Leximet e ditës

JAVA E XX GJATË VITIT

 

E ENJTE

 

Antifona e hyrjes Ps 83, 10-11

 

Shiko, o Hyj, mbrojtësi ynë, shikoje fytyrën e të shuguruarit tënd. Vërtet, më e mirë është një ditë në shtëpinë tënde se një mijë të tjera.

 

Kolekta

 

O Hyj, Ti u ke përgatitur të mira të padukshme atyre që të duan: ndikoje në zemrat tona dashurinë tënde, që, duke të dashur ty në gjithçka dhe mbi gjithçka, të fitojmë prej teje trashëgimin e premtuar, që tejkalon çdo dëshirë. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Ez 36, 23-28) (fq. 1188)

 

Unë do t’ju jap një zemër të re, një shpirt të ri do ta fus në ju.

 

Lexim prej Librit të Ezekielit profet

 

Kështu thotë Zoti: ²³ Unë do ta shenjtëroj emrin tim të madhërueshëm, të cilin ju e çnderuat ndër popuj, e ndotët në mesin e tyre, që paganët ta dinë se unë jam Zoti thotë Zoti Hyj, kur të dëftohem i shenjtë ndër ju e para syve të tyre.

²⁴ Do t’ju heq prej paganëve e do t’ju bashkoj nga të gjitha vendet dhe do t’ju sjell në vendin tuaj. ²⁵ Atëherë do të zbraz mbi ju një ujë të pastër dhe do të pastroheni nga të gjitha ndyrësitë tuaja. Do t’ju pastroj nga të gjithë idhujt tuaj! ²⁶ Unë do t’ju jap një zemër të re, një shpirt të ri do ta fus në ju, do ta nxjerr nga mishi juaj zemrën e gurtë e do t’ju jap një zemër mishi.

²⁷ Shpirtin tim do ta fus në ju e do të bëj që të ecni urdhërimeve të mia e t’i zbatoni e t’i shtini në veprim gjyqet e mia. ²⁸ Do të banoni në tokën që ua dhurova etërve tuaj: ju do të jeni populli im e unë do të jem Hyjit juaj.

 

Fjala e Zotit

 

Psalmi 51 (50), 12-13.14-15.18-19 (fq. 714/5)

 

Ref. Do ju stërpik me ujë të pastër thotë Zoti, dhe do ju pastroj.

 

¹² Krijoje në mua, o Hyji, zemrën e pastër,

përtërij në mua një shpirt të qëndrueshëm!

¹³ Mos më flak larg fytyrës sate,

mos e hiq prej meje shpirtin tënd të shenjtë.

 

Ref. Do ju stërpik me ujë të pastër thotë Zoti, dhe do ju pastroj.

 

¹⁴ Ma kthe gëzimin e shpëtimit tënd,

dhe më forco me shpirt të gatshëm.

¹⁵ E unë do t’ua mësoj mëkatarëve udhën e shëlbimit

e fajtorët do të kthehen tek ti.

 

Ref. Do ju stërpik me ujë të pastër thotë Zoti, dhe do ju pastroj.

 

¹⁸ Sepse ti nuk kënaqesh në fli,

e, nëse të kushtoj fli shkrumbimi, s’të pëlqejnë.

¹⁹ Flija e vërtetë për Hyjin: shpirti i penduar;

ti, o Hyj, nuk e përbuz zemrën e penduar, të thërmuar!

 

Ref. Do ju stërpik me ujë të pastër thotë Zoti, dhe do ju pastroj.

 

Aleluja!

Dëgjojeni sot zërin e Atij që flet: mos e bëni zemrën tuaj gur siç bënin etërit tuaj. (krh. Ps 95 (94), 8)

Aleluja!

 

Kur përdoret forma e shkurtër teksti në kllapa nuk lexohet.

 

Ungjilli (Mt 22, 1-14) forma e shkurtër (Mt 22, 1-10) (fq. 1414/5)

 

Këdo që të gjeni, thirreni në dasmë!

 

Leximi i Ungjillit të shenjtë sipas Mateut

 

Në atë kohë, ¹ Jezusi filloi prapë t’u flasë në shëmbëlltyra, (kryepriftërinjve dhe farisenjve.) Thoshte: ² “Mbretëria e qiellit është e ngjashme me Mbretin që bëri dasmë për djalin e vet. ³ Mbreti dërgoi shërbëtorët e vet për të grishur të ftuarit në dasmë. Por ata nuk deshën të vijnë. ⁴ Dërgoi përsëri shërbëtorë të tjerë duke thënë: ‘Thoni të ftuarve: gostinë e kam gati: i preva demat e mi e bagëtitë e majme! Gjithçka është gati! Ejani në dasmë!’ ⁵ Por ata nuk ia vunë veshin e shkuan: kush në arën e vet e kush në tregti të vet. ⁶ Të tjerët, mandej, i zunë shërbëtorët e tij, i munduan e i vranë.

⁷ Për këtë punë Mbreti u zemërua, dërgoi ushtrinë e vet, i vrau ata gjakësorë dhe e dogji qytetin e tyre. ⁸ Atëherë u tha shërbëtorëve të vet: ‘Dasma njëmend është gati, por të ftuarit nuk qenë të denjë. ⁹ Shkoni, pra, në udhëkryqe e, këdo që të gjeni, thirreni në dasmë!’

¹⁰ Shërbëtorët dolën nëpër udhë dhe i sollën të gjithë ata që gjetën: të mirë e të këqij. Kështu salloni i dasmës u mbush me të ftuar. (¹¹ Atëherë hyri edhe Mbreti për t’i parë të ftuarit. Vuri re aty njërin që s’e kishte veshur petkun e dasmës. I tha: ¹² “Mik, si hyre këtu pa pasur petkun e dasmës?” Ai s’e çeli gojën. ¹³ Atëherë Mbreti u tha shërbëtorëve: ‘Lidheni këmbësh e duarsh e qiteni jashtë në terr, ku do të jetë vaj e kërcëllim dhëmbësh!’ ¹⁴Sepse, shumë janë të grishur, por pak janë të zgjedhur.”)

 

Fjala e Zotit

 

Lutja mbi dhurata

 

Pranoji, o Zot, këto dhurata, me të cilat bëhet shndërrim i mrekullueshëm; e ndërsa ne të kushtojmë atë që Ti na dhurove, bëj të meritojmë të të marrim ty në zemrat tona. Nëpër Krishtin Zotin tonë.

 

Antifona e kungimit Ps 129, 7

 

Te Zoti është mëshira, dhe i madh është tek ai shëlbimi.

 

Ose: Gjn 6, 51-52

 

Unë jam buka e gjallë që zbriti nga qielli, thotë Zoti: kush ha këtë bukë, do të jetojë në amshim.

 

Lutja pas kungimit

 

O Zot, me këto sakramente jemi bashkuar me Krishtin; me përvujtëri po kërkojmë mirësinë tënde, na bëj të ngjashëm me të mbi tokë dhe bashkëtrashëgimtarë në lumturinë e tij në qiell. Ai jeton e mbretëron në shekujt e shekujve.