Leximet e ditës

JAVA E XXI GJATË VITIT

E MËRKURË

Antifona e hyrjes Krh. Ps 85, 1-3

Ma vër veshin, o Zot dhe më dëgjo. Shpëtoje, o Hyj, shërbëtorin tënd, që shpreson në ty. Ki mëshirë për mua, o Zot, sepse gjithë ditën të thërras në ndihmë.

Kolekta

O Hyj, Ti i bashkon zemrat e besimtarëve të tu: bëj që populli yt të dojë çka Ti urdhëron e të dëshirojë çka Ti premton, kështu që në të mira e të vështira të jetës tokësore, zemrat tona të jenë të drejtuara atje, ku gjenden gëzimet e vërteta. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

Leximi i parë (2 Sel 3, 6-10.16-18) (fq. 1667)

Kush nuk do të punojë, as mos të hajë.

Lexim prej Letrës së dytë të Shën Palit drejtuar Selanikasve

⁶ Juve, o vëllezër, ju urdhërojmë në Emër të Jezu Krishtit Zot, të rrini larg nga çdo vëlla që jeton në përtaci, jo sipas porosisë që morët prej nesh.

⁷ Sepse ju vetë mirë e dini se e keni për detyrë ta ndiqni shembullin tonë. Ne, kur jetuam ndër ju, nuk jetuam në përtaci: ⁸ bukën askujt nuk ia lypëm dhuratë, por punuam natë e ditë me mund e lodhje që të mos i bëheshim ndokujt prej jush barrë. ⁹ Jo sikur të mos kishim pasur të drejtë në ndihmën tuaj, por vetveten ju dhamë për shembull që të na përngjani. ¹⁰ Këndej, kur ishim ndër ju, ju patëm dhënë këtë urdhër: “Kush nuk do të punojë, as mos të hajë.

¹⁶ Dhe vetë Zoti që jep paqen, gjithmonë dhe në çdo mënyrë jua dhëntë paqen. Zoti qoftë me ju të gjithë!

¹⁷ Përshëndetje me dorën time të Palit. Kështu shënoj çdo letër: unë kështu shkruaj. ¹⁸ Hiri i Zotit tonë Jezu Krishtit qoftë me ju të gjithë!

Fjala e Zotit

Psalmi 128 (127), 1-2.4-5 (fq. 810)

Ref. Lum njeriu që e druan Zotin.

¹Lum njeriu që e druan Zotin,

që ecën udhëve të tija!

² Do të ushqehesh prej punës së duarve të tua,

i lumi ti, mirë do të kalosh!

Ref. Lum njeriu që e druan Zotin.

⁴ Ja, se si bekohet njeriu që e druan Zotin!

⁵ Të bekoftë Zoti prej Sionit

e pafsh lumturinë e Jerusalemit

në të gjitha ditët e jetës sate

Ref. Lum njeriu që e druan Zotin.

Aleluja!

Ai që e mban fjalën e Jezu Krishtit, në të është vërtetisht e përsosur dashuria e Hyjit. (krh. 1 Gjn 2, 5a)

Aleluja!

Ungjilli (Mt 23, 27-32) (fq. 1417)

Ju jeni bijtë e atyre që vranë profetët.

Leximi i Ungjillit të shenjtë sipas Mateut

Në atë kohë Jezusi foli e tha: ²⁷ Vaj për ju, skribë e farisenj, shtiracakë, që u përngjani varrezave të zbardhuara me gëlqere, që duken përjashta të bukura e përbrenda janë plot eshtra të vdekurish me gjithfarë ndyrësie. ²⁸ Kështu edhe ju përjashta njerëzve u dukeni të drejtë, kurse përbrenda jeni krejt hipokrizi e padrejtësi.

²⁹ Vaj për ju, skribë e farisenj, shtiracakë, që u ndërtoni profetëve varrezat e u stolisni të drejtëve monumentet ³⁰ dhe thoni: ‘Të kishim jetuar në kohën e etërve tanë, nuk do të kishim bashkëpunuar me ta në vrasjen e profetëve.’ ³¹ Kështu ju vetë dëshmoni kundër vetvetes se jeni bijtë e atyre që vranë profetët. ³² Mirë, pra, kryeni ç’filluan etërit tuaj!

Fjala e Zotit

Lutja mbi dhurata

O Zot, me anën e flisë së vetme të Krishtit Ti fitove për vete një shumicë bijsh e bijash në shpirt: jepja, po të lutemi, Kishës sate, dhuratën e bashkimit e të paqes. Nëpër Krishtin Zotin tonë.

Antifona e kungimit Krh. Ps 103, 13-15

Toka, o Zot, ngihet me frytet e duarve të tua, për të nxjerrë prej saj bukën dhe verën që gëzon zemrën e njeriut.

Ose: Gjn 6, 54

Kush ha Trupin tim dhe pi Gjakun tim ka jetën e pasosur dhe unë do ta ngjall në ditën e fundit, thotë Zoti.

Lutja pas kungimit

Po të lutemi, o Zot, në mëshirën tënde na i shëro plotësisht zemrat tona, dhe na përtërij e na ruaj në dashurinë tënde, që të mund të të pëlqejmë ty në çdo gjë. Nëpër Krishtin Zotin tonë.