Leximet e ditës

JAVA E XXIII GJATË VITIT

E HËNË

Antifona e hyrjes Ps 118, 137.124

I drejtë je, o Zot, dhe gjykimet e tua janë të drejta: bëj me shërbëtorin tënd sipas mirësisë sate.

Kolekta

O Atë, që na dhurove Shëlbuesin dhe Shpirtin Shenjt, shikoj me mirësi bijtë e adoptimit, që të gjithë ata që besojnë në Krishtin ta marrin lirinë e vërtetë dhe trashëgimin e amshuar. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

Leximi i parë (1 Kor 5, 1-8) (1612)

Pastrohuni prej tharmit të vjetër. Krishti ‑ Qengji ynë i Pashkëve ‑ është flijuar.

Lexim prej Letrës së parë të Shën Palit apostull drejtuar Korintianëve

Vëllezër, ¹gjithkund po dëgjohet se ndër ju ka fëlligështi, madje një fëlligështi të tillë, që nuk gjendet as ndër paganë: njëri prej jush jeton si me gruan me gruan e babait të vet. ² E ju më keni çuar krye! Pse më mirë nuk jeni veshur në zi? Le të çrrënjoset prej mesit tuaj ai që e bëri këtë poshtërsi!

³ Unë, larg me trup, por afër me shpirt, e kam dënuar, si të isha pranë, atë që e bëri një vepër të tillë. ⁴ Në Emër të Zotit (tonë) Jezus, pasi të bashkoheni ju dhe shpirti im me ju, me pushtetin e Zotit tonë Jezus, ⁵i tilli le t’i lëshohet djallit në duar për prishjen e trupit që t’i shpëtojë shpirti në Ditën e Zotit.

⁶ Nuk ju vlen gjë krenaria! Po a nuk e dini se pak tharm e brumos mbarë brumin? ⁷Pastrohuni prej tharmit të vjetër që të bëheni brumë i ri, sikurse edhe jeni të pabrumë, sepse Krishti ‑ Qengji ynë i Pashkëve ‑ tanimë është flijuar. ⁸ Andaj, le të kremtojmë, jo me tharmin e vjetër, as me tharmin e zemrës së keqe e të ligësisë, por me bukë të pabrume të pastërtisë e të vërtetës.

Fjala e Zotit

Psalmi 5, 5-6.7.12 (fq. 662)

Ref. Me drejto, o Zot, në drejtësinë tënde.

⁵ Ti nuk je Hyj të cilit i pëlqen padrejtësia,

pranë teje nuk ka vend bakeqi,

⁶ bakëqijtë nuk mund të qëndrojnë përpara syve të tu.

Ref. Me drejto, o Zot, në drejtësinë tënde.

⁷ Ti i urren të gjithë ata që bëjnë keq,

i zhbin të gjithë ata që flasin gënjeshtra;

Të neverit gjakësori e tradhtari.

Ref. Me drejto, o Zot, në drejtësinë tënde.

¹² Le të gëzohen ata që mbështeten në ty,

le të galdojnë përherë e në amshim!

Mbroji dhe le të gëzohen në ty

të gjithë ata që e duan Emrin tënd!

Ref. Me drejto, o Zot, në drejtësinë tënde.

Aleluja!

Dhentë e mia e dëgjojnë zërin tim - thotë Zoti - Unë i njoh dhe ato vijnë pas meje. (Gjn 10, 27)

Aleluja!

Ungjilli (Lk 6, 6-11) (fq. 1468)

Nuk ia ndanin sytë duke shikuar a mos po shëron të shtunën.

Leximi i Ungjillit të shenjtë sipas Lukës

⁶ Një të shtunë tjetër Jezusi hyri në sinagogë e filloi të mësojë. Ishte aty një njeri që kishte dorën e djathtë të thatë. ⁷ Skribët e farisenjtë nuk ia ndanin sytë a mos po shëron të shtunën, që, kështu, të kinin për çka ta paditnin.

⁸ Jezusi ua dinte mendimet e i tha njeriut që e kishte dorën e thatë: “Çohu e dil në midis!” Ai u ngrit e qëndroi në këmbë. ⁹ Atëherë Jezusi vazhdoi: “Ju po ju pyes: a është e lejueshme të shtunën të bësh mirë apo të bësh keq, t’ia shpëtosh jetën ndokujt apo t’ia humbasësh?” ¹⁰ Si i shikoi rreth e rrotull të gjithë, i tha atij: “Shtrije dorën! Ai bëri ashtu e dora iu shërua.

¹¹ Ata u tërbuan dhe kuvendonin ndër vete çka të ndërmarrin kundër Jezusit.

Fjala e Zotit

Lutja mbi dhurata

O Hyj, burimi i përkushtisë së vërtetë dhe i paqes, bëj që me kushtimin e kësaj dhurate të të adhurojmë si lypet, e pjesëmarrja në këtë sakrament të na bashkojë besnikërisht në ndjenja vëllazërore. Nëpër Krishtin Zotin tonë.

Antifona e kungimit Krh. Ps 41, 2-3

Sikurse dreri i dëshiron burimet e ujërave të gjalla, po ashtu shpirti im të dëshiron ty, o Hyj; shpirti im ka etje për Hyjin, për Hyjin e gjallë.

Ose: Gjn 8, 12

Unë jam drita e botës, thotë Zoti; kush vjen pas meje nuk ecën në errësirë, por do ta ketë dritën e jetës.

Lutja pas kungimit

O Zot, Ti i ushqen dhe i mban në jetë besimtarët e tu me shujtën e fjalës sate dhe me sakramentin qiellor, bëj që me dhuratat e Birit tënd, të bëhen trashëgimtarë të përhershëm të jetës së tij. Ai jeton e mbretëron në shekujt e shekujve.

JAVA E XXIII GJATË VITIT

E MARTË

Antifona e hyrjes Ps 118, 137.124

I drejtë je, o Zot, dhe gjykimet e tua janë të drejta: bëj me shërbëtorin tënd sipas mirësisë sate.

Kolekta

Leximi i parë (Kol 2, 6-15) (fq. 1662)

Të varrosur bashkë me Të, bashkë me Të edhe u ngjallët në saje të fesë.

Lexim prej Letrës së Shën Palit apostull drejtuar Kolosianëve

Vëllezër, ⁶ sikurse e pranuat Jezu Krishtin Zot, ashtu edhe vazhdoni të jetoni në Të: ⁷ të rrënjosur, vazhdimisht të mbimuruar në të dhe të fortë në fe sikurse qetë mësuar, gjithherë përplot me falënderim. ⁸ Ruajuni të mos ju gënjejë kush me anë të “filozofisë” ‑ me stërhollime të kota, që bazohen në thashethemet njerëzore, në “elementet e botës” e jo në Krishtin.

⁹ Pasi në Krishtin banon trupërisht e tërë plotësia hyjnore, kështu edhe ju jeni ¹⁰ të mbushur me anë të Tij. Ai është Kryet e çdo Principate e Pushteti. ¹¹ Në të jeni edhe të rrethprerë, por me një rrethprerje që s’është bërë me dorë njeriu ‑ u zhveshët nga trupi i mëkatit ‑ me anë të rrethprerjes së Krishtit. ¹² Të varrosur bashkë me Të në pagëzim, bashkë me Të edhe u ngjallët në saje të fesë, me të cilën besuat në fuqinë e Hyjit që e ngjalli nga të vdekurit.

¹³ Edhe juve që ishit të vdekur për shkak të fajeve tuaja dhe të parrethprerjes së trupit tuaj, Hyji ju ngjalli bashkë me Të. Ai mirësisht na i fali të gjitha fajet tona, ¹⁴ Ai e zhvleftësoi dëftesën paditëse që, në saje të urdhërimeve, ishte kundër nesh, e bëri të zhduket, e mbërtheu në kryq. ¹⁵ I çarmatosi Principatat dhe Pushtetet ‑ e dëftoi këtë botërisht ‑ dhe i hoq zvarrë në kalimin ngadhënjyes të Kryqit!

Fjala e Zotit

Psalmi 145 (144), 1b-2.8-9.10-11 (fq. 825)

Ref. Zoti është vetë butësia e mëshira.

¹ Do të të lartësoj, o Mbret, Hyji im,

dhe do ta bekoj Emrin tënd

përgjithmonë e jetës.

² Çdo ditë do të të bekoj

dhe do ta lavdëroj Emrin tënd

përgjithmonë e jetës.

Ref. Zoti është vetë butësia e mëshira.

⁸ Zoti është vetë butësia e mëshira,

i ngadalshëm në zemërim dhe plot dashuri.

⁹ Zoti është i mirë për të gjithë,

i dhimbshëm për të gjitha krijesat e veta.

Ref. Zoti është vetë butësia e mëshira.

¹⁰ Le të lavdërojnë, o Zot, të gjitha veprat e tua

e le të bekojnë shenjtërit e tu.

¹¹ Le ta tregojnë lavdinë e Mbretërisë sate,

le të kuvendin për pushtetin tënd

Ref. Zoti është vetë butësia e mëshira.

Leximi i parë (1 Kor 6, 1-11) (fq. 1613)

Vëllai me vëlla paditet, madje para të pafeve.

Lexim prej Letrës së parë të Shën Palit apostull drejtuar Korintianëve

Vëllezër, ¹ a do të guxojë ndokush prej jush, nëse ka ndonjë padi kundër ndonjë tjetri, të kërkojë të drejtën në gjyq para paganëve e jo para shenjtërve? ² Po a nuk e dini se shenjtërit do ta gjykojnë botën? E, nëse ju do ta gjykoni botën, po a thua s’jeni të zotët t’i gjykoni sendet më të vogla? ³ Po a nuk e dini se do t’i gjykojmë edhe engjëjt e jo më gjërat e përditshme?

⁴ E ju, kur keni ndonjë pleqësi për gjërat e përditshme, shkoni e më vini pleq disa që Kisha i mban për asgjë? ⁵ Le t’ju vijë turp që më detyroni t’jua them këtë gjë! Kështu a? A thua nuk gjendet ndër ju asnjë i dijshëm, i cili do të mund të pleqëronte mes vëllezërve të vet? ⁶ Por vëllai me vëlla paditet, madje para të pafeve?!

⁷ Po edhe vetë puna që paditeni njëri me tjetrin është e metë për ju. Pse më mirë nuk e duroni padrejtësinë? Pse më mirë nuk duroni të plaçkiteni? ⁸ Por, përkundrazi, ju vetë bëni padrejtësi dhe plaçkitni, e kë se? Vëllezërit! ⁹ A thua nuk e dini se ata që bëjnë padrejtësi nuk do të kenë pjesë në Mbretërinë e Hyjit?

Mos u tradhtoni! As fëlligështarët, as idhujtarët, as kurorëthyesit, as homoseksualët e çdo lloji, ¹⁰ as vjedhësit, as pijanecët, as shpërralluesit, as cubat nuk do të kenë pjesë në Mbretërinë e Hyjit.

¹¹ Pra, të tillë ishit disa, por u latë, por u shenjtëruat, por e fituat shfajësimin në saje të Emrit të Jezu Krishtit Zot dhe të Shpirtit të Hyjit tonë.

Fjala e Zotit

Psalmi 149 (148), 1b-2.3-4.5-6a.9b (fq. 829)

Ref. Zoti e do popullin e vet!

¹ Këndoni Zotit një këngë të re,

këndoni lavdi në mbledhjen e shenjtërve!

² Le t’i gëzohet Izraeli Krijuesit të vet,

bijtë e Sionit t’i brohorisin Mbretit të vet!

Ref. Zoti e do popullin e vet!

³ Le ta lavdërojnë Emrin e tij në valle,

le t’i bien në nder të tij tupanit e citarës,

⁴ sepse Zoti kënaqet në popullin e vet,

të përvujtët i nderon me shëlbim.

Ref. Zoti e do popullin e vet!

⁵ Le të galdojnë të drejtët në lumturi,

le të brohorisin nga shtrojat e veta!

⁶ E paçin lavdinë e Zotit në gojë,

⁹ ‑ ky është nder për të gjithë besnikët e tij.

Ref. Zoti e do popullin e vet!

Aleluja!

Ju nuk më zgjodhët mua, por unë ju zgjodha ju, thotë Zoti; Ati im do t'ju japë çkado që të kërkoni në emër tim. (krh. Gjn 15, 16b)

Aleluja!

Ungjilli (Lk 6, 12-19) (fq. 1468)

E kaloi natën duke u lutur, pastaj i zgjodhi dymbëdhjetë nxënës të cilët i quajti apostuj!

Leximi i Ungjillit të shenjtë sipas Lukës

¹² Ndër ato ditë Jezusi shkoi në një mal për t’u lutur. Natën e kaloi duke iu lutur Hyjit.¹³ Kur zbardhi drita, i thirri nxënësit e vet e prej tyre i zgjodhi dymbëdhjetë, të cilët edhe i quajti apostuj: ¹⁴ Simonin, të cilin e quajti edhe Pjetër, Andreun, vëllanë e tij, Jakobin e Gjonin, Filipin e Bartolomeun, ¹⁵ Mateun, e Tomën, Jakobin e Alfeut, Simonin që quhej Zelltar, ¹⁶ Judën e Jakobit edhe Judën Iskariot, i cili u bë tradhtar.

¹⁷ Pastaj zbriti bashkë me ta e zuri vend në rrafshinë. Ishte aty një shumicë e madhe nxënësish të tij dhe një turmë e madhe e popullit prej mbarë Judesë, prej Jerusalemit dhe prej bregut të detit të Tirit e të Sidonit, ¹⁸ që kishin ardhur për ta dëgjuar e për t’u shëruar prej sëmundjeve të veta. Shëroheshin edhe ata që i mundonin shpirtrat e ndytë. ¹⁹ Të gjithë këta njerëz kërkonin ta preknin, sepse prej tij dilte një fuqi që shëronte gjithkënd.

Fjala e Zotit

Lutja mbi dhurata

Antifona e kungimit Krh. Ps 41, 2-3

Sikurse dreri i dëshiron burimet e ujërave të gjalla, po ashtu shpirti im të dëshiron ty, o Hyj; shpirti im ka etje për Hyjin, për Hyjin e gjallë.

Ose: Gjn 8, 12

Unë jam drita e botës, thotë Zoti; kush vjen pas meje nuk ecën në errësirë, por do ta ketë dritën e jetës.

Lutja pas kungimit