Leximet e ditës

JAVA E XXIII GJATË VITIT

 

E SHTUNË

 

Antifona e hyrjes Ps 118, 137.124

 

I drejtë je, o Zot, dhe gjykimet e tua janë të drejta: bëj me shërbëtorin tënd sipas mirësisë sate.

 

Kolekta

 

O Atë, që na dhurove Shëlbuesin dhe Shpirtin Shenjt, shikoj me mirësi bijtë e adoptimit, që të gjithë ata që besojnë në Krishtin ta marrin lirinë e vërtetë dhe trashëgimin e amshuar. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

I

 

Leximi i parë (1 Tim 1, 15-17) (fq. 1674)

 

Jezusi erdhi në botë për të shëlbuar mëkatarët.

 

Lexim prej Letrës së parë të Shën Palit apostull drejtuar Timoteut

 

Fort i dashur, ¹⁵ kjo fjalë është e vërtetë dhe meriton të besohet prej të gjithëve: Krishti Jezus erdhi në botë për të shëlbuar mëkatarët, ndër të cilët unë jam i pari. ¹⁶ Ai pati mëshirë për mua me qëllim që në mua, më të parin, Jezu Krishti ta dëftojë tërë zemërgjerësinë e vet për t’u dhënë shembull të gjithë atyre që do të besojnë në Të për të fituar jetën e pasosur.

¹⁷ Dhe Mbretit të shekujve, të Pavdekshmit, të Papashmit, Një të Vetmit Hyj i qoftë nder e lavdi në shekuj të shekujve. Amen!

 

Fjala e Zotit

 

Psalmi 113 (112), 1b-2.3-4.5.6-7 (fq. 791)

 

Ref. Qoftë bekuar emri i Zotit, tani e përgjithmonë.

 

¹ Lavdërojeni, shërbëtorët e Zotit,

lavdërojeni, Emrin e Zotit!

² Qoftë bekuar Emri i Zotit

Qysh tash e deri në amshim.

 

Ref. Qoftë bekuar emri i Zotit, tani e përgjithmonë.

 

³ Që kur lind dielli e derisa perëndon

qoftë bekuar Emri i Zotit!

⁴ I madhërueshëm është Zoti mbi të gjithë popujt,

lavdia e tij i tejkalon qiejt.

 

Ref. Qoftë bekuar emri i Zotit, tani e përgjithmonë.

 

⁵ Kush është si Zoti, Hyji ynë,

që fronin e ka në Lartësi,

⁶ e nga lart vrojton qiellin e tokën?

⁷ Nga pluhuri e ngre skamnorin,

nga llomi e lartëson të vobektin

 

Ref. Qoftë bekuar emri i Zotit, tani e përgjithmonë.

 

II

 

Leximi i parë (1 Kor 10, 14-22) (fq. 1617/8)

 

Të gjithë ne që jemi pjesëtar të një buke jemi një trup i vetëm.

 

Lexim prej Letrës së parë të Shën Palit apostull drejtuar Korintianëve

 

¹⁴ Të dashurit e mi, ikni nga idhujtaria! ¹⁵ Flas me ju si me njerëz të arsyeshëm: gjykoni vetë çka po them: ¹⁶ Gota e bekimit, të cilën ne e ndajmë, a nuk është bashkim me Gjakun e Krishtit? Po edhe buka të cilën ne e ndajmë, a nuk është bashkim me Trupin e Krishtit? ¹⁷ Pasi është një bukë e vetme, ne, edhe pse shumë, jemi një trup i vetëm: pse të gjithë jemi pjesëtarë të një buke. ¹⁸ Shikoni Izraelin thjesht si popull: ata që hanë nga flitë a thua nuk janë pjesëmarrës të lterit?

 ¹⁹ Çka, pra, dua të them: se flija kushtuar idhullit është diçka? Ose idhulli është diçka?

²⁰ Mu të kundërtën! Porse [paganët] u flijojnë djajve e jo Hyjit; e unë nuk dua të bëheni pjesëtarë të djajve.

²¹ Nuk dua ta pini gotën e Zotit dhe gotën e djajve. Nuk mund të jeni pjesëtarë të tryezës së Hyjit dhe të tryezës së djajve. ²² A mos mendojmë ta nxisim xhelozinë e Zotit? A mos jemi më të zotët se Ai?

 

Fjala e Zotit

 

Psalmi 116 (115), 12-13.17-18 (fq. 793)

 

Ref. Ty o Zot, do të ta kushtoj flinë e falënderimit.

 

¹² Si do t’ia shpërblej Zotit

për të gjitha të mirat që m’i ka dhënë?

¹³ Do të ngre gotën e shëlbimit

e me nderim do të thërras Emrin e Zotit.

 

Ref. Ty o Zot, do të ta kushtoj flinë e falënderimit.

 

¹⁷ Ty do të ta kushtoj flinë e lavdit,

me nderim do të thërras Emrin e Zotit.

¹⁸ Do t’i kryej kushtet e mia bërë Zotit

në praninë e mbarë popullit të tij

 

Ref. Ty o Zot, do të ta kushtoj flinë e falënderimit.

 

Aleluja!

Nëse ndokush më do, ai do ta mbajë fjalën, thotë Zoti, Ati im do ta duajë dhe tek ai do të vijmë. (Gjn 14, 23)

Aleluja!

 

Ungjilli (Lk 6, 43-49) (fq. 1469/70)

 

Pse më thirrni: 'Zotëri, Zotëri', e nuk bëni si ju urdhëroj?

 

Leximi i Ungjillit të shenjtë sipas Lukës

 

Në atë kohë, Jezusi u tha nxënësve të vet: "⁴³ Nuk ka pemë të mirë që jep fryt të keq, as pemë të keqe që jep fryt të mirë. ⁴⁴ Çdo pemë njihet prej frytit të saj. Nuk mblidhen fiq nga murrizi as nuk vilet rrush nga ferra.

⁴⁵ Njeriu i mirë nxjerr të mirën nga visari i mirë i zemrës së vet, njeriu i keq nxjerr të keqen nga visari i keq: sepse goja i qet çka i ka zemra.”

⁴⁶ “Pse më thirrni: ‘Zotëri, Zotëri!’ e nuk bëni si ju urdhëroj? ⁴⁷ Do t’ju tregoj se kujt i përngjan çdonjëri që vjen tek unë, që e dëgjon fjalën time e që e shtjen në veprim: ⁴⁸ ai i përngjan njeriut, i cili, kur ndërtoi shtëpinë e vet, mihu dheun thellë dhe themelin e vuri mbi shkëmb. Ra vërshimi, lumi u vërsul mbi atë shtëpi, por nuk mundi ta tundë, sepse ishte e ndërtuar mirë.

⁴⁹ Kurse ai që e dëgjon, por nuk e shtjen në veprim fjalën time, i përngjan njeriut, që e ndërtoi shtëpinë përmbi dhe ‑ pa themel: u vërsul lumi e menjëherë e rrëzoi: ajo shtëpi u bë gërmadhë e madhe.”

 

Fjala e Zotit

 

Lutja mbi dhurata

 

O Hyj, burimi i përkushtisë së vërtetë dhe i paqes, bëj që me kushtimin e kësaj dhurate të të adhurojmë si lypet, e pjesëmarrja në këtë sakrament të na bashkojë besnikërisht në ndjenja vëllazërore. Nëpër Krishtin Zotin tonë.

 

Antifona e kungimit Krh. Ps 41, 2-3

 

Sikurse dreri i dëshiron burimet e ujërave të gjalla, po ashtu shpirti im të dëshiron ty, o Hyj; shpirti im ka etje për Hyjin, për Hyjin e gjallë.

 

Ose: Gjn 8, 12

 

Unë jam drita e botës, thotë Zoti; kush vjen pas meje nuk ecën në errësirë, por do ta ketë dritën e jetës.

 

Lutja pas kungimit

 

O Zot, Ti i ushqen dhe i mban në jetë besimtarët e tu me shujtën e fjalës sate dhe me sakramentin qiellor, bëj që me dhuratat e Birit tënd, të bëhen trashëgimtarë të përhershëm të jetës së tij. Ai jeton e mbretëron në shekujt e shekujve.