Leximet e ditës

JAVA E XXVI GJATË VITIT

E PREMTE

Antifona e hyrjes Dan 3, 31.29.30.43.42

Gjithçka na bëre, o Zot, e bëre plotësisht me të drejtë, sepse kemi mëkatuar kundër teje, e nuk i kemi dëgjuar urdhërimet e tua; por jepi lavdi emrit tënd, o Zot; sillu me ne sipas mirësisë sate të madhe.

Kolekta

O Hyj, Ti e tregon gjithëpushtetësinë tënde veçanërisht me falje e me mëshirë: na ndiko hirin tënd vazhdimisht, që duke vrapuar nga premtimet tua, të bëhemi bashkëtrashëgimtarë në të mirat qiellore. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

Leximi i parë (Jb 38, 1.12-21; 40, 3-5) (fq. 652/3 dhe 655)

Gjatë jetës sate mëngjesit a i urdhërove? Po agimit vendin a ia caktove?

Lexim prej Librit të Jobit

¹ Nga stuhia Zoti i përgjigji Jobit e i tha: ¹² Gjatë jetës sate mëngjesit a i urdhërove? Po agimit vendin a ia caktove? ¹³ Kur ia kape skajet tokës a u shkundën prej saj mëkatarët? ¹⁴ A do të shndërrohet në deltinë për vula, do të ngjyroset porsi petku? ¹⁵ Mëkatarëve drita u merret, u thërrmohet grushti i ngritur. ¹⁶ A mos mbërrite në burimet e detit, a mos ece fundit të pështjerrave? ¹⁷ A t'u hapën dyert e vdekjes dhe i pe hymjet e errëta? ¹⁸ A i vrojtove përmasat e tokës? Fol, pra, nëse i di këto të gjitha! ¹⁹ Në cilin kënd drita banon? Vendbanimin ku e kanë errësirat? ²⁰ Për t'u prirë në caqet e tyre o për t'i kthyer në banesë të tyre? ²¹ Po si! Ti atëherë ishe i lindur, vitet e tua janë tepër të shumta!

^40,³ Jobi iu përgjigj Zotit: ⁴ Heu! Pa mend fola! Si të përgjigjem? Me dorë gojën po e mbyll! ⁵ Një herë fola: s'e përsëris më! Dy herë fola: s'vazhdoj më!

Fjala e Zotit

Psalmi 139 (138), 1-3.7-8.9-10.13-14ab (fq. 819)

Ref. Më udhëheq, o Zot, në udhën e shëlbimit.

¹O Zot, ti më shqyrton e më njeh,

² ti di kur rri e kur ngritem,

prej së largu i njeh mendimet e mia.

³ Si në shtegtoj si në pushoj, ti më vëren,

ti i di të gjitha udhët e mia.

Ref. Më udhëheq, o Zot, në udhën e shëlbimit.

⁷ Ku mund të shkoj larg prej shpirtit tënd,

ku të iki larg prej pranisë sate?

⁸ Nëse ngjitem në qiell, ti atje je,

nëse zbres në Nëntokë, edhe aty je.

Ref. Më udhëheq, o Zot, në udhën e shëlbimit.

⁹ Po t'i marr krahët e agimit

e të shkoj të banoj në skajin e detit,

¹⁰ edhe atje dora jote do të më përcjellë

e do të më mbajë e djathta jote.

Ref. Më udhëheq, o Zot, në udhën e shëlbimit.

¹³ Ti je ai që m'i krijove veshkat,

ti më ke endur në kraharorin e nënës!

¹⁴ Të lavdëroj pse më krijove kaq mrekullisht,

të mrekullueshme janë veprat e tua.

Ref. Më udhëheq, o Zot, në udhën e shëlbimit.

Aleluja!

Sot mos e bëni zemrën tuaj gur, por dëgjojeni zërin e Zotit. (krh. Ps 95, 8ab)

Aleluja!

Ungjilli (Lk 10, 13-16) (fq. 1478)

Kush përbuz mua, përbuz Atë që më ka dërguar.

Leximi i Ungjillit të shenjtë sipas Lukës

Në atë kohë Jezusi tha: ¹³ »Vaj për ty, o Korozain, vaj për ty, o Betsaidë! Sepse të kishin ndodhur në Tir e në Sidon mrekullitë që ndodhën në ju, kaherë, të veshur në grathore e të mbuluar me hi do të kishin bërë pendesë! ¹⁴ Prandaj, Tiri e Sidoni Ditën e Gjyqit do ta kenë më lehtë se ju!

¹⁵ E ti, o Kafarnaum, a thua ndoshta do të lartësohesh deri në qiell? Do të plandosesh deri në fund të ferrit!'

¹⁶ Kush dëgjon ju, dëgjon mua. Kush përbuz ju, përbuzë mua. Kush përbuz mua, përbuz Atë që më ka dërguar.«

Fjala e Zotit

Lutja mbi dhurata

Bëj, o Hyj i mëshirshëm, që të të pëlqejë kushti ynë dhe, në saje të tij, të na burojë gurra e bekimeve të tua qiellore. Nëpër Krishtin Zotin tonë.

Antifona e kungimit Krh. Ps 118, 49-50

Të të bjerë ndër mend fjala që i dhe shërbëtorit tënd, me të cilën më ke dhënë shpresë, o Zot, ajo më ngushëlloi në vështirësinë time.

Ose: 1 Gjn 3, 16

Me këtë gjë e njohëm dashurinë e Hyjit: Ai e dhuroi jetën e vet për ne edhe ne duhet ta japim jetën për vëllezër.

Lutja pas kungimit

Ky mister qiellor na përtëriftë, o Zot, shpirtin e trupin, që ne, të cilët marrim pjesë në vdekjen e Krishtit, të bëhemi edhe pjesëtarë në lumturinë e tij. Ai jeton e mbretëron në shekujt e shekujve.