Leximet e ditës

JAVA E XXVIII GJATË VITIT

 

E MARTË

 

Antifona e hyrjes Ps 129, 3-4

 

Nëse do t’i mbash mend paudhësitë, o Zot, o Zot, e kush do të qëndrojë para teje? Por te Ti gjendet falja, o Hyj i Izraelit.

 

Kolekta

 

Na priftë, o Zot dhe na shoqëroftë përherë hiri yt dhe vazhdimisht na bëftë të kujdesshëm të kryejmë vepra të mira. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Gal 5, 1-6) (fq. 1644)

 

Në Jezu Krishtin nuk vlen gjë as rrethprerja as parrethprerja, por ‑ feja që vepron me dashuri.

 

Lexim prej Letrës së Shën Palit apostull drejtuar Galatasve

 

Vëllezër, ¹ Krishti na liroi që të mbeteshim vërtet të lirë. Qëndroni, prandaj, e mos lejoni t'ju zënë në zgjedhën e skllavërisë!

² Ja, unë, Pali, po ju them: në qoftë se rrethpriteni, Krishti më s'do t'ju vlejë asgjë! ³ Përsëri dua t'ju vë në dijeni: çdo njeri që rrethpritet, e detyron vetveten ta zbatojë mbarë Ligjin. ⁴ I këputët marrëdhëniet me Krishtin, ju që e themeloni shfajësimin në Ligj: keni rënë nga hiri.

 ⁵ Sepse ne nëpër Shpirtin Shenjt e presim me anë të fesë drejtësinë që e shpresojmë. ⁶ E njëmend, në Jezu Krishtin nuk vlen gjë as rrethprerja as parrethprerja, por ‑ feja që vepron me dashuri.

 

Fjala e Zotit

 

Psalmi 119 (118), 41.43.44.45.47.48 (fq. 797)

 

Ref. Le të vijë tek unë, o Zot, dashuria jote.

 

⁴¹ Ma jep, o Zot, mëshirën tënde,

shëlbimin tënd sikurse më premtove.

⁴³ Kurrë mos e hiq prej gojës sime fjalën e së vërtetës,

sepse kam besim në gjyqet e tua.

 

Ref. Le të vijë tek unë, o Zot, dashuria jote.

 

⁴⁴ E unë do ta mbaj Ligjin tënd përherë,

në shekuj e në jetë të jetës.

⁴⁵ Do të eci udhës së madhe,

sepse i kërkoj urdhërimet e tua.

 

Ref. Le të vijë tek unë, o Zot, dashuria jote.

 

⁴⁷ Do të kënaqem në urdhërimet e tua,

që aq shumë i kam për zemër.

⁴⁸ Ngre duart e mia drejt urdhërimeve të tua që i dua,

e do t'i bluaj në mendje rregulloret e tua.

 

Ref. Le të vijë tek unë, o Zot, dashuria jote.

 

Aleluja!

Fjala e Hyjit është e gjallë dhe vepruese; përshkon aq sa ndanë frymën dhe shpirtin. (Heb 4, 12)

Aleluja!

 

Ungjilli (Lk 11, 37-41) (fq. 1480/1)

 

Jepni lëmoshë e gjithçka do të jetë e pastër për ju.

 

Leximi i Ungjillit të shenjtë sipas Lukës

 

Në atë kohë, ³⁷ ndërsa Jezusi ende po fliste, një farise iu lut të shkonte tek ai për drekë. Ai hyri dhe u ul në tryezë. ³⁸ Fariseu, kur pa se Jezusi nuk u la para buke, u çudit.

³⁹ Zotëria i tha: »Po! Ju farisenjtë lani përjashta gotën dhe kupëzën, ndërsa brendinë tuaj e keni plot rrëmbime e prapësi. ⁴⁰ Të marrë! A thua se ai që përftoi përjashtësinë, nuk e përftoi edhe brendësinë? ⁴¹ Jepni, pra, për lëmoshë ç'është brenda gotës e kupës e do të jetë gjithçka e pastër për ju.

 

Fjala e Zotit

 

Lutja mbi dhurata

 

Pranoji, o Zot, bashkë me lutjet e besimtarëve, edhe flitë e kushtuara, që me përkushtinë ndaj shërbesës së shenjtë, të kalojmë në lumturinë qiellore. Nëpër Krishtin Zotin tonë.

 

Antifona e kungimit Krh. Ps 33, 11

 

Pasanikët u varfëruan dhe patën uri, ndërsa ata që kërkojnë Zotin do të kenë çdo të mirë.

 

Ose: 1 Gjn 3, 2

 

Kur Zoti të shfaqet, do të bëhemi të ngjashëm me të, sepse do ta shohim ashtu si është.

 

Lutja pas kungimit

 

Po të lutemi me përvujtëri, o Zot, që sikurse na ushqen me Trupin e Gjakun e shenjtë, ashtu edhe na bëj pjesëtarë të natyrës hyjnore. Nëpër Krishtin Zotin tonë.