Leximet e ditës

JAVA E XXIV GJATË VITIT

 

E PREMTE

 

Antifona e hyrjes Krh. Sir 36, 18

 

Jepu paqen, o Zot, atyre që shpresojnë në ty, që profetët e tu të tregohen të vërtetë. Dëgjo lutjet e shërbëtorit tënd dhe të popullit tënd Izraelit.

 

Kolekta

 

O Hyj, krijuesi dhe drejtuesi i gjithësisë, priri sytë e tu mbi ne dhe bëj të të shërbejmë me gjithë zemër, që ta sprovojmë fuqinë e mëshirës sate. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (1 Kor 15, 12-20) (fq. 1623)

 

Në qoftë se Krishti nuk është ngjallur, atëherë i kotë është predikimi ynë.

 

Lexim prej Letrës së parë të Shën Palit apostull drejtuar Korintianëve

 

Vëllezër, ¹² në qoftë se predikohet se Krishti është ngjallur prej të vdekurish: si atëherë disa prej jush thonë: “Nuk ka ngjallje prej të vdekurve.”? ¹³ Po qe se të vdekurit nuk do të ngjallen atëherë as Krishti nuk është ngjallur. ¹⁴ Por, në qoftë se Krishti me të vërtetë nuk është ngjallur, [atëherë] i kotë është predikimi ynë i kotë besimi juaj.

¹⁵ Atëherë edhe ne do të ishim dëshmitarë të rrejshëm kundër Hyjit, sepse kemi dëshmuar kundër Hyjit duke pohuar se Hyji e ngjalli Krishtin, të cilin nuk e ka ngjallur, në qoftë se të vdekurit nuk ngjallen. ¹⁶ Sepse, në mos u ngjallshin të vdekurit, as Krishti nuk është ngjallur. ¹⁷ Po në qoftë se Krishti nuk është ngjallur, e kotë është feja juaj, ende jeni në mëkatet tuaja. ¹⁸ Atëherë edhe ata që vdiqën në Krishtin, u borën.

¹⁹ E në qoftë se në Krishtin shpresojmë vetëm në të mirat e kësaj jete, atëherë ne jemi njerëzit më të mjerët.

²⁰ Por, vërtet, Krishti u ngjall prej të vdekurve! Ai është fryti i parë i të vdekurve!

 

Fjala e Zotit

 

Psalmi 17 (16), 1bcd.6-7.8b.15 (fq. 672)

 

Ref. Ma trego, o Zot, dritën e fytyrës sate.

 

¹ Dëgjoje, o Zot, çështjen time të drejtë,

vështroje lutjen time,

Vëri vesh lutjes sime

që del nga buzët joshtiracake.

 

Ref. Ma trego, o Zot, dritën e fytyrës sate.

 

⁶ Në ndihmë të thërras ty, o Hyj, e më vështro,

ma prir veshin tënd e dëgjo fjalët e mia,

⁷ madhëroje mbi mua dashurinë tënde,

ti që i shpëton nga armiku

ata që shpresojnë në të djathtën tënde.

 

Ref. Ma trego, o Zot, dritën e fytyrës sate.

 

⁸ Më ruaj porsi beben e syrit,

më fsheh nën hijen e krahëve të tu,

¹⁵ E unë në pafajësi do ta shikoj fytyrën tënde,

e një ditë, kur të zgjohem,

do të kënaqem me praninë tënde.

 

Ref. Ma  trego, o Zot, dritën e fytyrës sate.

 

Aleluja!

Po të bekoj, o Atë, Zotërues i qiellit e dheut, që të vegjëlve ua zbulove misteret e Mbretërisë qiellore. (Mt 11, 25)

Aleluja!

 

Ungjilli (Lk 8, 1-3) (fq. 1472)

 

E përcillnin disa gra që i ndihmonin me pasuritë e veta.

 

Leximi i Ungjillit të shenjtë sipas Lukës

 

Në atë kohë, ¹ Jezusi përshkonte qytete e fshatra duke predikuar e duke kumtuar Ungjillin e Mbretërisë së Hyjit.

E përcillnin të Dymbëdhjetët ² dhe disa gra që kishin qenë shëruar nga shpirtrat e ndytë e sëmundje tjera: Maria e quajtur Magdalenë, prej të cilës pati dëbuar shtatë djaj, ³ Gjonia, e shoqja e Huzës, kujdestarit të Herodit, Suzana dhe shumë të tjera që me pasuritë e veta i ndihmonin Jezusit dhe nxënësve.

 

Fjala e Zotit

 

Lutja mbi dhurata

 

Vështroji, o Zot, lutjet e popullit tënd dhe pranoji me mirësi kushtet e shërbëtorëve të tu, që çkado që secili ka kushtuar në nder të emrit tënd të vlejë për shpëtimin e të gjithëve. Nëpër Krishtin Zotin tonë.

 

Antifona e kungimit Krh. Ps 35, 8

 

Sa e çmueshme është, o Hyj, mëshira jote! Bijtë e njerëzve strehohen nën hijen e krahëve të tu.

 

Ose: Krh. 1 Kor 10, 16

 

Gota e bekimit, të cilën ne e bekojmë, është bashkim me Gjakun e Krishtit dhe buka, të cilën ne e ndajmë, është bashkim me Trupin e Krishtit!

 

Lutja pas kungimit

 

E përshkoftë, o Zot, shpirtin e trupin tonë veprimi i kësaj dhurate qiellore, që të mos mbisundojë në ne ndjenja natyrore, por veprimi i këtij sakramenti. Nëpër Krishtin Zotin tonë.