Leximet e ditës

JAVA E XXV GJATË VITIT

 

E MËRKURË

 

Antifona e hyrjes

 

Unë jam shpëtimi i popullit, thotë Zoti; për çdo nevojë të më thërrasin në ndihmë, unë do t’i dëgjoj dhe do të jem Zoti i tyre për amshim.

 

Kolekta

 

O Hyj, Ti i përmblodhe të gjitha urdhërimet e ligjit tënd të shenjtë në urdhrin e dashurisë ndaj teje dhe ndaj të afërmit; bëj që, me zbatimin e urdhërimeve të tua, të arrijmë jetën e amshuar. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Fu 30, 5-9) (fq. 861)

 

Mos më jep as skamje as pasje, por më jep vetëm sa me lypet për jetesë.

 

Lexim prej Librit të Fjalëve të urta

 

⁵ Çdo fjalë e Hyjit është e sprovuar në zjarr dhe është shqyt për ata që shpresojnë në të. ⁶ Asgjë mos u shto fjalëve të tija që të mos qortohesh e të dalësh rrenacak.

⁷ Të lutem të më japësh dy gjëra, mos m’i moho deri të vdes: ⁸ dëboji prej meje kotësi e gënjeshtër, mos më jep as skamje as pasje, më jep vetëm sa më lypet për jetesë; ⁹ sepse, tepër mirë i ngirë, mund të të mohoj e të them: “Kush është Zoti?”, ose, i shtytur nga varfëria e tepërt, të vjell, e kështu ta çnderoj emrin e Hyjit tim.

 

Fjala e Zotit

 

Psalmi 119 (118), 29.72.89.101.104.163 (fq.797)

 

Ref. Fjala jote, o Zot, është dritë për këmbën time.

 

²⁹ Më mbaj larg nga udha e gënjeshtrës,

më pajis me Ligjin tënd.

⁷² Më i mirë është për mua Ligji yt

se me mijëra monedha ari e argjendi.

 

Ref. Fjala jote, o Zot, është dritë për këmbën time.

 

⁸⁹ E amshueshme është, o Zot, fjala jote,

e qëndrueshme porsi qielli.

¹⁰¹ Larg i mbaj këmbët e mia nga çdo udhë e së keqes

për t’i ruajtur urdhërimet e tua.

 

Ref. Fjala jote, o Zot, është dritë për këmbën time.

 

¹⁰⁴ Me anë të urdhërimeve të tua fitoj urtinë,

prandaj urrej çdo udhë gënjeshtre.

¹⁶³ E urrej gënjeshtrën dhe më velet,

kurse Ligjin tënd e kam për zemër.

 

Ref. Fjala jote, o Zot, është dritë për këmbën time.

 

Aleluja!

Afër është Mbretëria e qiellit thotë Zoti; kthehuni dhe besoni Ungjillit. (Mk 1, 15)

Aleluja!

 

Ungjilli (Lk 9, 1-6) (fq.1474)

 

I dërgoi për ta shpallur Mbretërinë e Hyjit dhe të shërojnë të sëmurët.

 

Leximi i Ungjillit të shenjtë sipas Lukës

 

Në atë kohë, ¹ Jezusi i thirri rreth vetes të Dymbëdhjetët e u dha zotësi e pushtet mbi të gjithë djajtë si dhe aftësinë të shërojnë sëmundjet.  ² Pastaj i dërgoi të shpallin Mbretërinë e Hyjit dhe të shërojnë të sëmurët.

³ E u tha: “Asgjë mos merrni për udhëtim: as shkop, as strajcë, as bukë, as para, e secili mos të ketë më se dy këmisha. ⁴ Në atë shtëpi që të hyni, aty rrini derisa të qëndroni në atë vend. ⁵ Nëse ndokush nuk do t’ju pranojë, kur të dilni prej atij qyteti, shkundni pluhurin prej këmbëve tuaja si dëshmi kundër tyre.”

⁶ Ata u nisën dhe renderendas u ranë fshatrave duke predikuar Ungjillin e duke shëruar gjithkund.

 

Fjala e Zotit

 

Lutja mbi dhurata

 

Pranoji, o Zot, po të lutemi, dhuratat e popullit tënd dhe bëj që, çka me fe të gjallë dëshmojmë, ta fitojmë me sakramente qiellore. Nëpër Krishtin Zotin tonë.

 

Antifona e kungimit Ps 118, 4-5

 

Ti i shpalle urdhërimet e tua që të mbahen përpikmërisht; oh, sikur të ishin të drejta udhët e mia për t’i zbatuar rregulloret e tua.

 

Ose: Gjn 10, 14

 

Unë jam Bariu i mirë, thotë Zoti; i njoh delet e mia dhe ato më njohin mua.

 

Lutja pas kungimit

 

O Zot, Ti na përtërin me sakramentet e tua; na e jep vazhdimisht ndihmën tënde, që në saje të sakramenteve dhe me jetën tonë të fitojmë frytin e shëlbimit. Nëpër Krishtin Zotin tonë.