁵ Këndojini Zotit, sepse bëri mrekulli,

le ta marrë vesh bota mbarë!

⁶ Brohoritni e këndoni lavde, ju banorët e Sionit,

sepse i madhërishëm është në mesin tuaj

Shenjti i Izraelit!”

 

Ref. Hidhërimi yt, o Zot, u zbut dhe ti më ngushëllove.

 

Aleluja!

Pranojeni fjalën e Hyjit jo si fjalë njerëzish, por si në të vërtetë është: si fjalën e Hyjit. (1 Sel 2, 13)

Aleluja!

 

Ungjilli (Mt 19, 3-12) (fq. 1410)

 

Moisiu ju lejoi t’i ndani gratë tuaja për shkak të karakterit tuaj të pagdhendur.

 

Leximi i Ungjillit të shenjtë sipas Mateut

 

Në atë kohë, ³ iu paraqitën Jezusit disa farisenj dhe, me qëllim që ta sprovonin, e pyetën: “A është e lejueshme ta lëshojë burri gruan për ndonjë arsye.”

⁴ Jezusi iu përgjigj: “A nuk keni lexuar: Krijuesi, kur i krijoi në fillim i krijoi mashkull e femër ⁵ e tha: ‘Për këtë arsye njeriu do ta lërë babain e nënën e vet e do të jetojë me gruan e vet e të dy do të jenë vetëm një trup?’ ⁶ Kështu ata nuk janë më dy, por një trup i vetëm. Prandaj: çka Hyji bashkoi, njeriu të mos e ndajë!”

 ⁷ Por ata vijuan: “E përse atëherë Moisiu urdhëroi: ‘të jepet letërndarja e të lëshohet?’“

 ⁸ Ai u përgjigj: “Moisiu ju lejoi t’i ndani gratë tuaja për shkak të karakterit tuaj të pagdhendur. Por në fillim nuk ka qenë ashtu. ⁹ Kurse unë po ju them: Kush e lëshon gruan e vet ‑ përveç në rast të fëlligështisë ‑ e martohet me një tjetër grua, bën kurorëthyerje; po edhe ai që martohet me gruan e ndarë, bën kurorëthyerje.”

¹⁰ Nxënësit i thanë: “Nëse qenka e tillë gjendja e burrit ndaj gruas, atëherë është më mirë të mos martohet njeriu!”

¹¹ Ai u përgjigj: “S’e kuptojnë të gjithë këtë fjalë, por vetëm ata që e morën dhuratë këtë kuptim. ¹² Sepse, ka njerëz që janë që nga barku i nënës të paaftë për martesë, ka edhe asish që njerëzit i bënë të paaftë për martesë dhe ka asish që i bien mohit martesës për dashuri të Mbretërisë së qiellit. Kush mund ta kuptojë, le ta kuptojë!”

 

Fjala e Zotit

 

Lutja mbi dhurata

 

Pranoji, o Zot, dhuratat e Kishës sate, të cilat Ti vetë ia dhe për t’i kushtuar dhe me pushtetin tënd shndërroji në sakramentin e shpëtimit tonë. Nëpër Krishtin Zotin tonë.

 

Antifona e kungimit Ps 147, 12.14

 

Lëvdoje, o Jerusalem, Zotin, sepse ai të ushqen me më të mirin grurë.

 

Ose: Krh. Gjn 6, 52

 

Buka që unë do t’ju jap është Trupi im për jetën e botës, thotë Zoti.

 

Lutja pas kungimit

 

Na shpëtoftë, o Zot, pjesëmarrja në sakramentet e tua dhe na forcoftë në dritën e së vërtetës sate. Nëpër Krishtin Zotin tonë.