Leximet e ditës

JAVA E XXVI GJATË VITIT - 0se më poshtë - Shën Jeronimi

 

E MËRKURË

 

Antifona e hyrjes Dan 3, 31.29.30.43.42

 

Gjithçka na bëre, o Zot, e bëre plotësisht me të drejtë, sepse kemi mëkatuar kundër teje, e nuk i kemi dëgjuar urdhërimet e tua; por jepi lavdi emrit tënd, o Zot; sillu me ne sipas mirësisë sate të madhe.

 

Kolekta

 

O Hyj, Ti e tregon gjithëpushtetësinë tënde veçanërisht me falje e me mëshirë: na ndiko hirin tënd vazhdimisht, që duke vrapuar nga premtimet tua, të bëhemi bashkëtrashëgimtarë në të mirat qiellore. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Jb 9, 1-12.14-16) (fq. 630)

 

Kush mund të ketë të drejtë para Hyjit?

 

Lexim prej Librit të Jobit

 

¹ Jobi mori fjalën e tha: ² “Vërtet e di se ashtu është: para Hyjit kush mund të ketë të drejtë? ³ Nëse me Të do të bëjë rragatje një në një mijë s’mund t’i përgjigjem! ⁴ Në mend i kthjellët e në fuqi i fortë, e luftoi kush e fitues doli? ⁵ I shkul malet e ato s’e dinë, këndej‑andej me furi i sjell! ⁶ Shrregull tokën nga vendi e luan, tranden të gjitha shtyllat e saja. ⁷ I urdhëron diellit e ai nuk lind, nën vulë të vet yjet i ndryen. ⁸ Pa ndihmën e tjerëve ai e shtrin qiellin, lirisht ecën mbi valë të detit! ⁹ Ai krijoi Arushë e Orion, Shenjëzat dhe Yjet e Jugut. ¹⁰ Bën punë të mëdha e të pashqyrtueshme, mrekulli që s’mund të numërohen! ¹¹ Vjen tek unë e nuk e shoh, më bie përbri e s’e hetoj. ¹² Nëse rrëmben, kush e pengon? Kush guxon t’i thotë: ‘Ç’po bën?’ ¹⁴ Kush jam unë që t’i përgjigjem e me ç’fjalë t’i kundërshtoj? ¹⁵ Edhe në të drejtën sikur të isha, s’do të përgjigjesha... do ta lutja Gjykatësin tim. ¹⁶ Po edhe uratën të ma dëgjonte, s’do të besoja se më ka vështruar!

 

Fjala e Zotit

 

Psalmi 88 (87), 10bc-11.12-13.14-15 (fq. 758)

 

Ref. Le të arrij te ti, lutja ime, o Zot.

 

¹⁰  Gjithë ditën në ndihmë të thërras, o Zot,

duart e mia drejt teje i shtrij.

¹¹ Vallë për të vdekur bën ti mrekulli?

A thua hijet ngrihen për të lëvduar?

 

Ref. Le të arrij te ti, lutja ime, o Zot.

 

¹² Flet ndokush për mirësinë tënde në varr,

për besën tënde në vendin e shkatërrimit?

¹³ Në errësirë njihen mrekullitë e tua,

në vend të harresës drejtësia jote?

 

Ref. Le të arrij te ti, lutja ime, o Zot.

 

¹⁴ E unë, o Zot, prej teje kërkoj ndihmë,

urata ime në mëngjes mbërrin para teje.

¹⁵ Pse, o Zot, e përbuz shpirtin tim?

Përse fytyrën tënde e fsheh para meje?

 

Ref. Le të arrij te ti, lutja ime, o Zot.

 

Aleluja!

Unë gjithçka mbaj si dëm dhe gjithçka lë pas, në krahasim me njohjen e Jezu Krishtit, Zotit tim. (krh. Fil 3, 8-9)

Aleluja!

 

Ungjilli (Lk 9, 57-62) (fq. 1477)

 

Dua të vijë pas teje kahdo që të shkosh!

 

Leximi i Ungjillit të shenjtë sipas Lukës

 

Në atë kohë, ⁵⁷ ndërsa po bënin rrugë, një njeri i tha Jezusit: “Unë dua të vijë pas teje kahdo që të shkosh!” ⁵⁸ Jezusi iu përgjigj: “Dhelprat i kanë strofujt e vet edhe shpendët e qiellit çerdhet, kurse biri i njeriut nuk ka ku ta mbështesë kokën!”

⁵⁹ Një tjetrit i tha: “Eja pas meje!” Por ai iu përgjigj: “Zotëri, më lejo të shkoj një herë e ta varros tim atë!” ⁶⁰ “Lëri ‑ iu përgjigj Jezusi ‑ që të vdekurit t’i varrosin të vdekurit e vet e ti shko e prediko Mbretërinë e Hyjit!”

⁶¹ Atëherë i tha një tjetër: “Unë po vij me ty, Zotëri, por më jep leje njëherë të shkoj e të përshëndetem me anëtarët e familjes sime.” ⁶² “Kushdo ‑ iu përgjigj Jezusi ‑ që vë dorën në parmendë dhe sillet e shikon mbrapa, nuk është i përshtatshëm për Mbretërinë e Hyjit!”

 

Fjala e Zotit

 

Lutja mbi dhurata

 

Bëj, o Hyj i mëshirshëm, që të të pëlqejë kushti ynë dhe, në saje të tij, të na burojë gurra e bekimeve të tua qiellore. Nëpër Krishtin Zotin tonë.

 

Antifona e kungimit Krh. Ps 118, 49-50

 

Të të bjerë ndër mend fjala që i dhe shërbëtorit tënd, me të cilën më ke dhënë shpresë, o Zot, ajo më ngushëlloi në vështirësinë time.

 

Ose: 1 Gjn 3, 16

 

Me këtë gjë e njohëm dashurinë e Hyjit: Ai e dhuroi jetën e vet për ne edhe ne duhet ta japim jetën për vëllezër.

 

Lutja pas kungimit

 

Ky mister qiellor na përtëriftë, o Zot, shpirtin e trupin, që ne, të cilët marrim pjesë në vdekjen e Krishtit, të bëhemi edhe pjesëtarë në lumturinë e tij. Ai jeton e mbretëron në shekujt e shekujve.

 

30 shtator

 

Shën Jeronimi, meshtar e Mësues i Kishës

 

Përkujtim

 

Antifona e hyrjes Krh. Ps 1, 2-3

 

Lum njeriu që ditë e natë kujton ligjin e Zotit: ai e jep frytin e vet në stinë.

 

Kolekta

 

O Hyj, Ti i dhurove shën Jeronimit meshtar një njohje të thellë e depërtuese të Shkrimit të Shenjtë; bëj që populli yt të ushqehet gjithmonë e më shumë me fjalën tënde dhe ta gjejë në të gurrën e jetës. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (2 Tim 3, 14-17) (fq. 1681)

 

I terë Shkrimi i shenjtë, hyjnisht i frymëzuar, është i dobishëm për të mësuar.

 

Lexim prej Letrës së dytë të Shën Palit apostull drejtuar Timoteut

 

Biri im, ¹⁴ ti veç, qëndro në mësim që ke marrë dhe në atë që t’u besua duke e ditur se prej kujt i mësove ¹⁵ dhe se qysh prej fëmijërisë e njeh Shkrimin e shenjtë, i cili është i aftë të japë dijen që çon në shëlbim me anë të fesë në Jezu Krishtin.

¹⁶ I tërë Shkrimi i shenjtë, hyjnisht i frymëzuar, është i dobishëm për të mësuar, për të bindur, për të ndrequr, për të edukuar në drejtësi, ¹⁷ që njeriu i Hyjit të jetë i përsosur, i përshtatur për të kryer çdo vepër të mirë.

 

Fjala e Zotit

 

Psalmi 119 (118), 9.10.11.12.13.14 (fq. 797)

 

Ref. Mi mëso, o Zot, ligjet e tua.

 

⁹ Si do ta ruajë të pastër djaloshi udhën e vet?

Duke i zbatuar fjalët e tua.

¹⁰ Të kërkoj me gjithë fuqinë e shpirtit tim:

mos lejo t'u shmangem urdhërimeve të tua.

 

Ref. Mi mëso, o Zot, ligjet e tua.

 

¹¹ Fjalët e tua i fsheha në zemrën time,

që të mos gaboj kundër teje.

¹² I bekuar je, o Zot,

ma mëso vullnetin tënd.

 

Ref. Mi mëso, o Zot, ligjet e tua.

 

¹³ Me buzët e mia i shpall një nga një

të gjitha gjyqet e gojës sate.

¹⁴ Më shumë i gëzohem udhës së dëshmive të tua

se pasurisë tejet të madhe.

 

Ref. Mi mëso, o Zot, ligjet e tua.

 

Aleluja!

Hape, o Zot, zemrën tonë që t’i pranojmë fjalët e Birit tënd. (Vap 16, 14b)

Aleluja!

 

Ungjilli (Mt 13, 47-52) (fq. 1402/3)

 

Kur rrjeta mbushet, peshkatarët e qesin në breg, ulen dhe i mbledhin peshqit e mirë në enë e të këqijtë i tresin.

 

Leximi i Ungjillit të shenjtë sipas Mateut

 

Në atë kohë, Jezusi u tha nxënësve të vet: ⁴⁷ Përsëri Mbretëria e qiellit i ngjan rrjetës që hidhet në det dhe mbledh çdo lloj peshku. ⁴⁸ Kur mbushet, peshkatarët e qesin në breg, ulen dhe i mbledhin peshqit e mirë në enë e të këqijtë i tresin. ⁴⁹ Kështu do të ndodhë edhe në mbarimin e botës: do të dalin engjëjt e do t’i ndajnë të këqijtë prej të drejtëve ⁵⁰ dhe do t’i hedhin në furrë të ndezur, ku do të jetë vaj dhe kërcëllim dhëmbësh. ⁵¹ »A i kuptuat të gjitha këto?

»Po! - i përgjigjën ata.

⁵² E ai u tha: »Kështu pra, çdo skrib, që e përvetësoi mësimin e Mbretërisë së qiellit i përngjan zotshtëpisë, që nxjerr nga visari i vet gjëra të reja e të vjetra.«

 

Fjala e Zotit

 

Lutja mbi dhurata

 

Bëj, o Zot, që, sipas shembullit të shën Jeronimit, pasi ta kemi përsiatur fjalën tënde, me më shumë gatishmëri t’ia kushtojmë madhërisë sate flinë e shpëtimit. Nëpër Krishtin Zotin tonë.

 

Antifona e kungimit Krh. Jer 15, 16

 

O Zot Hyj, më erdhën fjalët e tua dhe unë i përpiva; Fjala jote u bë për mua gëzim dhe hare e zemrës sime.

 

Lutja pas kungimit

 

Bëj, o Zot, që kungimi i shenjtë që morëm në përkujtimin e shën Jeronimit, t’i nxisë zemrat tona për ta njohur Shkrimin e Shenjtë: të kuptojmë si duhet të jetojmë e të jetojmë në mënyrë që të fitojmë jetën e pasosur. Nëpër Krishtin Zotin tonë.