Leximet e ditës

JAVA E XXVII GJATË VITIT

E MARTË

Antifona e hyrjes Krh. Est 4, 17

Gjithçka, o Zot, është në dorën tënde dhe askush s’mund t’i kundërshtojë vullnetit tënd. Ti ke krijuar çdo gjë: qiellin e tokën, të gjitha mrekullitë që i përfshin kupa qiellore. Ti je Zotëruesi i të gjithave.

Kolekta

O Hyj i gjithëpushtetshëm dhe i amshuar, mirësia jote i tejkalon meritat dhe dëshirat tona: ki mëshirë për ne, na fal çka ndërgjegjja jonë na padit, e shto ato që lutja jonë nuk i përfshin. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

Leximi i parë (Gal 1, 6-12) (fq. 1639/40)

Ungjillin nuk e mora prej ndonjë njeriu, por ma zbuloi Jezu Krishti.

Lexim prej Letrës së Shën Palit apostull drejtuar Galatasve

Vëllezër, fort po çuditem që kaq shpejt po e lini Atë, që ju thirri në hir të Krishtit, për të kaluar në një Ungjill tjetër. ⁷ E pra, Ungjill tjetër nuk ka! Por po, ka asi njerëzish që ju turbullojnë dhe që duan ta shndërrojnë Ungjillin e Krishtit.

⁸ Tashti, në qoftë se edhe ne vetë ose edhe ndonjë engjëll prej qiellit ‑ ju predikon një Ungjill tjetër, të ndryshëm nga ai, që ju patëm predikuar ne ‑ qoftë mallkuar! ⁹ Sikurse ju thamë më parë, po ju them edhe tani përsëri: nëse ndokush ju shpall një ungjill tjetër, të ndryshëm nga ai, që e pranuat ‑ qoftë mallkuar!

¹⁰ Pse, a thua unë ndoshta kërkoj të fitoj përkrahjen e njerëzve e jo të Hyjit? A mos kërkoj t'u pëlqej njerëzve? Po t'u mundoja ende t'u pëlqej njerëzve, nuk do të isha shërbëtori i Krishtit.

¹¹ Tani, o vëllezër, po ju vë në dijeni: Ungjilli që ju kam predikuar, nuk është vepër njerëzish; ¹² sepse atë as nuk e mora, as nuk e mësova prej ndonjë njeriu, por ma zbuloi Jezu Krishti.

Fjala e Zotit

Psalmi 111 (110), 1b-2.7-8.9.10c (fq. 790)

Ref. Zoti është besnik në premtimin e vet.

¹Me gjithë shpirt do ta lavdëroj Zotin,

në kuvendin e të drejtëve, në mbledhjen e tyre.

² Të mëdha janë veprat e Hyjit,

për t'u shqyrtuar prej atyre që i duan.

Ref. Zoti është besnik në premtimin e vet.

⁷ Veprat e duarve të tij janë drejtësi e besnikëri,

urdhërimet e tij janë të vërteta,

⁸ të qëndrueshme në jetë të jetëve,

të themeluara mbi të vërtetën e drejtësinë.

Ref. Zoti është besnik në premtimin e vet.

⁹ Shpërblim i dha popullit të vet,

Besëlidhjen e vet e bëri të amshueshme:

i shenjtë dhe i tmerrshëm është Emri i tij.

¹⁰ Fillimi i dijes është frika e Zotit.

Ref. Zoti është besnik në premtimin e vet.

Aleluja!

Të lumtë ata që e dëgjojnë fjalën e Hyjit dhe e zbatojnë me dashuri. (krh. Lk 11, 28)

Aleluja!

Ungjilli (Lk 10, 38-42) (fq. 1479)

Marta e priti Jezusin në shtëpi. Maria zgjodhi pjesën më të mirën që nuk do t'i merret.

Leximi i Ungjillit të shenjtë sipas Lukës

Në atë kohë, ³⁸ Jezusi hyri në një fshat dhe një grua, me emër Martë, e priti në shtëpi.

³⁹ Ajo kishte një motër që quhej Mari. Kjo iu ul Zotërisë te këmbët dhe dëgjonte fjalën e tij.

⁴⁰ Marta, e zënë krejtësisht me punët e shërbimit të pritjes, iu afrua e i tha: »Zotëri, a nuk po të duket rëndë që motra ime më la krejt vetëm të shërbej? Thuaj, pra, të më ndihmojë!« ⁴¹ »Martë, Martë - iu përgjigj Zotëria - ti po brengosesh dhe po shqetësohesh për shumë gjëra, e pra ⁴² e nevojshme është vetëm një. Vërtet Maria zgjodh pjesën më të mirën që nuk do t'i merret.«

Fjala e Zotit

Lutja mbi dhurata

Pranoje, o Zot, flinë e themeluar prej teje dhe bëj që shërbesa e këtyre mistereve, që po e kremtojmë sipas urdhrit tënd, ta plotësojë shëlbimit tënd dhe të na shenjtërojë. Nëpër Krishtin Zotin tonë.

Antifona e kungimit Vaj 3, 25

I mirë është Zoti për ata që shpresojnë në të, ndaj shpirtit që e kërkon.

Ose: Krh. 1 Kor 10, 17

Edhe pse jemi shumë, jemi një trup i vetëm, sepse të gjithë marrim pjesë në një bukë e në një kelk.

Lutja pas kungimit

O Hyj i gjithëpushtetshëm, bëj që të gjithë ne, pasi e morëm këtë sakrament si ushqim dhe pije shpirtërore, të shndërrohemi në atë që kemi marrë. Nëpër Krishtin Zotin tonë.