Leximet e ditës

JAVA E XXI GJATË VITIT

 

E ENJTE

 

Antifona e hyrjes Krh. Ps 85, 1-3

 

Ma vër veshin, o Zot dhe më dëgjo. Shpëtoje, o Hyj, shërbëtorin tënd, që shpreson në ty. Ki mëshirë për mua, o Zot, sepse gjithë ditën të thërras në ndihmë.

 

Kolekta

 

O Hyj, Ti i bashkon zemrat e besimtarëve të tu: bëj që populli yt të dojë çka Ti urdhëron e të dëshirojë çka Ti premton, kështu që në të mira e të vështira të jetës tokësore, zemrat tona të jenë të drejtuara atje, ku gjenden gëzimet e vërteta. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (1 Kor 1, 1-9) (fq. 1608)

 

Në Krishtin Jezus u bëmë të pasur me çdo dhuratë.

 

Lexim prej Letrës së parë të Shën Palit apostull drejtuar Korintianëve

 

¹ Pali, për vullnet të Hyjit, i grishur të jetë apostull i Krishtit Jezus, edhe vëlla Sosteni, ² Kishës së Hyjit që është në Korint, të shenjtëruarve në Krishtin Jezus, të grishurve të jenë shenjtër, bashkë me të gjithë ata, që në cilindo vend e thërrasin Emrin e Zotit tonë, Jezu Krishtit, Zotit të tyre dhe Zotit tonë. ³ Paçi hir e paqe prej Hyjit, Atit tonë, dhe prej Zotit Jezu Krisht!

⁴ Përherë i falem nderit Hyjit tim për ju që ju dha hirin hyjnor me anë të Krishtit Jezus, ⁵ sepse në Krishtin ju u bëtë të pasur me gjithçka në çdo fjalë e në çdo dije. ⁶ Kështu, aq u përforcua në ju dëshmia e Krishtit, ⁷sa që nuk ju mungon asnjë dhuratë juve që pritni Zbulimin e Zotit tonë Jezu Krishtit.

⁸ Por edhe Ai do t’ju forcojë deri në fund që të jeni pa mungesa në Ditën e Zotit tonë Jezu Krishtit. ⁹ Besnik është Hyji që ju thirri në shoqërinë e Birit të vet, Jezu Krishtit, Zotit tonë.

 

Fjala e Zotit

 

Psalmi 145 (144), 2-3.4-5.6-7 (fq. 825)

 

Ref. Çdo ditë do të të bekoj Emrin tënd, o Zot.

 

² Çdo ditë do të të bekoj

dhe do ta lavdëroj Emrin tënd.

³ Zoti është i madh e i lavdërueshëm,

e pashqyrtueshme është madhëria e tij!

 

Ref. Ti, o Zot, je i madh, ty të qoftë lavdia në amshim.

 

⁴ Breznia breznisë do t’ia tregojë veprat e tua

dhe do ta shpallin pushtetin tënd.

⁵ Do ta shpallin madhërinë e shenjtërisë sate,

do t’i tregojnë mrekullitë e tua.

 

Ref. Ti, o Zot, je i madh, ty të qoftë lavdia në amshim.

 

⁶ Do ta tregojnë fuqinë e veprave të tua të tmerrshme,

do t’i kumtojnë veprat e madhërishme të tuat.

⁷ Do ta përhapin kujtimin e hirësisë sate të madhe,

do t’i brohorisin drejtësisë sate.

 

Ref. Ti, o Zot, je i madh, ty të qoftë lavdia në amshim.

 

Aleluja!

“Rrini zgjuar, rrini gati, sepse Biri i njeriut do të vijë në atë orë kur ju s’e pritni. (Mt 24, 42a.44)

Aleluja!

 

Ungjilli (Mt 24, 42-51) (fq. 1419)

 

Rrini gati.

 

Leximi i Ungjillit të shenjtë sipas Mateut

 

Në atë kohë Jezusi u tha nxënësve të vet: ⁴² prandaj: “rrini zgjuar, sepse nuk dini se në ç’ditë do të vijë Zotëria juaj! ⁴³ E mos harroni: po ta dinte i zoti i shtëpisë se në ç’orë të natës i vjen vjedhësi, do të rrinte zgjuar e nuk do të lejonte t’i thyhej shtëpia. ⁴⁴ Prandaj: rrini gati, sepse Biri i njeriut do të vijë në atë orë kur ju s’e pritni.”

⁴⁵ Vallë, cili është ai shërbëtor besnik e i mençur, që zotëria e vuri përmbi shërbëtorët e vet për t’iu dhënë ushqimin në kohën e duhur? ⁴⁶ I lumi ai shërbëtor, që, kur të vijë zotëria, e gjen duke vepruar kështu! ⁴⁷ Më të vërtetë po ju them: do t’ia besojë mbarë pasurinë e vet!

⁴⁸ Por në qoftë se shërbëtori i keq thotë në zemrën e vet: ‘zotëria im vonon të vijë’ ⁴⁹ e fillon t’i rrahë shokët e vet e të hajë e të pijë me pijaneca; ⁵⁰ zotëria i këtij shërbëtori do të vijë shi atë ditë, kur ky s’e pret, shi në atë orë, kur ky s’e di; ⁵¹ do ta ndëshkojë rëndë dhe do t’ia caktojë vendin me shtiracakët, ku do të jetë vaj dhe kërcëllim dhëmbësh.”

 

Fjala e Zotit

 

Lutja mbi dhurata

 

O Zot, me anën e flisë së vetme të Krishtit Ti fitove për vete një shumicë bijsh e bijash në shpirt: jepja, po të lutemi, Kishës sate, dhuratën e bashkimit e të paqes. Nëpër Krishtin Zotin tonë.

 

Antifona e kungimit Krh. Ps 103, 13-15

 

Toka, o Zot, ngihet me frytet e duarve të tua, për të nxjerrë prej saj bukën dhe verën që gëzon zemrën e njeriut.

 

Ose: Gjn 6, 54

 

Kush ha Trupin tim dhe pi Gjakun tim ka jetën e pasosur dhe unë do ta ngjall në ditën e fundit, thotë Zoti.

 

Lutja pas kungimit

 

Po të lutemi, o Zot, në mëshirën tënde na i shëro plotësisht zemrat tona, dhe na përtërij e na ruaj në dashurinë tënde, që të mund të të pëlqejmë ty në çdo gjë. Nëpër Krishtin Zotin tonë.