Leximet e ditës

29 gusht

 

Martirizimi i Shën Gjon Pagëzuesit

 

Përkujtim

 

Antifona e hyrjes Krh. Ps 118, 46-47

 

Para mbretërve, o Zot, do të flas për dëshmitë e tua, e nuk do të më vijë turp, do të kënaqem në urdhërimet e tua, që aq shumë i kam për zemër.

 

Kolekta

 

O Hyj, Ti deshe që shën Gjon Pagëzuesi të jetë Pararendësi i Birit tënd në lindje e në vdekje; bëj që, sikurse ai e dha jetën e vet për drejtësinë e të vërtetën, edhe ne të dimë t’ia kushtojmë vetveten me guxim dëshmimit të mësimit tënd. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Jer 1, 17-19) (fq. 1053)

 

Thuaju të gjitha që unë po të urdhëroj.

 

Lexim prej Librit të Jeremisë profet

 

Në ato ditë mu drejtua fjala e Zotit, ¹⁷ ngjeshi ijët e tua! Në këmbë, pra! Thuaju të gjitha që unë po të urdhëroj. Aspak mos u tremb para tyre, përndryshe do të të bëj që të dridhesh para tyre! ¹⁸

Ja, unë sot ty po të bëj qytet të fortifikuar, shtyllë hekuri, mur tumbaku përballë të gjithë vendit, përballë mbretërve të Judës e princave të tij, priftërinjve të tij e popullit të vendit.

¹⁹ Ata do të luftojnë kundër teje, por s’do të ngadhënjejnë mbi ty, sepse unë jam me ty, që të të shpëtoj, thotë Zoti.”

 

Fjala e Zotit

 

Psalmi 71 (70), 1-2.3-4a.5-6ab.15ab.17 (fq. 736)

 

Ref. Goja ime, o Zot, do të shpallë shëlbimin tënd.

 

¹ Në ndore tënde, o Zot,

askurrë mos u turpërofsha.

² Më shpëto e më dil zot, pashë drejtësinë tënde,

prire mbi mua veshin tënd e më shëlbo!

 

Ref. Goja ime, o Zot, do të shpallë shëlbimin tënd.

 

³ Ji për mua shkëmb mbrojtjeje,

kullë e pamposhtur për të më shpëtuar,

sepse ti je kështjella ime e strehimi im.

⁴ Hyji im, më shpëto prej dorës së mëkatarit.

 

Ref. Goja ime, o Zot, do të shpallë shëlbimin tënd.

 

⁵ Sepse ti, o Zot, je shpresa ime,

uzdaja ime, o Zot, qysh prej rinisë sime.

⁶ Në ty jam mbështetur qysh prej kraharorit të nënës,

qysh prej prehrit të nënës ti je mbrojtësi im,

 

Ref. Goja ime, o Zot, do të shpallë shëlbimin tënd.

 

¹⁵ Goja ime do ta shpallë drejtësinë tënde,

gjithë ditën shpëtimin tënd.

¹⁷ Ti më ke mësuar, o Hyj, qysh prej rinisë sime

dhe ende sot i kumtoj mrekullitë e tua.

 

Ref. Goja ime, o Zot, do të shpallë shëlbimin tënd.

 

Aleluja!

Lum ata që salvohet për shkak të dashurisë për të vërtetën, sepse e tyre është Mbretëria qiellore. (krh. Mt 5, 10)

Aleluja!

 

Ungjilli (Mk 6, 17-29) (fq. 1437)

 

Dua të ma japësh tani në pjatë kryet e Gjon Pagëzuesit

 

Leximi i Ungjillit të shenjtë sipas Markut

 

Në atë kohë, ¹⁷ vetë Herodi kishte dhënë urdhër të kapej Gjoni, të ngujohej në pranga e të burgosej. Shkaku ishte Herodiada, gruaja e Filipit, të vëllait të tij, të cilën e kishte marrë për grua. ¹⁸ E pasi Gjoni i kishte thënë Herodit: “S’guxon ta mbash gruan e vëllait tënd!”, ¹⁹ Herodiada e urrente dhe donte ta vriste, por nuk mundte, ²⁰ sepse Herodi e druante Gjonin. E dinte mirë se është njeri i drejtë e i shenjtë e prandaj edhe e mbronte. Kur e dëgjonte, trazohej fort në shpirt, por prapëseprapë e dëgjonte me ëndje.

²¹ Por erdhi dita e volitshme, kur Herodi, me rastin e ditëlindjes së vet, u përgatiti një gosti bujarëve të vet, oficerëve të lartë dhe krerëve të Galilesë. ²² Hyri vajza e Herodiadës e kërceu. I pëlqeu shumë Herodit dhe të grishurve. Atëherë mbreti i tha vajzës. “Lyp prej meje çka të duash dhe unë do ta jap.” ²³ Dhe iu përbetua: “Do të jap gjithçka të më lypësh, qoftë edhe gjysmën e mbretërisë sime!” ²⁴ Ajo doli dhe i tha s’ëmës: “Çka të kërkoj? “Kryet e Gjon Pagëzuesit!” ‑ i tha ajo. ²⁵ Vajza u kthye vrik te mbreti e i tha: “Dua të ma japësh tani në pjatë kryet e Gjon Pagëzuesit.  ²⁶ Mbreti u trishtua, por për shkak të premtimit dhënë me përbetim e për shkak të të grishurve, nuk deshi t’ia mohojë kërkesën.

²⁷ Mbreti menjëherë dërgoi një vrasës dhe urdhëroi t’ia sjellë kryet e Gjonit. Ky shkoi, ia shkurtoi kryet në burg, ²⁸ e solli në pjatë, ia dha vajzës, kjo ia dha s’ëmës.

²⁹ Kur dëgjuan nxënësit e Gjonit, erdhën, morën trupin e tij dhe e shtinë në dhe.

 

Fjala e Zotit

 

Lutja mbi dhurata

 

Bëj, po të lutemi, o Zot, që në saje të këtyre dhuratave që po t’i kushtojmë, të ecim udhës së vërtetë që shën Gjoni e predikoi në shkretëtirë dhe e përforcoi me derdhjen e gjakut. Nëpër Krishtin Zotin tonë.

 

Prefacioni: Misioni i Pararendësit.

 

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

 

Përnjëmend është punë e denjë dhe e drejtë,

është detyra jonë dhe burim shpëtimi

të të falënderojmë gjithmonë e gjithkund ty,

o Zot, Atë i shenjtë, Hyj i gjithëpushtetshëm dhe i amshuar,

nëpër Krishtin, Zotin tonë.

Ne lavdërojmë madhërinë tënde

për më të madhin ndër ata që u lindën prej grash,

shën Gjonin Pagëzues, Pararendës.

Edhe para se të lindte, ai kërceu prej gëzimit

se po vinte shpëtimi i njerëzve

dhe në lindjen e vet solli gëzime të mëdha.

Ishte i vetmi ndër profetët që e tregoi Qengjin e shëlbimit.

Në ujërat që do të shenjtëroheshin

ai e pagëzoi themeluesin e Pagëzimit;

dhe me derdhjen e gjakut të vet i dha Krishtit më të lartën dëshmi.

Dhe prandaj, bashkë me fuqitë qiellore,

po të shpallim vazhdimisht mbi tokë

duke i brohoritur madhërisë sate pa pushim:

 

Shenjt, Shenjt, Shenjt.

 

Antifona e kungimit Gjn 3, 27.30

 

Gjoni u përgjigj: Ai duhet të rritet, e unë të zvogëlohem.

 

Lutja pas kungimit

 

Bëj, o Zot, që ne, të cilët kremtojmë ditëlindjen për qiell të shën Gjon Pagëzuesit ta nderojmë misterin që kjo gosti shënon dhe ta sprovojmë më fort veprimtarinë e saj në ne. Nëpër Krishtin Zotin tonë.