Leximet e ditës

JAVA E XX GJATË VITIT

 

E HËNË

 

Antifona e hyrjes Ps 83, 10-11

 

Shiko, o Hyj, mbrojtësi ynë, shikoje fytyrën e të shuguruarit tënd. Vërtet, më e mirë është një ditë në shtëpinë tënde se një mijë të tjera.

 

Kolekta

 

O Hyj, Ti u ke përgatitur të mira të padukshme atyre që të duan: ndikoje në zemrat tona dashurinë tënde, që, duke të dashur ty në gjithçka dhe mbi gjithçka, të fitojmë prej teje trashëgimin e premtuar, që tejkalon çdo dëshirë. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Ez 24, 15-24) (fq. 1172/3)

 

Ezekieli lë t’ju mbetet shenjë: bëni gjithçka siç bëri ai.

 

Lexim prej Librit të Ezekielit profet

 

Atëherë ¹⁵ më qe drejtuar kjo fjalë e Zotit: ¹⁶ “Biri i njeriut, ja, unë po ta marr papritmas atë që është kënaqësia e syve të tu. Mos u pikëllo, mos qaj as mos derdh lot! ¹⁷ Dënes në heshtje, mos bëj gjëmë si bëhet zakonisht për të vdekur. Çallmën mbaje lidhur rreth kreje, mbathi sandalet e tua, mos e mbulo mjekrën dhe mos ha bukë pikëllimi.”

¹⁸ Në mëngjes i kisha folur popullit e në mbrëmje më vdiq gruaja. Të nesërmen në mëngjes bëra si më kishte qenë urdhëruar. ¹⁹ Populli më pyeti: “Pse nuk na tregon çka do të thotë kjo që po bën?”

²⁰ Unë iu përgjigja: “Më qe drejtuar kjo fjalë e Zotit: ²¹ Thuaji shtëpisë së Izraelit: Kështu thotë Zoti Hyjit: Ja, unë do ta përdhunoj Shenjtëroren time, mburrjen tuaj të madhe, kënaqësinë e syve tuaj, dëshirën e shpirtit tuaj. Bijtë tuaj e bijat që i keni lënë do të bien prej shpatës. ²² Bëni sikurse bëra unë: mos e mbuloni gojën me rubë e mos e hani bukën e vajtorëve, ²³ lidhni çallmet rreth kresë, mbathni sandalet në këmbë, mos u pikëlloni as mos qani, por cijzni për shkak të fajeve tuaja e secili njëri pas tjetrit le të dënesë. ²⁴ Ezekieli le t’ju mbetet shenjë: bëni gjithçka siç bëri ai kur do të ndodhë kjo e do ta dini se unë jam Zoti Hyjit.

 

Fjala e Zotit

 

Psalmi Lp 32, 18-19.20.21 (fq. 255)

 

Ref. Fali, o Atë, mëkatet e bijëve të tu.

 

¹⁸ E ke lënë Qetën që të lindi,

harrove Krijuesin tënd!

¹⁹ E pa Zoti dhe i përbuzi,

sepse e ngacmoi bami i vet.

 

Ref. Fali, o Atë, mëkatet e bijëve të tu.

 

²⁰ “Fytyrën tha do ta fsheh prej tyre,

do të shikoj se ç’fund do të kenë!

Vërtet janë pjellë shumë e keqe,

bij, në të cilët besë nuk ka.

 

Ref. Fali, o Atë, mëkatet e bijëve të tu.

 

²¹ Më ngacmuan me zota të rrejshëm,

më hidhëruan me idhuj të kotë.

Do t’i ngacmoj dhe vetë me ‘një popull,

që s’është popull askund, fare.

 

Ref. Fali, o Atë, mëkatet e bijëve të tu.

 

Aleluja!

Lum skamnorët në shpirt, sepse e tyre është Mbretëria e qiellore. (Mt 5, 3)

Aleluja!

 

Ungjilli (Mt 19, 16-22) (fq. 1410)

 

Nëse do të jesh i përsosur, shko, shit çka ke, e ke për të pasur visar në qiell.

 

Leximi i Ungjillit të shenjtë sipas Mateut

 

Në atë kohë, ¹⁶ iu afrua Jezusit një njeri dhe e pyeti: “Mësues, çfarë të mire më duhet të bëj për të fituar jetën e pasosur?” ¹⁷ Ai iu përgjigj: “Përse më pyet për të mirën? Sepse vetëm Njëri është i mirë! Por, nëse do të hysh në jetë, zbatoji urdhërimet!” ¹⁸ “E cilat? ‑ pyeti ai.

Jezusi i tha: “Mos vrit! Mos the kurorën! Mos vidh! Mos bëj dëshmi të rrejshme! ¹⁹ Ndero babanë e nënën tënde! Dhe duaje të afërmin tënd porsi vetveten” ²⁰ Djaloshi i tha: “Të gjitha këto i kam zbatuar. Çka më mungon tjetër?” ²¹ Jezusi iu përgjigj: “Nëse do të jesh i përsosur, shko, shit çka ke, faljua skamnorëve e ke për të pasur visar në qiell; pastaj eja e më ndiq mua!”

²² Por, kur djaloshi e dëgjoi këtë fjalë, shkoi i trishtuar, sepse kishte pasuri të mëdha.

 

Fjala e Zotit

 

Lutja mbi dhurata

 

Pranoji, o Zot, këto dhurata, me të cilat bëhet shndërrim i mrekullueshëm; e ndërsa ne të kushtojmë atë që Ti na dhurove, bëj të meritojmë të të marrim ty në zemrat tona. Nëpër Krishtin Zotin tonë.

 

Antifona e kungimit Ps 129, 7

 

Te Zoti është mëshira, dhe i madh është tek ai shëlbimi.

 

Ose: Gjn 6, 51-52

 

Unë jam buka e gjallë që zbriti nga qielli, thotë Zoti: kush ha këtë bukë, do të jetojë në amshim.

 

Lutja pas kungimit

 

O Zot, me këto sakramente jemi bashkuar me Krishtin; me përvujtëri po kërkojmë mirësinë tënde, na bëj të ngjashëm me të mbi tokë dhe bashkëtrashëgimtarë në lumturinë e tij në qiell. Ai jeton e mbretëron në shekujt e shekujve.